تۇركىستان وبلىسىندا جوعالىپ كەتكەن قىزعا حالىقارالىق ىزدەۋ جاريالاندى

3439
Adyrna.kz Telegram

تۇركىستان وبلىسىندا جوعالىپ كەتكەن قىزعا حالىقارالىق ىزدەۋ جاريالاندى. بۇل تۋرالى وبلىستىق پوليتسيانىڭ ءباسپاسوز قىزمەتى مالىمدەدى، - دەپ حابارلايدى "ادىرنا" ۇلتتىق پورتالى.

ۆەدومستۆونىڭ حابارلاۋىنشا، جوعالعان قىزدىڭ اناسى تۇركىستان وبلىسى ساۋران اۋدانىنىڭ پوليتسيا بولىمىنە جۇگىنگەن. ارىزىندا ول: قىزى اۋرۋحاناعا بارا جاتقانىن ايتىپ، ۇيدەن شىعىپ، حابارسىز كەتكەنىن جازعان.

جوعالعان جاس كەلىنشەكتى جەدەل ىزدەستىرۋ ماقساتىندا تۇركىستان وبلىسى ءىىد تجد باستىعى پوليتسيا گەنەرال-مايورى مۇرات قابدەنوۆ بىرقاتار تاپسىرمالار بەرىپ، بۇل فاكتىنى جەكە باقىلاۋىنا الدى.
قازىرگى ۋاقىتتا تجد باستىعىنىڭ ورىنباسارى پوليتسيا پودپولكوۆنيگى قۇرمانبەك ساحوۆتىڭ جەتەكشىلىگىمەن ءبىر توپ تاجىريبەلى پوليتسيا قىزمەتكەرلەرى جەدەل ىزدەستىرۋ شارالارىن جۇرگىزۋدە. سونداي-اق، ءىىب قالالىق جانە اۋداندىق بولىمشەلەرىنىڭ قىزمەتكەرلەرى ىزدەستىرۋ جۇمىستارىنا جۇمىلدىرىلعان.

"بۇگىنگى تاڭدا جان-جاقتى ىزدەستىرۋ شارالارى جالعاسۋدا. جوعالعان ادامدى تابۋ ءۇشىن بارلىق وبلىستار مەن قالالارعا جاس كەلىنشەكتىڭ بەلگىلەرى مەن فوتوسۋرەتى بار باعدارلار جىبەرىلدى.
تۇركىستان پوليتسياسى قىزدىڭ بارۋى مۇمكىن بارلىق باعىتتارى مەن جەرلەرىن مۇقيات تەكسەرىپ، جەدەل-ىزدەستىرۋ شارالارىن كۇشەيتتى", - دەدى پد.

سونداي-اق، الىنعان اقپارات بويىنشا پوليتسەيلەر تاراز قالاسىنىڭ جاڭا-قورعان اۋدانىنا، شىمكەنت جانە الماتى قالالارىنا باردى، ىزدەۋ جۇمىستارى جۇرگىزىلۋدە.

«قازىر حالىقارالىق ىزدەۋ جاريالاندى. ىزدەۋ جۇمىستارىنا ەرىكتىلەر دە جۇمىلدىرىلدى.جالپى پوليتسيا تابۋ جۇمىستارىن كۇشەيتتى.

جوعالعان نازيم الداشتى امان-ەسەن تاۋىپ، وتباسىنا قايتارۋ ءۇشىن ونىڭ قايدا ەكەنىن كورگەن نەمەسە ونىڭ جۇرگەن جەرى تۋرالى مالىمەتى بار بارلىق كۋاگەرلەردىڭ دەرەۋ پوليتسياعا حابارلاسۋىن سۇرايمىز»، - دەلىنگەن پوليتسيا حابارلاماسىندا.

جوعالعان ايەلدىڭ ۇستىندە اشىق قىزعىلت ءتۇستى كۇرتە، اق سپورتتىق شالبار، اياعىندا قارا تۋفلي بولعان. ايىرىقشا بەلگىلەرى: بويى 165-168 سانتيمەتر، دەنە ءبىتىمى ورتاشا، موينىندا مەڭى بار.

ىزدەۋدەگى ايەلگە قاتىستى قانداي دا ءبىر مالىمەت بولسا، ساۋران ءاىىب-ءنىڭ كەزەكشى بولىمىنە: 8 725 33 5 86 50, 8 747 008 74 80 تەلەفوندارى ارقىلى حابارلاۋىڭىزدى نەمەسە 102 تەلەفونى ارقىلى پوليتسياعا حابارلاۋىڭىزدى سۇرايمىز.

بۇعان دەيىن باق 17 جاستاعى نازىم الداشتىڭ تۇركىستان وبلىسىندا ءىز-ءتۇزسىز جوعالىپ كەتكەنىن جازعان بولاتىن. ءبىر ايدان استام ۋاقىت بۇرىن جۇكتى قىز ۇيدەن شىعىپ، ورالماعان.

"ادىرنا" ۇلتتىق پورتالى

پىكىرلەر