شىمكەنتتىك ۇستازدار رەسپۋبليكالىق وليمپيادادا جەڭىمپاز اتاندى. اتىراۋ قالاسىندا 28-30 ناۋرىز ارالىعىندا قر ءبىلىم جانە عىلىم مينيسترلىگى «دارىن» رەسپۋبليكالىق عىلىمي-پراكتيكالىق ورتالىعىنىڭ ۇيىمداستىرۋىمەن ماتەماتيكا ءپانى مۇعالىمدەرىنە ارنالعان ءداستۇرلى «ماتەماتيكالىق رەگاتا» وليمپياداسى ۇيىمداستىرىلدى.
وليمپياداعا ەلىمىزدىڭ بارلىق وڭىرلەرى مەن رەسپۋبليكالىق ءبىلىم بەرۋ ۇيىمدارىنان قۇرامى 4 ادامنان تۇراتىن 20 كوماندا قاتىستى. ۇستازداردىڭ ءبىلىمىن سارالايتىن ءداستۇرلى بايقاۋعا شىمكەنت قالاسىنان كوماندا قاتىستى. شىمقالانىڭ نامىسىن قالالىق كەزەڭنىڭ جەڭىمپازدارى و.جولداسبەكوۆ اتىنداعى №9 IT ليتسەيىنىڭ مۇعالىمى ەن رايسا نيكولاەۆنا ، №1 دارىندى بالالارعا ارنالعان IT ليتسەي-ينتەرناتىنىڭ مۇعالىمى نۇربول ميرزاحمەدوۆ، №90 دابممگ مۇعالىمى ەلدوس ايداربەكوۆ جانە ى. التىنسارين اتىنداعى №65 مەكتەپ-گيمنازياسىنىڭ مۇعالىمى جاقسىلىق ساديروۆ قورعادى.
وليمپيادا ءتورت كەزەڭدى قامتىعان. قاتىسۋشىلارعا ءار كەزەڭ بويىنشا ۇجىمدىق جازباشا شەشۋدى قاجەت ەتەتىن ءۇش تاپسىرما بەرىلگەن. بايقاۋدىڭ بارلىق كەزەڭىندە شىمكەنتتىك ۇستازدار ءبىلىمى مەن تاجىريبەسىن دالەلدەدى. ناتيجەسىندە رەسپۋبليكالىق وليمپيادادا ۇستازدار III ورىندى يەلەنىپ، جەڭىمپاز اتاندى.
