ناۋرىز شىمكەنتتەن باستالادى

883

قازاقى ناقىشتا بەزەندىرىلگەن اقشاڭقان كيىز ۇيلەر، ۇلتتىق كيىم كيىپ، جۇزدەرىندە كۇلكى ويناعان قۋانىشتى جاندار، شارىقتاعان ءان مەن كۇي جانە قازاقتىڭ ۇلتتىق تاعامدارى قويىلعان اق داستارحان... وسىنىڭ ءبارى شىمكەنتتەگى ناۋرىز تويىنىڭ ءسان-سالتاناتىن كىرگىزىپ تۇر.

ءيا، بيىل شىمكەنتتە ناۋرىز جوعارى دەڭگەيدە ۇيىمداستىرىلىپ، شىن مانىندەگى جالپىحالىقتىق مەيرامعا اينالدى. ۇلىستىڭ ۇلى كۇنىنە وراي، ءۇشىنشى مەگاپوليستە 10 جەردە مەرەكەلىك باعدارلامالار ءوتىپ، تۇرعىندار مەن قالا قوناقتارىنا كوتەرىڭكى كوڭىل-كۇي سىيلادى.

«ناۋرىز-دۋمان» اتتى مەرەكەلىك شارا «شىمقالا» ەتنواۋىلىنان باستاۋ الدى. تاريحي كەشەندە وتكەن شاراعا قالا اكىمى مۇرات ايتەنوۆ قاتىسىپ، تۇرعىنداردى ۇلىستىڭ ۇلى كۇنىمەن قۇتتىقتادى.

— عاسىرلار قويناۋىنان جەتكەن ۇلىستىڭ ۇلى كۇنى، جىل باسى – تابيعاتتىڭ عانا ەمەس، ادامزات رۋحىنىڭ دا جاڭارۋىنىڭ بەلگىسى. بۇل مەيرام بارشامىزدى بىرلىك پەن تاتۋلىققا شاقىرىپ، ورتاق ىسكە جۇمىلدىرادى. ناۋرىز – شىمكەنتتەن باستاۋ الادى. ءداستۇرلى مەرەكەمىزگە باسىمدىق بەرۋ ماقساتىندا ناۋرىز ايىنىڭ ءاربىر كۇنىن ەرەكشە اتاپ ءوتۋدى قولعا الدىق. وسىلايشا ۇلتتىق قازىنامىز بەن تاريحي قۇندىلىقتارىمىز، حالقىمىزدىڭ سالت-ءداستۇرى دارىپتەلۋدە. ەلىمىزدى شۋاعىنا بولەگەن ۇلىستىڭ ۇلى كۇنى ءار شاڭىراققا مەرەيلى شاتتىق، مول ىرىس پەن مىزعىماس ىنتىماق سىيلاسىن، — دەدى مۇرات دۇيسەنبەكۇلى.

مەرەكەدە رەسپۋبليكاعا تانىمال ەسترادا ءانشىسى ايگۇل يمانباەۆا مەن «حازار» ۇلتتىق-فولكلورلىق توبى جانە ءداستۇرلى ونەردىڭ كورنەكتى وكىلدەرى اننەن شاشۋ شاشتى.


ناۋرىز كۇنى شىمكەنتتىڭ ورتالىق ساياباعىنا كوپ حالىق جينالدى. بۇل جەردە ءال-فارابي اۋدانى اكىمدىگى، قالالىق باسقارمالار مەن وزگە دە مەكەمەلەر كيىز ءۇي تىگىپ، قوناقتارعا ناۋرىز كوجە مەن ۇلتتىق تاعامداردى ۇسىندى. قالا اكىمى بىرنەشە كيىز ءۇيدى ارالاپ، كوپشىلىكتى مەرەكەمەن قۇتتىقتادى.

ورتالىق ساياباققا كەلگەن تۇرعىندار كىر تاسىن كوتەرۋ، لاڭگى، ارقان تارتۋ جانە وزگە دە ۇلتتىق سپورت تۇرلەرى مەن ويىندار بويىنشا وتكەن سايىستاردى تاماشالادى.

شاھار باسشىسى اتالعان ەكى مەرەكەلىك شارادا دا ءتاي-ءتاي باسقان سابيلەردىڭ تۇساۋىن كەسىپ، ولارعا اق جول تىلەدى.

ناۋرىز تويىن جوعارى دەڭگەيدە تويلاۋعا شىمكەنت قالالىق قازاقستان حالقى اسسامبلەياسى مەن ەتنومادەني بىرلەستىكتەر دە ءوز ۇلەستەرىن قوستى.

اسسامبلەيا عيماراتىنىڭ الدىنا كيز ءۇي تىگىلىپ، داستارحان جايىلدى. ال، قۇرمەتتى قوناقتار مەن قالا تۇرعىندارى ەتنومادەني بىرلەستىك وكىلدەرىنىڭ «ارمىسىڭ، ءاز-ناۋرىز!» اتتى سالتاناتتى كونتسەرتىن تاماشالادى. وندا ءارتۇرلى ەتنوس وكىلدەر ءوز ونەرلەرىن ورتاعا سالدى.

قوناقتار مەرەكەلىك داستارحاننان ءدام الىپ، قالا تۇرعىندارىنا ناۋرىز كوجە مەن باۋىرساق ۇسىنىلدى. وسىلايشا، ۇلىستىڭ ۇلى كۇنىندە باۋىرمالدىق پەن قوناقجايلىقتىڭ جارقىن ۇلگىسى دارىپتەلدى.

مۇنان بولەك، شىمكەنتتەگى ارباتتا قولونەر بۇيىمدارىنىڭ جارمەڭكەسى ۇيىمداستىرىلسا، ءال-فارابي الاڭىندا مارجان اراپباەۆا، تۇرار راحىمبەرلين، اقەركە تاجىباەۆا سىندى وتاندىق ەسترادا جۇلدىزدارى ونەر كورسەتتى. جينالعان جۇرت ناۋرىز كوجەدەن ءدام تاتتى.

ناۋرىز مەرەكەسىنە وراي دەندروساياباقتا تالانتتى جاستاردىڭ قاتىسۋىمەن ءتۇرلى بايقاۋلار مەن ينتەراكتيۆتى ەكو-باعدارلامالار ۇيىمداستىرىلدى.

«شىمكەنت تسيركتىڭ» الدىنا جينالعان كوپشىلىك تسيرك ارتىستەرى مەن سايقىمازاقتاردىڭ جانە اكروباتتاردىڭ ونەرىن تاماشالاۋ مۇمكىندىگىنە يە بولدى.

سونىمەن قاتار جەڭىس، مەتالۋرگتەر ساياباقتارىندا جانە قاجىمۇقان اتىنداعى ورتالىق ستاديوننىڭ الدىندا مەرەكەلىك ءىس-شارلار ءوتىپ، قالا تۇرعىندارىنا كوتەرىڭكى كوڭىل كۇي تارتۋ ەتتى.

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket