تۇركيا پرەزيدەنتى رەجەپ تايىپ ەردوعان 24 ناۋرىزدا بريۋسسەلدە وتكەن ءباسپاسوز ءماسليحاتىندا ءسوز سويلەدى، دەپ حابارلايدى "ادىرنا" ۇلتتىق پورتالى.
ەردوعان ءوز سوزىندە رەسەيمەن دە، ۋكراينامەن دە ديپلوماتيالىق قارىم-قاتىناستا ەكەنىن اتاپ ءوتتى.
ء"بىز ەكى تاراپپەن دە ديپلوماتيالىق بايلانىستامىز، بارلىق ۇسىنىستاردى تالقىلاپ، بەيبىتشىلىك ورناتۋعا باعىتتالعان بارلىق باستامالاردى قولدايمىز... تۇركيا ۋكراينانىڭ اۋماقتىق تۇتاستىعى مەن ەگەمەندىگىن قولدايدى. 2014 جىلدان باستاپ ءبىزدىڭ ەلىمىز ۋكراينا حالقى مەن ۇكىمەتىنە تولىق قولداۋ كورسەتىپ كەلەدى. ءبىز قىرىمدى وككۋپاتسيالاۋدى مويىندامايمىز جانە كەز-كەلگەن جاعدايدا ءوز پوزيتسيامىزدى قايتالايمىز... رەسەي مەن ۋكراينا-ءبىزدىڭ كورشىلەرىمىز. ءبىزدىڭ ۋكراينامەن قارىم-قاتىناسىمىزدىڭ ۇزاق تاريحى بار، ولار كوپجاقتى ىنتىماقتاستىققا نەگىزدەلگەن جانە ستراتەگيالىق سەرىكتەستىككە قول جەتكىزدى. رەسەيمەن قاتىناستار ءوزارا قاۋىپسىزدىك جانە ديالوگ قاعيداتتارىنا نەگىزدەلگەن", - دەدى تۇركيا پرەزيدەنتى.
ەردوعان الداعى ۋاقىتتا سوعىس قيمىلدارىن توقتاتۋعا بارىنشا قامداناتىنىن اتاپ ءوتتى.
"تۇركيا 11 جىل بويى سيريا سوعىسىنىڭ اۋىرتپالىعىن جالعىز ءوزى كوتەرىپ كەلەدى. ءبىز اسكەري قاقتىعىستار ناتيجەسىندە تۋىندايتىن گۋمانيتارلىق پروبلەمالاردى جاقسى بىلەمىز. وسى سەبەپتى تۇرىك ديپلوماتياسىنىڭ ءبىرىنشى مىندەتى – سوعىس قيمىلدارىن توقتاتۋ. ۋكرايناداعى بەيبىتشىلىك ەكى ەل مەن الەمدىك قاۋىمداستىققا سايكەس كەلەتىن فورمۋلا بويىنشا قامتاماسىز ەتىلۋى كەرەك. بۇل تۇراقتى جانە بەرىك بەيبىتشىلىك بولۋى كەرەك... ءبىز 63 مىڭنان استام بەيبىت تۇرعىنداردى سوعىس ءجۇرىپ جاتقان ايماقتاردان قانسىز كوشىرۋگە قول جەتكىزدىك. تۇركيا ازاماتتارىنىڭ نەگىزگى قاجەتتىلىكتەرى ءۇشىن گۋمانيتارلىق كومەكپەن بىرگە 56 جۇك كولىگىن جىبەردى. ءبىز 60 مىڭنان استام ۋكراينا ازاماتىن قابىلداپ، وزىمىزگە پانالاتتىق. ەقىۇ-نىڭ ۋكرايناداعى باقىلاۋ ميسسياسىنىڭ 142 مۇشەسى ستامبۋل ارقىلى ەۆاكۋاتسيالاندى. تۇركيا سوڭعى 8 جىلدا 5 ميلليون بوسقىندى قابىلدادى، بۇل الەمدەگى كەز كەلگەن ەلدە قاراعاندا كوپ. تۇركيا بەلسەندى جانە ءپرينتسيپتى ساياسات ۇستانۋدا. ءبىزدىڭ ساياساتىمىزدىڭ باستى شارتى – ناتو اياسىنداعى ەۋرو-اتلانتيكالىق كەڭىستىكتىڭ قاۋىپسىزدىگى... ءبىز ناتو سامميتىندە قابىلدانعان شەشىمدەردىڭ ءۇشىنشى ەلدەرگە قارسى باعىتتالماعانىن، ەشكىمدى قورقىتپايتىنىمىزدى بارلىق ەلدەرگە جەتكىزۋگە مىندەتتىمىز", - دەپ مالىمدەدى رەجەپ تايىپ ەردوعان.
سونىمەن قاتار ول ۋكرايناداعى اسكەري قاقتىعىستار الەمدىك ءتارتىپتىڭ، حالىقارالىق قۇقىقتىڭ تيىمسىزدىگىن كورسەتكەنىنە توقتالدى.
ء"بىزدىڭ كۇش-جىگەرىمىز الەمدەگى قاۋىپسىزدىكتى قامتاماسىز ەتۋگە قىزمەت ەتەدى. تۇركيا اليانستىڭ قاعيدالارىنا ادال جانە ونى سوزبەن ەمەس، ءىس جۇزىندە كورسەتۋدە. ءبىزدىڭ اسكەري ونەركاسىبىمىز ساپالى جاڭا دەڭگەيگە كوتەرىلدى، بۇل اسكەري الەۋەتتىڭ كەڭەيگەنىن كورسەتەدى. ءبىزدىڭ كەيبىر ارىپتەستەرىمىز ەنگىزگەن اسكەري ونەركاسىبىمىزگە قاتىستى شەكتەۋلەردى الىپ تاستايتىن كەز كەلدى... سيرياداعى، ليۆياداعى، يەمەندەگى، ال قازىر ۋكرايناداعى اسكەري قاقتىعىستار الەمدىك ءتارتىپتىڭ، حالىقارالىق قۇقىقتىڭ سىنعىشتىعى مەن تيىمسىزدىگىن تاعى ءبىر رەت ايعاقتايدى. بۇل بۇۇ-دا، ونى قاداعالايتىن ۇيىمدا ءجيى بايقالادى. جاھاندىق قاۋىپسىزدىك ارحيتەكتۋراسى، ونىڭ ىشىندە بۇۇ قاۋىپسىزدىك كەڭەسى ماڭىزدى رەفورمالاردى قاجەت ەتەدى", - دەپ تولىقتىردى ءسوزىن تۇركيا باسشىسى.
"ادىرنا" ۇلتتىق پورتالى
