بۇگىن قالاداعى جول قۇرىلىسىنا قاتىستى قالا اكىمىنىڭ ورىنباسارى ماقسۇت يساحوۆ بۇقارالىق اقپارات قۇرالدارىمەن ءباسپاسوز-بريفينگىن وتكىزدى.
تۇرعىندار اراسىندا قوناەۆ-رىسقۇلوۆ جولايرىعى مەن ا-2 تاس جولى قۇرىلىسى جانە اۋەجاي ماڭىنداعى جاياۋ جۇرگىنشىلەر جولى، ۆەلوجولاق ساپاسىنا قاتىستى ۆيدەولار مەن پىكىرلەر تاراعان بولاتىن.
وسىعان بايلانىستى ماقسۇت پەرنەبايۇلى:
- قوناەۆ داڭعىلى بويىنشا جەراستى جاياۋ جۇرگىنشىلەر وتكەلىن اباتتاندىرۋ جۇمىستارى، سونىمەن قاتار جاڭبىر جانە قار سۋلارىن باعىتتايتىن سۋاعار جۇيەلەرىن ورناتۋ تولىعىمەن اياقتالعان جوق. قازىرگى ۋاقىتتا جەر استى وتكەلىندە جينالعان سۋ سورىلىپ، قالىپقا كەلتىرىلدى. ال اسفالت توسەۋ جۇمىستارى مەردىگەر مەكەمە قاراجاتى ەسەبىنەن جاسالاتىن بولادى. ايتا كەتەيىك، قۇرىلىس جۇمىستارىن جۇرگىزىپ جاتقان «بازيس-ك» جشس-نەن قوناەۆ-رىسقۇلوۆ كوشەلەرى قيىلىسىنداعى جولايرىق ءالى قابىلدانعان جوق. ماۋسىم ايىنىڭ سوڭىنا دەيىن كورسەتىلگەن كەمشىلىكتەر جويىلىپ، قۇرىلىس جۇمىستارى اياقتالاتىن بولادى.
- ال 4,5 شق اەروپورت ۆەلوجولىنداعى 0,6شق جولدىڭ وتىرۋلارى تىكەلەي كارىز جۇيەسىن جاساعان مەردىگەر «ەنساف» جشس تاراپىنان رەتكە كەلتىرىلەتىن بولادى. سەبەبى بۇل مەردىگەر مەكەمە كارىز جۇيەسىن جۇرگىزگەندە لابوراتوريالىق سىنامالارىندا جول سالاتىن جەر قاباتى تىعىزدىعى ساي ەكەنى انىقتالعان. وسى كورسەتكىشتەر نەگىزىندە «كورپاراتسيا بەرەكە» جشس جول قۇرىلىسىن جۇرگىزگەن» -دەپ اتاپ ءوتتى.
جالپى جولاۋشىلار كولىگى جانە اۆتوموبيل جولدارى باسقارماسى تاراپىنان بيىلعى جىلى 141 نىسانعا قۇرىلىس، جوندەۋ جۇمىستارىن اتقارۋ جوسپارلانىپ وتىر:
قۇرىلىس جانە قايتا جاڭارتۋ – 19 نىسان (51,5 شق), ورتاشا جوندەۋ – 121 نىسان (223,8 شق، 291 كوشە), كۇردەلى جوندەۋ – 1 نىسان (19,3 شق).
سونىمەن قاتار، 150 ورىنعا ايالداما ورناتۋ جانە اۋدان اكىمشىلىگى تاراپىنان بەكىتىلگەن كوشەلەرگە شاعال تاس توسەۋ جوسپارلانۋدا.
وتكەن جىلدىڭ ناتيجەسى بويىنشا قالامىزداعى اسفالت جولداردىڭ ۇلەسى 63,6% جەتكەن. اسفالت جول ۇلەسىن 2022 جىلى 67,4%، 2023 جىلى 71,2%، 2024 جىلى 75%، 2025 جىلى 79% جەتكىزۋ جوسپارلانعان.
