Qala ákimi Murat Áıtenovtiń ótken jyldy qorytyndylaǵan halyq aldyndaǵy esepti kezdesýi Ál-Farabı aýdanynyń turǵyndarymen jalǵasty. Búgingi kezdesýge III, IV, V sektorǵa qarasty 15 shaǵyn aýdannan kelgen 600-den astam turǵyn qatysty.
Qala basshysynyń esebin shymkenttikter qala ákimdiginiń resmı áleýmettik jelidegi instagram paraqshasynda tikeleı efır arqyly da tyńdady.
Formaty ózgergen esepti jıyndy qalalyq máslıhattyń hatshysy Bahadyr Narymbetov júrgizip otyrdy. Jıynǵa qala máslıhatynyń depýtattary, qoǵamdyq keńes músheleri jáne BAQ ókilderi qatysty.
Megapolıs ákimi M.Áıtenov atqarylǵan jumystar boıynsha esep berip, aýdannyń damý baǵytyn baıandady, jyl basynan beri aýdandy aralaý barysynda turǵyndar kótergen 22 máseleniń búginde 9-y sheshilip, 13-i oryndalý barysynda ekenin atap ótti.
Aýdandaǵy 3, 4, 5 sektorda 82 myńǵa halyq turýda. Onda 10 mektep, 20 balabaqsha, 198 aýla, 26 sport alańshasy bar. Elektr, aýyz sý, tabıǵı gazben, ınternetpen tolyq qamtylǵan. Kezdesýge kelgen turǵyndar káriz júıesi, asfalt jol salý, jaryqtandyrylmaǵan 22 kósheni jaryqtandyrý jáne balalar oıyn alańshasyn jańartý máseleleri boıynsha saýaldar qoıdy.
Qala ákimi árbir suraqqa naqty jaýaptar berip, usynystardy tyńdady. Halyq qatysatyn bıýdjet jobasy boıynsha bıyl 32 balalar oıyn alańshasyn ornatý, aýdandaǵy 7 kóshege asfalt tóseý jáne 8 kósheni jaryqtandyrý, káriz júıelerin júrgizý boıynsha jumystardy keńinen baıandady. Saýaldar boıynsha tıisti sala basshylaryna tapsyrmalar berdi.
