توتەنشە جاعدايلار مينيسترلىگىنىڭ حابارلاۋىنشا، 2021-2023 جىلدارعا ارنالعان سۋ تاسقىنىنا قارسى ءىس-شارالاردىڭ جول كارتاسى شەڭبەرىندە 2021 جىلى ىسكە اسىرۋ جوسپارلانعان 68 ىس-شارانىڭ 33-ءى ورىندالدى. اياقتالۋ مەرزىمى 2022-2023 جىلدارعا جوسپارلانعان 4 ءىس-شارا مەرزىمىنەن بۇرىن ورىندالدى، دەپ جازادى "ادىرنا" ۇلتتىق پورتالى.
اتاپ ايتقاندا، 9,4 شاقىرىم وزەن ارنالارى قايتا قۇرىلىپ، 22,2 شاقىرىم تازارتىلدى. 8,2 شاقىرىم قورعانىس بوگەتتەرى سالىنىپ، 8,1 شاقىرىم بوگەتتەردە اعىمداعى جوندەۋ جۇمىستارى جۇرگىزىلدى. ەكى گيدروتەحنيكالىق قۇرىلىس سالىندى. 4 جەرگىلىكتى قۇلاقتاندىرۋ جۇيەسى ورناتىلدى. اۆتوموبيل جولىنىڭ استىنداعى سۋ وتكىزۋ قۇبىرى اۋىستىرىلدى.
بۇدان باسقا، اتالعان ەلدى مەكەندەردى سۋ تاسقىنىنا قارسى قورعاۋ ءۇشىن تجم جەرگىلىكتى اتقارۋشى ورگاندارمەن ىسكە اسىرىلاتىن ەكى نەگىزگى باعدارلامالىق قۇجاتتار شەڭبەرىندە سۋ تاسقىنىنا قارسى جۇمىستاردىڭ ورىندالۋىنا مونيتورينگ بويىنشا جۇمىس جۇرگىزىلۋدە.
"جالپى سۋ تاسقىنىنا قارسى ءىس-شارالار كەشەنىن ىسكە اسىرۋ بارىسىندا 340 ەلدى مەكەننەن سۋ باسۋ قاۋپى جويىلدى. 385 ەلدى مەكەندە قاۋىپ ازايتىلدى. بۇگىنگى كۇنى سۋ تاسقىنى قاۋپى بار 1 010 ەلدى مەكەننىڭ 285-ءى ءۇشىن ىقتيمال قاۋىپ ساقتالۋدا. وتكەن تاۋلىكتە وڭىرلەر اۋماعىندا جەرگىلىكتى اتقارۋشى ورگاندار مەن تجم كۇشتەرى اقمولا، اقتوبە، باتىس قازاقستان، شىعىس قازاقستان، پاۆلودار، تۇركىستان وبلىستارىندا جانە نۇر-سۇلتان قالاسىندا 144 379 م3 ەرىگەن قار سۋىن سورۋ جۇمىستارىن جۇرگىزدى. سونداي-اق اقمولا، باتىس قازاقستان، شىعىس قازاقستان، پاۆلودار، اقتوبە وبلىستارىندا 7 961 ينەرتتى ماتەريال سالىنعان قاپ توسەلدى. باتىس قازاقستان وبلىسىندا 250 م2 القاپتا وزەندەردە مۇز كەسۋ جۇمىستارى جۇرگىزىلدى", - دەلىنگەن حابارلامادا.
باتىس قازاقستان وبلىسىندا اۆاريالىق-قۇتقارۋ جۇمىستارىنا ماڭعىستاۋ جانە اتىراۋ وبلىستارىنىڭ تجد كۇشتەرى مەن قۇرالدارى جەكە قۇرامنان 92 ادام، 13 بىرلىك تەحنيكا، 2 جۇزۋ قۇرالى جانە 6 موتوپومپا جۇمىلدىرىلدى.
قازىرگى ۋاقىتتا باتىس قازاقستان وبلىسىندا سۋ باسقان 53 تۇرعىن ءۇيى مەن اقتوبە وبلىسىندا 57 ساياجاي ءۇيى باقىلاۋدا تۇر.
"وتكەن تاۋلىكتە باتىس قازاقستان جانە اقتوبە وبلىستارىندا 773 ادام ەۆاكۋاتسيالاندى. ولار ۋاقىتشا ەۆاكۋاتسيالاۋ پۋنكتتەرى مەن تۋىستارىنىڭ ۇيلەرىنە ورنالاستىرىلدى. قايتىس بولعان جانە زارداپ شەككەن ادامدار تۋرالى اقپارات تىركەلگەن جوق. تجم «قازاۆياقۇتقارۋ» اق تىكۇشاعىمەن جاقسىباي اۋىلىنان ورال قالاسىنا 2 جۇكتى ايەل جەتكىزىلدى. وتكەن تاۋلىكتە باتىس قازاقستان وبلىسىندا 99 تۇرعىن ءۇيدى، اقتوبە وبلىسىندا 57 ساياجاي ءۇيىن جانە 21 اۋلا اۋماعىن سۋ باستى. اقتوبە وبلىسىنىڭ رەسپۋبليكالىق ماڭىزى بار جولدارىنىڭ 2 ۋچاسكەسىندە، سونداي-اق اقتوبە، قاراعاندى، باتىس قازاقستان جانە اقمولا وبلىستارىنىڭ وبلىستىق جانە جەرگىلىكتى ماڭىزى بار 14 ۋچاسكەسىندە سۋ تاسۋدا",- دەپ حابارلادى مينيسترلىك.
وسى جۇمىستارعا تجم، ءىىم، ۇقك شق، جاو 2 229 ادام، 489 بىرلىك تەحنيكا، 238 سۋ ايداۋ قۇرالى جانە 27 جۇزۋ قۇرالى جۇمىلدىرىلدى. ونىڭ ىشىندە تجم جەكە قۇرامىنان 974 ادام، 117 بىرلىك تەحنيكا، 145 سۋ ايداۋ قۇرالى، 21 جۇزۋ قۇرالى بار.
"ادىرنا" ۇلتتىق پورتالى
