تۇركىستان وبلىسىندا حالىقارالىق ماڭىزى بار تاسجولدىڭ بويىندا ورنالاسقان ءدامحانادان ءورت شىقتى. توتەنشە جاعدايلار مينيسترلىگىنىڭ ماماندارى ءتىلسىز جاۋدى اۋىزدىقتاپ قانا قويماي، ءىرى جارىلىستىڭ الدىن الدى، دەپ حابارلايدى "ادىرنا".
وقيعا 27 جەلتوقسان، سەنبى كۇنى بولعان. تۇركىستان وبلىسى تجد «112» پۋلتىنە الماتى ‒ تەرمەز اۆتوجولىنىڭ بويىنداعى نىساننىڭ ورتەنىپ جاتقانى تۋرالى حابارلاما تۇسكەن.
ءورت سول ساتتە جۇمىس ىستەمەي تۇرعان جول بويىنداعى ءدامحانا عيماراتىندا باستالعان. ءورت ءسوندىرۋ قىزمەتى وقيعا ورنىنا جەتكەندە، عيماراتتى جالىن تولىقتاي شارپىپ ۇلگەرگەنى انىقتالدى.
ءورتتى ءسوندىرۋ بارىسىندا ورتسوندىرۋشىلەر ۇلكەن قاۋىپكە قاراماستان عيمارات ىشىنە كىردى. ولار جالىن قۇشاعىندا قالعان ءدامحانا ىشىنەن سىيىمدىلىعى 50 ليترلىك گاز باللونىن سىرتقا الىپ شىقتى.
بۇل ارەكەت جاعدايدىڭ ودان ءارى ۋشىعۋىنا جول بەرمەدى. ەگەر گاز باللونى جارىلعاندا، زارداپتار بۇدان دا اۋىر بولار ەدى. قۇتقارۋشىلاردىڭ جەدەل ارەكەتىنىڭ ارقاسىندا ىقتيمال جارىلىسقا توسقاۋىل قويىلدى.
توتەنشە جاعداي ماماندارىنىڭ ۇيلەسىمدى جۇمىسىنىڭ ناتيجەسىندە ءورت تولىقتاي ءسوندىرىلدى. وقيعا سالدارىنان زارداپ شەككەندەر مەن قازا تاپقاندار جوق.
قازىرگى ۋاقىتتا ءورتتىڭ نەدەن شىققانى انىقتالىپ جاتىر. ماماندار ءتيىستى ساراپتامالاردى تاعايىندادى.
تجم ازاماتتاردى ءورت قاۋىپسىزدىگى ەرەجەلەرىن قاتاڭ ساقتاۋعا، اسىرەسە نىساندارداعى گاز جابدىقتارى مەن ەلەكتر جەلىلەرىنىڭ كۇيىن ۇنەمى باقىلاپ وتىرۋعا شاقىرادى.
