شىمكەنت قالاسىنىڭ اكىمى مۇرات ايتەنوۆتىڭ ەسەپتى كەزدەسۋى اباي اۋدانىنا قاراستى 8 ەلدى مەكەن تۇرعىندارىمەن ءوتتى. جيىنعا قازىعۇرت، ارعىماق، كارل ماركس، قۇرساي، ايكول، اقجار جانە اقتاس-1,2 شاعىن اۋداندارىنان كەلگەن 250-دەن اسا تۇرعىن قاتىستى.
جيىننىڭ بارىسى قالا اكىمدىگىنىڭ الەۋمەتتىك جەلىدەگى رەسمي پاراقشاسى ارقىلى تىكەلەي ەفير جۇرگىزىلدى. باسقوسۋدا باحادىر نارىمبەتوۆ جۇرگىزىپ وتىردى. سونىمەن قاتار، قالا ءماسليحاتىنىڭ دەپۋتاتتارى، قوعامدىق كەڭەس مۇشەلەرى جانە باق وكىلدەرى قاتىستى
قالا اكىمى وتكەن جىلى الەۋمەتتىك-ەكونوميكالىق دامۋى، ەلدى مەكەندەردى اباتتاندىرۋ جانە ينفراقۇرىلىم تارتۋ بويىنشا اتقارىلعان جۇمىستاردى بايانداپ، 2022 جىلعا ارنالعان جوسپارلاردى ايتىپ ءوتتى.
اۋداندا 34 ەلدى مەكەن بار، ونداعى ەڭ وزەكتى ماسەلەنىڭ ءبىرى – ينفراقۇرىلىم. 2021 جىلى 8 ەلدى مەكەن اۋىز سۋمەن قامتىلعان. بيىل قۇرسايدىڭ جاڭاقۇرىلىس اۋماعى مەن ارعىماق شاعىن اۋدانىنا سۋ بەرىلەدى. 2022 جىلى ارعىماق، اقجار، اقتاس-1,2 شاعىن اۋداندارى گازبەن قامتىلسا، قۇرسايدىڭ جاڭا قۇرىلىسىنا 2023 جىلى تابيعي گاز جۇيەسى تارتىلادى.
جىل باسىنان بەرى اۋدان تۇرعىندارى تاراپىنان 374 ماسەلە كوتەرىلگەن. بۇگىندە ونىڭ 78-ءى شەشىلگەن، 249 ماسەلە جىل سوڭىنا دەيىن، 47-ءسى 2025 جىلعا دەيىن شەشىمىن تابادى.
كەزدەسۋ سۇراق-جاۋاپ جانە پىكىر الماسۋ فورماتىنا جالعاستى. تۇرعىندار ينفراقۇرىلىم، جول، قوعامدىق كولىك جانە قوعامدىق قاۋىپسىزدىك جونىندەگى پىكىرىن ورتاعا سالىپ، شەشىلۋ جولى تالقىلاندى.
