موڭعوليادا جانارماي تۇتىنۋ كولەمىنىڭ ارتۋىنا بايلانىستى يمپورت كوزدەرى كەڭەيتىلدى. ەندى ەل رەسەيمەن قاتار قازاقستان، قىتاي جانە وڭتۇستىك كورەيادان دا ەۋرو-5 ستاندارتىنا ساي جانارماي ساتىپ الىپ جاتىر. بۇل تۋرالى Mongolnow اگەنتتىگى جازدى، دەپ حابارلايدى “ادىرنا”.
موڭعوليا ونەركاسىپ جانە مينەرالدىق رەسۋرستار ءمينيسترىنىڭ ورىنباسارى ب.ءمۋنحتاميردىڭ ايتۋىنشا، رەسەيدەن جانارماي تۇراقتى جەتكىزىلىپ وتىرعانىمەن، ىشكى سۇرانىس جىلدان-جىلعا ءوسىپ كەلەدى. وسىعان بايلانىستى شىلدە ايىندا 47 مىڭ توننا، تامىزدا 67 مىڭ توننا، قىركۇيەكتە 64 مىڭ توننا، قازاندا 57 مىڭ توننا جانارماي يمپورتتالعان. ال قاراشا ايىندا 70 مىڭ توننا جەتكىزۋ جوسپارلانىپ وتىر.
مينيستر ورىنباسارىنىڭ مالىمەتىنشە، قالىپتى كەزەڭدە ەلدە ايىنا شامامەن 70 مىڭ توننا اۆتوموبيل بەنزينى تۇتىنىلادى. جاز مەزگىلىندە بۇل كورسەتكىش 100 مىڭ تونناعا دەيىن جەتەدى.
سوڭعى ءتورت جىلدا موڭعوليادا مۇناي ونىمدەرىن جىلدىق تۇتىنۋ كولەمى 1,7 ميلليون توننادان 3,1 ميلليون تونناعا دەيىن وسكەن. بۇعان ەكونوميكالىق بەلسەندىلىكتىڭ ارتۋى، ءوندىرىس پەن جۇك تاسىمالى كولەمىنىڭ ۇلعايۋى، سونداي-اق اۆتوكولىك يمپورتى مەن ونى پايدالانۋ دەڭگەيىنىڭ ءوسۋى اسەر ەتكەن.
سونىمەن قاتار ەلدە جانارماي جەتكىزۋگە قاتىستى لوگيستيكالىق قيىندىقتار دا بار. مينيستر ورىنباسارى تەمىرجول تسيستەرنالارىنىڭ كەشىگۋىنە جازعى ديزەل وتىنىن قىسقى تۇرىنە اۋىستىرۋ كەزىندەگى تەحنيكالىق قيىندىقتار مەن جانارماي ساقتايتىن قويمالاردىڭ سىيىمدىلىعى شەكتەۋلى بولۋى سەبەپ ەكەنىن اتاپ ءوتتى.
ايتا كەتەيىك، اي-92, ەۋرو-92, اي-95 جانە اي-98 ماركالى بەنزين موڭعولياعا سۇحە-باتور تەمىرجول ستانتسياسى ارقىلى جەتكىزىلەدى. ودان كەيىن باسقا ستانتسيالارعا جونەلتىلىپ، تۇتىنۋشىلارعا تاراتىلادى.
