ەلدەگى اگروونەركاسىپتىك كەشەننىڭ ىلگەرى دامۋىنا جان-جاقتى قولداۋ كورسەتىلىپ، جۇيەلى جۇمىستار اتقارىلاتىن بولادى. سايكەسىنشە، كەلەر جىلى سۋبسيديالاۋ جۇيەسى جاڭارتىلىپ، اتالمىش باعىتقا قوسىمشا 388,2 ملرد.تەڭگە قاراستىرىلماق. بۇل تۋرالى قر اۋىلشارۋاشىلىعى ءمينيسترى ەربول قاراشوكەەۆ قاپشاعايدا وتكەن القالى جيىندا مالىمدەدى.
اۋىلشارۋاشىلىعىن دامىتۋ-باسەكەگە قابىلەتتى ەكونوميكا قۇرۋدىڭ نەگىزگى مەحانيزىمى دەگەن تۇجىرىمنىڭ توڭىرەگىندە توپتاسقاندار ۇلكەن وتىرىستا توبە كورسەتتى. بۇل قاتاردا، سەنات دەپۋتاتى اقىلبەك كۇرىشباەۆ پەن ەكولوگيا، گەولوگيا جانە تابيعي رەسۋرستار ءمينيسترىنىڭ ورىنباسارى سەرىك قوجانيازوۆ تا بار.
ال، الماتى وبلىسىنىڭ اكىمى قانات بوزىمباەۆ مودەراتور قىزمەتىن اتقاردى.
شارۋالار ءۇشىن ماڭىزدى، كوكتەمگى دالا جۇمىستارىنىڭ قارساڭىندا وتكەن جينالىستا، سۋ تاپشىلىعى مەن ءتاريفىنىڭ ءوسۋى، اۋىلشارۋاشىلىعىنا قاجەتتى تەحنيكا مەن تاڭايتقىشتاردىڭ باعامىنىڭ ارتۋى سىندى ماسەلەلەر كوتەرىلدى.
ماڭىزدى ءماجىلىستىڭ باستى سپيكەرى، ەربول قاراشوكەەۆ سۋبسيديالاۋ جۇيەسىندەگى جاڭا رەفورما كەلەر جىلدىڭ باسىندا ىسكە قوسىلاتىنىن جەتكىزدى. ال بيىل، ىشكى نارىقتىڭ تۇراقتىلىعىن ساقتاۋ ءۇشىن اگروونەركاسىپتىك كەشەن سالاسىندا سۋبسيديالاۋ وزگەرىسسىز قالادى.
ەستەرىڭىزگە سالامىز، اعىمداعى جىلى اتالمىش سالانى قولداۋعا 309 ملرد.تەڭگە قاراستىرىلعان بولاتىن، ەندى اتالعان سوماعا ۇستەمە 388,2 ملرد.تەڭگە قوسىلماق. بۇل شارا تىكەلەي مەملەكەت باسشىسىنىڭ تاپسىرماسىنىڭ اياسىندا جۇزەگە اسىرىلادى.
ەندىگى كەزەكتە قازىنادان 63 ملرد. تەڭگە اۋىل شارۋاشىلىعى تەحنيكاسىن جاڭارتۋ، سۋلاندىرۋ جۇيەسىن، جىلىجايلار كەشەنىن، ءسۇتتى قايتا وڭدەۋ وبەكتىلەرىن قۇرۋ ءۇشىن ينۆەستيتسيالىق سۋبسيديالاۋعا بولىنگەنىن اتاپ وتكەن ءجون.
ءمينيستردىڭ سوزىنە سەنسەك، بۇرىن كۇشى جويىلعان جۇمىرتقالاردى سۋبسيديالاۋ باعدارلاماسى جالعاسىن تابادى، ال جۇمىرتقا باعىتىنداعى ونەركاسىپتىك قۇس شارۋاشىلىعىنىڭ بارلىق سۋبەكتىلەرى ءۇشىن سۋبسيديالاۋ نورماتيۆتەرى بىردەي بولىپ، 2 ەسەدەن جوعارىلاتىلادى، ياعني ءبىر جۇمىرتقاعا 3 تەڭگەدەن باعالانباق. وسىعان قاراي، بيۋدجەتتەن 7,5 ملرد. تەڭگە بولىنەدى دەپ كۇتىلۋدە.
سۋبسيديالاۋدىڭ جاڭا جۇيەسىنىڭ باستى جاڭالىقتارىنىڭ ءبىرى - تسيفرلىق فورماتقا كوشىرۋ. قازىرگى ۋاقىتتا سۋبسيديالاۋدىڭ بىرىڭعاي مەملەكەتتىك اقپاراتتىق جۇيەسىن ازىرلەۋ اياقتالۋدا.
بۇل دەگەنىمىز - جۇمىس زامانعا ساي جۇرگىزىلىپ، قاعاز باستىلىقتان ارىلىپ، ماسەلەنىڭ ءبىر مەزەتتە شەشىلۋىنە جول سالۋ.
"بۇگىنگى كۇنى باسىم مىندەتتەردىڭ ءبىرى ەگىس ناۋقانىن ۋاقتىلى جانە ساپالى جۇرگىزۋ بولىپ تابىلادى. سونىمەن، قازىرگى تاڭدا تەحنيكا دايىندىعى 96 پايىزدى قۇراسا، كوكتەمگى دالا جۇمىستارى جاپپاي جۇرگىزىلە باستاعان ۋاقىتقا 100 پايىزدى قۇراماق",- دەدى قر اۋىلشارۋاشىلىعى ءمينيسترى ەربول قاراشوكەەۆ.
جالپى، اكىمدىكتەردىڭ مينيستىرلىككە بەرگەن دەرەكتەرى بويىنشا 2022 جىلى جالپى ەگىس كولەمى 23,1 ملن. گەكتاردى قۇرايدى، بۇل 2021 جىلمەن سالىستىرعاندا 125 مىڭ گەكتارعا كوپ.
تۇتاستاي العاندا، كوكتەمگى دالا جۇمىستارىنا دايىندىق ماسەلەسى جوسپارلى تۇردە ءجۇرىپ جاتىر.
القالى جيىندا، ءوڭىر باسشىسى قانات بوزىمباەۆ، "يسلام دامۋ" بانكى ارقىلى ەسكەلدى جانە اقسۋ اۋداندارىنىڭ يرريگاتسيالىق جۇيەلەرىن قالپىنا كەلتىرۋ جۇمىستارى جۇرگىزىلىپ جاتقانىن اتاپ ءوتتى.
وبلىس اكىمى ۇستىمىزدەگى جىلى سۋ ۇنەمدەۋ تەحنولوگياسى الاڭىن 27 مىڭ گەكتارعا جەتكىزۋ قاجەتتىگىن قاداپ ايتتى. ونىڭ ايتۋىنشا، ايماقتا بۇدان باسقا كوپتەگەن جوبالار قايتا تۇزەتۋگە جاتادى ەكەن. باستى سەبەپ - قارجىلاندىرۋدىڭ ۋاقىتىلى جۇزەگە اسپاۋى.
الداعى تاڭدا وسى جانە وزگەدە تۇيىتكىلدى ىستەردىڭ كۇرمەۋى شەشىلمەك. ول ءۇشىن كەلەر بەس جىلدا اگروونەركاسىپتىك كەشەن ونىمدەرىنىڭ يمپورتىن الماستىرۋ جانە ەكسپورتىن دامىتۋ بويىنشا 4,1 ترلن تەڭگە سوماسىنا كەمىندە 582 ينۆەستيتسيالىق جوبانى ىسكە اسىرۋ كوزدەلۋدە.
جاۋاپتىلاردىڭ سوزىنشە، اتالمىش شارالاردى قابىلداۋ اۋىل شارۋاشىلىعى دامۋىنىڭ ورنىقتىلىعىن ارتتىرۋعا مۇمكىندىك بەرەدى.
"ادىرنا" ۇلتتىق پورتالى
