Astanada 2019 jylǵy shildeden beri Ulttyq ǵylymı onkologııa ortalyǵy salynyp jatyr. Nysan qurylysy bastalar aldynda Senatta ótken jıynda sol kezdegi densaýlyq saqtaý mınıstri Eljan Birtanov onkoortalyqtyń qurylysyna 70 mlrd teńge jumsalatynyn aıtqan. Alaıda memlekettik satyp alý portalyndaǵy derekke nazar salsaq, bastapqyda josparlanǵan qarjy edáýir kóbeıip ketkenin baıqaýǵa bolady.
Qazaqstan úkimeti jańa onkoortalyqty shveıarııalyq «B&A CONTRACTORS SA» kompanııasy salady dep sheshim shyǵarǵan. Soǵan sáıkes, Densaýlyq mınıstrligi 2019 jyly 15 shildede atalǵan kompanııamen memsatyp alý portaly arqyly kelisimshart jasasty. Sol kezden beri kelisimshart 14 ret ózgergen. Bıylǵy 2 naýryzdaǵy ózgeriske sáıkes, kelisimshart quny 92 mlrd 960 mln teńge.
Portalda joba bıýdjeti ne sebepti kóbeıip ketkeni túsindirilmegen. Jalpy portaldaǵy kelisimshartta onkoortalyq qurylysy jaıly tolyq málimet joq. Tenderdegi negizgi qujat sanalatyn tehsıpattama portalǵa júktelmegen. Sondyqtan da bólingen qarjy jumys kólemine saı ne saı emes ekenin anyqtaý múmkin emes.
Taǵy bir eskeretin jaıt, úkimet jospary boıynsha jańa onkortalyq 2021 jyly ashylyp, 2022 jyly B&A CONTRACTORS SA kompanııasy astanadaǵy eski onkoortalyq ǵımaratyn qaıta jańartýǵa kirisýi tıis edi. Alaıda bılik «Ortalyq Azııadaǵy teńdessiz onkoortalyq bolady» dep maqtaǵan nysan qurylysy áli aıaqtalǵan joq.
Memsatyp alý portalyndaǵy derekke súıensek, densaýlyq saqtaý mınıstrligi 2019 jyldan beri merdiger kompanııa esepshotyna 24,5 mlrd teńge aýdarǵan. Biraq ashyq derekkózderdegi aqparatqa qaraǵanda, shveıarııalyq B&A CONTRACTORS SA kompanııasy 2014 jyldan beri qazynaǵy 32-aq myń teńge salyq tólegen. Bul sheteldik fırmanyń elimizden jyl saıyn mıllıardtap paıda taýyp otyrǵan eskersek, 32 myń teńge ǵana salyq tólegeni aqylǵa qonymsyz.
Jalpy astanadaǵy onkoortalyq shveıarııalyq kompanııanyń Qazaqstandaǵy alǵashqy jumysy emes. Internettegi aqparatqa qaraǵanda, bul kompanııa Respýblıkalyq dıagnostıkalyq ortalyqty, Ana men bala ulttyq ǵylymı ortalyǵyn, Ulttyq ǵylymı kardıohırýrgııalyq ortalyǵyn, Respýblıkalyq velotrekti, «Astana opera» opera jáne balet teatryn salǵan. Tipti keı málimetterge qaraǵanda, shveıarııalyq kompanııanyń Aqorda, Syrtqy ister mınıstrliginiń ǵımaraty syndy nysandardy salýǵa da qatysy bar.
Demek, B&A CONTRACTORS SA Qazaqstan úkimetiniń uzaq jyldan bergi seriktesi deýge negiz bar.
Mııat Káshibaı,
Telegram-paraqshasynan
