استانادا 2019 جىلعى شىلدەدەن بەرى ۇلتتىق عىلىمي ونكولوگيا ورتالىعى سالىنىپ جاتىر. نىسان قۇرىلىسى باستالار الدىندا سەناتتا وتكەن جيىندا سول كەزدەگى دەنساۋلىق ساقتاۋ ءمينيسترى ەلجان ءبىرتانوۆ ونكوورتالىقتىڭ قۇرىلىسىنا 70 ملرد تەڭگە جۇمسالاتىنىن ايتقان. الايدا مەملەكەتتىك ساتىپ الۋ پورتالىنداعى دەرەككە نازار سالساق، باستاپقىدا جوسپارلانعان قارجى ەداۋىر كوبەيىپ كەتكەنىن بايقاۋعا بولادى.
قازاقستان ۇكىمەتى جاڭا ونكوورتالىقتى شۆەيتساريالىق «B&A CONTRACTORS SA» كومپانياسى سالادى دەپ شەشىم شىعارعان. سوعان سايكەس، دەنساۋلىق مينيسترلىگى 2019 جىلى 15 شىلدەدە اتالعان كومپانيامەن مەمساتىپ الۋ پورتالى ارقىلى كەلىسىمشارت جاساستى. سول كەزدەن بەرى كەلىسىمشارت 14 رەت وزگەرگەن. بيىلعى 2 ناۋرىزداعى وزگەرىسكە سايكەس، كەلىسىمشارت قۇنى 92 ملرد 960 ملن تەڭگە.
پورتالدا جوبا بيۋدجەتى نە سەبەپتى كوبەيىپ كەتكەنى تۇسىندىرىلمەگەن. جالپى پورتالداعى كەلىسىمشارتتا ونكوورتالىق قۇرىلىسى جايلى تولىق مالىمەت جوق. تەندەردەگى نەگىزگى قۇجات سانالاتىن تەحسيپاتتاما پورتالعا جۇكتەلمەگەن. سوندىقتان دا بولىنگەن قارجى جۇمىس كولەمىنە ساي نە ساي ەمەس ەكەنىن انىقتاۋ مۇمكىن ەمەس.
تاعى ءبىر ەسكەرەتىن جايت، ۇكىمەت جوسپارى بويىنشا جاڭا ونكورتالىق 2021 جىلى اشىلىپ، 2022 جىلى B&A CONTRACTORS SA كومپانياسى استاناداعى ەسكى ونكوورتالىق عيماراتىن قايتا جاڭارتۋعا كىرىسۋى ءتيىس ەدى. الايدا بيلىك «ورتالىق ازياداعى تەڭدەسسىز ونكوورتالىق بولادى» دەپ ماقتاعان نىسان قۇرىلىسى ءالى اياقتالعان جوق.
مەمساتىپ الۋ پورتالىنداعى دەرەككە سۇيەنسەك، دەنساۋلىق ساقتاۋ مينيسترلىگى 2019 جىلدان بەرى مەردىگەر كومپانيا ەسەپشوتىنا 24,5 ملرد تەڭگە اۋدارعان. بىراق اشىق دەرەككوزدەردەگى اقپاراتقا قاراعاندا، شۆەيتساريالىق B&A CONTRACTORS SA كومپانياسى 2014 جىلدان بەرى قازىناعى 32-اق مىڭ تەڭگە سالىق تولەگەن. بۇل شەتەلدىك فيرمانىڭ ەلىمىزدەن جىل سايىن ميللياردتاپ پايدا تاۋىپ وتىرعان ەسكەرسەك، 32 مىڭ تەڭگە عانا سالىق تولەگەنى اقىلعا قونىمسىز.
جالپى استاناداعى ونكوورتالىق شۆەيتساريالىق كومپانيانىڭ قازاقستانداعى العاشقى جۇمىسى ەمەس. ينتەرنەتتەگى اقپاراتقا قاراعاندا، بۇل كومپانيا رەسپۋبليكالىق دياگنوستيكالىق ورتالىقتى، انا مەن بالا ۇلتتىق عىلىمي ورتالىعىن، ۇلتتىق عىلىمي كارديوحيرۋرگيالىق ورتالىعىن، رەسپۋبليكالىق ۆەلوترەكتى، «استانا وپەرا» وپەرا جانە بالەت تەاترىن سالعان. ءتىپتى كەي مالىمەتتەرگە قاراعاندا، شۆەيتساريالىق كومپانيانىڭ اقوردا، سىرتقى ىستەر مينيسترلىگىنىڭ عيماراتى سىندى نىسانداردى سالۋعا دا قاتىسى بار.
دەمەك، B&A CONTRACTORS SA قازاقستان ۇكىمەتىنىڭ ۇزاق جىلدان بەرگى سەرىكتەسى دەۋگە نەگىز بار.
ميات كاشىباي،
Telegram-پاراقشاسىنان
