شىمكەنتتە پاندەميا كەزىندە جۇمىس ىستەگەن مەديتسينا قىزمەتكەرلەرىنە ءتيىستى ۇستەماقى ءالى تولەنبەگەن، دەپ حابارلادى "ادىرنا” ۇلتتىق پورتالى “استانا” تەلەارناسىنا سىلتەپ.
جەكەمەنشىك كلينيكاداعى 70-تەن استام ادام قاۋىپتى ۆيرۋس ورشىگەن كەزدە الدىڭعى شەپتە بولعاندارىن دالەلدەي الماي ءجۇر.
ىندەت كۇشەيىپ تۇرعان كەزدە جۇمىس ىستەگەن جەتپىستەن استام مەديتسينا مامانى شىدامدارىنىڭ تاۋسىلعانىن ايتادى. بىلتىر جازدا 1,5 اي قاۋىپتى دەرتپەن كۇرەسسەك تە، ۇستەمەاقى تۇگىلى جالاقى المادىق دەيدى.
"بۇيرىق بويىنشا باسىندا 850 مىڭ ۇستەماقى تولەنەدى دەپ ايتىلعان. ءسويتتى دە 10-15 كۇنەن كەيىن ول 420 مىڭعا ءتۇستى دەدى. مەيلى، حالىق ءۇشىن دەپ وعاندا كوندىك. بىزدە تازا ايلىق 90-100 مىڭنىڭ اراسىندا بولادى دەدى. ونى دا مەيلى دەدىك. 1,5 اي جۇمىس جاساعاننان كەيىن بۇيرىقپەن ءبىزدى جۇمىستان شىعارىپ جىبەردى. ون كۇننىڭ ىشىندە سىزدەرگە ايلىقتارىڭىزدى بەرەمىز دەپ ۋادە بەردى. ءبىز ون كۇن ەمەس ءبىر اي كۇتتىك. سودان بەرى جارتى جىل ءوتتى", - دەيدى مەدبيكە ۇلزادا جۇمانوۆا.
مەگاپوليستىڭ باس دارىگەرى كلينيكاعا، كلينيكاداعىلار باسقارماعا سىلتەپ، ورتادا دوپ بوپ ءجۇرمىز، دەيدى جينالعاندار.
ايتۋلارىنشا، بىلتىر جەكە كلينيكا ەندى اشىلىپ جاتقاندا بيلىكتەگىلەر 100 توسەك ورىندىق ينفەكتسيالىق ستاتسيونار رەتىندە جۇمىس ىستەۋگە كوندىرگەن كورىنەدى. ءتىپتى ول كەزدە ليتسەنزيا الىپ ۇلگەرمەگەنىمىزگە دە قاراعان جوق دەيدى .
"پوزيلوۆ مىرزا 23-شىلدە كۇنى بۇيرىق شىعارادى، ول جەردە جۇمىسقا قابىلدانسىن، جۇمىسشىلار جاساسىن جۇمىس. بۇيرىقتى شىعارماستان بۇرىن ءبىرىنشى قالانىڭ ءبىرىنشى اكىم ورىنباسارى مۇقان مىرزا مەن پوزىلوۆ مىرزا ەكەۋى كەپ سول مەكەمەنى كورىپ، جۇمىسقا جارايدى ەكەن، جاقسى مەكەمە ەكەن دەپ "جۇمىسقا كىرىسە بەرىڭدەر، ارعى جاعىن سەندەر ەش ۋايىمداماڭدار" دەپ اۋىزشا ۋادەلەرىن بەرىپ كەتكەن بولاتىن", - دەيدى مەديتسينالىق مەكەمەنىڭ زاڭدى وكىلى ەربولات مىرزاقۇلوۆ.
الايدا سول ۋادە ءسوز كۇيىندە قالدى دەيدى قازىر جۇمىسسىز جۇرگەندەر. كلينيكا قوردالانعان قارىزدارىنا بايلانىستى جابىلعان. ويتكەنى توسەك ورىن، ءدارى-دارمەك، قۇرال سايماننىڭ ءبارىن سوزگە سەنىپ، وزدەرى قارىزعا الىپتى. ەسەپتەرىنشە، مەكەمەنىڭ 118 ملن تەڭگە بەرەشەگى بار.
"بۇيرىققا سايكەس جۇمىس جاساعاندىقتان تولەۋ ماسەلەسىن سۇراعان كەزدە "سىزدەردىڭ ليتسەنزيا جوقتىعىن، جىلدىق جوسپاردا سىزدەر بولماعانسىزدار" دەگەن ۋاجبەن قازىر باس تارتىپ وتىر. بۇل بويىنشا پروكۋراتۋراعا ارىزداندىق، اكىمشىلىككە ارىزداندىق", - دەيدى وكىل.
ال مەگاپوليستىڭ باس دارىگەرى سول كەزدە قيىن قىستاۋ زامان بولدى. ولاردىڭ جۇمىس ىستەگەنىن ەشكىم جوققا شىعارىپ تۇرعان جوق، ءبارىن رەتتەيمىن دەپ وتىر.
ء"بىزدى دە تۇسىنىڭىزدەر، بىزدە ەرىككەننەن اشقان جوقپىز عوي. ناۋقاستاردى ەمدەۋ ءۇشىن، ءومىرىن الىپ قالۋ ءۇشىن ىستەدىك. ەگەر مەن سونى اشپايتىن بولسام مەندە ناۋقاستار ولەدى، وسى ۋاقىتقا دەيىن شىرىلداپ جۇرگەنىن مەن ونى مويىندايمىن. ەشكىم ەشكىمنەن قاشىپ جۇرگەن جوق", - دەيدى شىمكەنت دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ.
باس دارىگەر سوت ارقىلى ءبارى دالەلدەنەدى دەيدى. ىستەلگەن جۇمىستى ەشكىم جوققا شىعارا المايتىنىن ايتتى. ايتۋىنشا، ادۆوكاتتى دا ءوزى جالداماق. ءىستى سوڭىنا دەيىن جەتكىزۋ ءۇشىن ءتىپتى ءار سوت وتىرىسىنا قاتىسۋعا دا ۋادە بەردى.
“ادىرنا” ۇلتتىق پورتالى
