شىمكەنت قالاسى اكىمىنىڭ ورىنباسارى ەرعالي بىلىسبەكوۆ بۇگىن ازاماتتاردى الەۋمەتتىك ماسەلەلەرى بويىنشا ونلاين رەجيمدە جەكە قابىلدادادى. قابىلداۋدا نەگىزىنەن مۇمكىندىگى شەكتەۋلى بالالاردى قورعاۋ جانە ولارعا قولداۋ كورسەتۋ، سونداي-اق تۇرعىن ۇيمەن قامتۋ جونىندە شاعىمدار ايتىلدى. قالا باسشىسىنىڭ ورىنباسارى حالىقتى تولعاندىرعان وزەكتى ماسەلەلەردىڭ شەشىمىن قاراستىرىپ، ولارعا زاڭ اياسىندا كەڭەس بەردى.
قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ مالىمەتىنشە، قازىرگى تاڭدا شىمكەنت قالاسىندا 36 537 مۇمكىندىگى شەكتەۋلى ازامات تىركەلگەن بولسا، ونىڭ 6418-ءى 18 جاسقا دەيىنگى بالالار. قالادا ورنالاسقان مەديتسينالىق-الەۋمەتتىك مەكەمەلەردە مۇمكىندىگى شەكتەۋلى بالالارعا ارنالعان ارناۋلى الەۋمەتتىك وڭالتۋ جانە ەمدىك شارالار قاراستىرىلعان. سونىمەن قاتار، مۇگەدەكتىگى بار ازاماتتارعا ارنايى جابدىقتالعان «ينۆاتاكسي» جانە ۇلى وتان سوعىس ارداگەرلەرى مەن مۇگەدەكتەرىنە، ءجۇرىپ-تۇرۋى قيىن 1-2-ءشى توپتاعى مۇگەدەكتەرگە ەمدەۋ مەكەمەلەرىنە جانە قوعامدىق ورىندارعا بارۋ ءۇشىن ارنالعان «الەۋمەتتىك تاكسي» قىزمەت كورسەتەدى.
قالا اكىمىنىڭ ورىنباسارى قابىلداۋ بارىسىندا ازاماتتاردىڭ ءوتىنىش-تىلەكتەرىنە ساي ءتيىستى باسقارما باسشىلارىنا بىرقاتار تاپسىرمالاردى جۇكتەپ، ءار ازاماتتىڭ ماسەلەسى باقىلاۋعا الىناتىندىعىن جەتكىزدى.
شىمكەنت قالاسى اكىمىنىڭ ورىنباسارى ە.بىلىسبەكوۆ جەتەكشىلىك ەتەتىن باسقارمالار ءتىزىمى وزگەرگەنىن دە ايتا كەتۋ قاجەت. ەرعالي داۋلەتبەكۇلى قازىرگى تاڭدا تۇرعىن ءۇي، جۇمىسپەن قامتۋ جانە الەۋمەتتىك قورعاۋ، قالالىق ورتا ساپاسى جانە باقىلاۋ، مەملەكەتتىك ەڭبەك ينسپەكتسياسى، مەملەكەتتىك ساتىپ الۋ، قالالىق جايلى ورتانى دامىتۋ باسقارمالارىنا جەتەكشىلىك ەتەدى.
