قالا اكىمى مۇرات ايتەنوۆتىڭ وتكەن جىلدى قورىتىندىلاعان حالىق الدىنداعى ەسەپتى كەزدەسۋى ءال-فارابي اۋدانىنىڭ تۇرعىندارىمەن جالعاستى. بۇگىنگى كەزدەسۋگە III, IV, V سەكتورعا قاراستى 15 شاعىن اۋداننان كەلگەن 600-دەن استام تۇرعىن قاتىستى.
قالا باسشىسىنىڭ ەسەبىن شىمكەنتتىكتەر قالا اكىمدىگىنىڭ رەسمي الەۋمەتتىك جەلىدەگى instagram پاراقشاسىندا تىكەلەي ەفير ارقىلى دا تىڭدادى.
فورماتى وزگەرگەن ەسەپتى جيىندى قالالىق ءماسليحاتتىڭ حاتشىسى باحادىر نارىمبەتوۆ جۇرگىزىپ وتىردى. جيىنعا قالا ءماسليحاتىنىڭ دەپۋتاتتارى، قوعامدىق كەڭەس مۇشەلەرى جانە باق وكىلدەرى قاتىستى.
مەگاپوليس اكىمى م.ايتەنوۆ اتقارىلعان جۇمىستار بويىنشا ەسەپ بەرىپ، اۋداننىڭ دامۋ باعىتىن باياندادى، جىل باسىنان بەرى اۋداندى ارالاۋ بارىسىندا تۇرعىندار كوتەرگەن 22 ماسەلەنىڭ بۇگىندە 9-ى شەشىلىپ، 13-ءى ورىندالۋ بارىسىندا ەكەنىن اتاپ ءوتتى.
اۋدانداعى 3, 4, 5 سەكتوردا 82 مىڭعا حالىق تۇرۋدا. وندا 10 مەكتەپ، 20 بالاباقشا، 198 اۋلا، 26 سپورت الاڭشاسى بار. ەلەكتر، اۋىز سۋ، تابيعي گازبەن، ينتەرنەتپەن تولىق قامتىلعان. كەزدەسۋگە كەلگەن تۇرعىندار كارىز جۇيەسى، اسفالت جول سالۋ، جارىقتاندىرىلماعان 22 كوشەنى جارىقتاندىرۋ جانە بالالار ويىن الاڭشاسىن جاڭارتۋ ماسەلەلەرى بويىنشا ساۋالدار قويدى.
قالا اكىمى ءاربىر سۇراققا ناقتى جاۋاپتار بەرىپ، ۇسىنىستاردى تىڭدادى. حالىق قاتىساتىن بيۋدجەت جوباسى بويىنشا بيىل 32 بالالار ويىن الاڭشاسىن ورناتۋ، اۋدانداعى 7 كوشەگە اسفالت توسەۋ جانە 8 كوشەنى جارىقتاندىرۋ، كارىز جۇيەلەرىن جۇرگىزۋ بويىنشا جۇمىستاردى كەڭىنەن باياندادى. ساۋالدار بويىنشا ءتيىستى سالا باسشىلارىنا تاپسىرمالار بەردى.
