«رۋحاني جاڭعىرۋ – ۇلتتىق جوبا»، «ونىڭ اۆتورى – ەلباسى ن.ءا.نازارباەۆ»، «جوبا 2017 جىلى جاسالدى» دەگەن سەكىلدى بازالىق اقپاراتتار بارىمىزگە بەلگىلى. ويتكەنى سول جىلدارى ەلباسىنىڭ ماقالاسى عالامتور جەلىسىنە شىققان كەزدە، تالاسىپ وقىدىق. وعان سەبەپ – جاڭاشىلدىققا ۇمتىلىس پەن جاڭا قازاقستاندى جاساۋعا دەگەن سەنىم بولدى. ويلاعانىمىزداي، ماقالا جەلىدە جاريالانعان سوڭ ىزىنشە ءتۇرلى جوبالار جۇزەگە اسا باستادى. ءبىرى – تىلگە قاتىستى بولسا، ەندى ءبىرى – جەرگە، تۇلعالىق دامۋ مەن جاستارعا كىتاپ وقىتقىزۋ، قازاقشا اۋدارمانى قالىپتاستىرۋ مەن حالىقتى رۋحاني بايىتۋ بولدى. ءيا، وسى سەكىلدى ۇلتتىق مۇددەنى دامىتۋعا ارنالعان ءتۇرلى جوبالار بار. ستۋدەنت بولعان سوڭ با، ونى كوزىمىزبەن دە، جەلىدەن دە كوردىك. دەسە دە ءالى كۇنگە دەيىن باعدارلامانىڭ تولىقتاي ماعىناسىن تۇسىنبەي جۇرگەندەيمىز. سول باعدارلاما اياسىندا ۇيىمداستىرىلىپ جاتقان جوبالاردى سىنايتىندار دا تابىلادى.
ايتا كەتۋ كەرەك، ارادا 5 جىل وتسە دە ءدال وسى «رۋحاني جاڭعىرۋ» جوباسىنىڭ وزەكتىلىگى جوعالعان جوق دەپ ويلايمىز. ونى ساياساتكەرلەر مەن ەرەسەك ادامدار تالداپ، ءبىرى دۇرىس قابىلداپ، ەندى ءبىرى كەرىسىنشە پىكىر بىلدىرۋدە. بۇگىنگى جاستار «رۋحاني جاڭعىرۋ» باعدارلاماسى تۋرالى نە دەيدى؟ وسى ورايدا باعدارلامانىڭ ماعىناسىن ودان سايىن اشا ءتۇسۋ ءۇشىن جاستاردىڭ پىكىرىن سۇراپ بىلدىك. «ادىرنا» ۇلتتىق پورتالىنىڭ ءجۋرناليسى جاستاردىڭ جوبا تۋرالى پىكىرىن نازارلارىڭىزعا ۇسىنادى.
دايانا دارىبەكقىزىنىڭ ايتۋىنشا، ول ءۇشىن بۇل جەردەگى ەڭ باستى قاعيدا –ەلباسىنىڭ «بولاشاق جاستاردىڭ قولىندا» دەگەن ءسوزى بولعان. ول باعدارلاما اياسىندا ۇيىمداستىرىلعان جوبالاردى تالداي كەلە، بولاشاق جاستاردىڭ قولىندا ەكەنىن ءوزى ارقىلى جەتكىزە الدى.
«رۋحاني جاڭعىرۋ» باعدارلاماسى ەلباسىنىڭ وسىدان 5 جىل بۇرىن جارىق كورگەن ماقالاسى نەگىزىندە جاسالعان. بىزگە «بولاشاققا باعدار: رۋحاني جاڭعىرۋ» ماقالاسى ارقىلى تانىلدى. بۇل ءسوزدىڭ ماعىناسىنا زەر سالىپ قاراساق. ءاربىر ادامنىڭ ءوزىنىڭ ىشكى مەنى مەن ىشكى رۋحى بولادى. ياعني ءاربىر ادام وزىنەن باستاپ رۋحىن جىگەرلەندىرىپ، جاڭعىرا بىلسە، سول ارقىلى ۇلتتىق دەڭگەيگە جەتەر ەدى. بۇل باعدارلامانىڭ ماقساتى نەدە؟
جوبا جاڭا دۇنيەلەر مەن باسقا دا نەگىزگى ماسەلەلەردەن قۇرالعان. ونىڭ ىشىندە بارشامىزعا بەلگىلى قازاق ءتىلىنىڭ لاتىن الىپبيىنە كوشۋى بار. ول ەندى 100% جۇزەگە اسپاسا دا، قازىرگى تاڭدا كوپتەگەن جاستاردىڭ الەۋمەتتىك جەلىلەردەگى پاراقشالارىنان لاتىن الىپبيىندە جازىلعان ماقالالاردى نەمەسە ءوز ويلارىن وقىپ جاتامىز. ودان بولەك زاماناۋي مۋزىكالىق توپتار اۋەندەرىنىڭ اتىن، ماتىندەرىندەگى كەيبىر سوزدەردى، ۆيدەوروليكتەرىندەگى نەگىزگى ەلەمەنتتەردى وسى لاتىن الىپبيىندە ۇسىنىپ ءجۇر. بۇل، ارينە، قۋانتادى. حالىق تا جاقسى ويمەن قابىلدايتىن بولعان.
ودان كەيىن «الەمدەگى دامىعان 30 ەلدىڭ قاتارىنا ەنۋ». وسى ماقساتتا جۇمىستار جاسالىپ تا جاتىر، جاسالادى دا. «قازاق تىلىندەگى 100 جاڭا وقۋلىق» جوباسىن دا ايتىپ وتۋگە بولادى. وسى جوبانىڭ ارقاسىندا كىتاپتار قازاق تىلىنە اۋدارىلىپ، وقىرمانىمەن قاۋىشتى. ونىڭ ىشىندە فيلوسوفيا، جۋرناليستيكا، مادەنيەتتانۋ، پسيحولوگيا، الەۋمەتتانۋ سىندى باعىتتارداعى ءتۇرلى كىتاپتار بار.
سونىمەن قاتار «قازاقستاننىڭ 100 جاڭا ەسىمى» باعدارلاماسىن دا ايتا كەتۋ كەرەك. بۇل جەردە ەلىمىزدىڭ تۇكپىر-تۇكپىرىنەن ءارتۇرلى جاستاعى، ءارتۇرلى ۇلت وكىلدەرى اراسىنان حالىققا ۇلگى بولارلىق تۇلعالاردى بارشا جۇرتقا تانىستىرادى. بىزدە ونداي ادامدار كوپ ەكەنى بەلگىلى. ءدال وسى جوبانىڭ ارقاسىندا بىرقاتار مامان يەلەرىن تاني الدىق. ولار دا وزدەرىنە ارتىلعان جاۋاپكەرشىلىكتى سەزىندى، ماماندىقتارىنىڭ حالىق اراسىندا جانە ۇلت ءۇشىن قانشالىقتى ماڭىزدى ەكەنىن ءتۇسىندى. «قازاقستاننىڭ كيەلى گەوگرافياسى» دەگەن دە بار. تىزبەكتەپ ايتا بەرسەك، ۇيىمداستىرىلعان جوبا كوپ ەكەن.
مەن ءۇشىن بۇل جەردەگى ەڭ باستى قاعيدا، ەلباسى ايتقان ءبىر ءسوز بولدى. ول «بولاشاق جاستاردىڭ قولىندا» دەگەن بولاتىن. بولاشاق راسىمەن دە اركىمنىڭ ءوزىنىڭ رۋحاني جاڭعىرۋىنان باستاۋ الادى جانە بولاشاق ءبىزدىڭ، جاستاردىڭ قولىندا. كەزىندە ماعجان دا بىزگە «مەن جاستارعا سەنەمىن» دەپ بەكەرگە سەنىم ارتقان جوق. سۇلتانماحمۇت تا «قاراڭعى قازاق كوگىنە ورمەلەپ شىعىپ، كۇن بولىڭدار» دەپ جاي ۇندەۋ جاسامادى. ءبىز جاۋاپكەرشىلىكتى موينىمىزعا الا ءبىلۋىمىز كەرەك. سول كەزدە عانا وسى سەكىلدى باعدارالامالار ەل ىشىندە كەڭىنەن تارالىپ، ماعىناسى تۇسىنىكتى بولادى»، – دەيدى ول.
ال كەلەسى كەيىپكەرىمىز بۇل جوبا قازاقتىڭ بىرلىگىن نىعايتۋ ءۇشىن ءارى رۋحىن ۇشتاپ، العا جەتەلەۋ ءۇشىن جاسالعان دەپ ەسەپتەيدى. ونىڭ ويىنشا، قازاقستان وسىنداي جوبالار ارقىلى دامۋى كەرەك.
«رۋحاني جاڭعىرۋ» باعدارلاماسىن ەلباسىمىزدىڭ كەمەڭگەرلىگىمەن ءارى ىزدەنىمپازدىعىمەن جاسالعان ۇلى جوبا دەپ بىلەمىن. ايتا كەتەيىك، «بولاشاققا باعدار-رۋحاني جاڭعىرۋ» ماقالاسىنىڭ نەگىزىندە «رۋحاني جاڭعىرۋ» باعدارلاماسى دۇنيەگە كەلگەندەي. ءدال وسى ءبىر عانا باعدارلاما اياسىندا 5 جىلدان بەرى كوپتەگەن ۇلى جوبالار ىسكە اسىپ جاتقانىن ءوزىڭىز دە بىلەتىن شىعارسىز. بارلىعى دا قازاقتىڭ بىرلىگى ءۇشىن جاسالىپ وتىرعان بەرەكەلى ءىس دەپ ويلايمىن. نەگىزىندە قازاقستاننىڭ ەكونوميكاسى ءوسىپ قانا قويماي، رۋحاني تۇردە دە جاڭعىرۋعا ءتيىس. بۇل قازاق ءۇشىن ۇتىمدى ءارى ويلى قاعيداعا اينالارى انىق»، – دەيدى ءمولدىر ابيەۆا.
جاستار اراسىندا بۇل جوبانى تۇسىنبەگەندەر بولعانىمەن، تۇسىنگەندەرىنىڭ كوپ ەكەنى بايقالادى. ويتكەنى پىكىر ايتىپ جاتقاندا ولاردىڭ تالداۋ جانە زەرتتەۋ قابىلەتتەرى كورىندى. وسى ورايدا دۋلاتبەك كەنجەبەك تە جوبا تۋرالى ويىن ايتىپ، ءىزىن تاريحپەن جالعادى. ماقالا جازعاننان بولەك، ءتۇسىندىرۋ شارالارى تۋرالى دا ءسوز قوزعادى.
«رۋحاني جاڭعىرۋ» جايلى ەستىمەگەن ەلدىڭ بالاسى جوق شىعار. بارلىعىنا قاڭسىق بولعان دۇنيەنى تاڭسىق قىلىپ جازىپ وتقان جاراماس. ءيا، رۋحاني جاڭعىرۋ ەشقانداي زاڭناما مەن جوبالارسىز-اق تۇران دالانىڭ كەز كەلگەن پەرزەنتىنە كەرەك. رۋحىمىزعا جاڭعىرۋدان الدىن جان كىرگەنى ابزالىراق. ءالسىز، رەسۋرسقا ءزارۋ رۋح ەشقانداي دا قوعامعا پايداسىن تيگىزبەسى حاق. حالىقتىڭ دا رۋحىن كەمەل كۇشتەرگە سۇيەنە وتىرىپ جانىن كىرگىزىپ، رۋحىن وياتۋ كەرەك. ونىڭ الدىمەن قارىنىن تويعىزىپ، ءال-اۋقاتىن كوتەرىپ، جىگەرىن تاسىتىپ، قاناتىن قومداۋ كەرەك. سول كەزدە رۋحى جاڭعىرادى. حالىقتىڭ تۇرمىسى تۇزەلمەي تۇراقتىلىققا بوي الدىرا المايدى.
سول ىسپەتتى «ۇلى دالانىڭ جەتى قىرى»، «رۋحاني جاڭعىرۋ» سىندى ماقالالار جالپى حالىققا، جاستارعا ءجون سىلتەۋ، قاجەتتىلىكتەرىن وتەۋ سىندى جۇمىستاردى اتقارعان. سونىمەن قاتار بۇل ماقالالار اياسىندا شارالار مەن جوبالار وتكىزىلگەن. ءيا، بىراق رۋحتىڭ جوعىن جوقتايتىن، بارىن بارلايتىن قۇندىلىق قايسى؟
زامانا كوشكەلى بەرى قازاقتىڭ رۋحىن بۇعاۋلاپ، جۇلىنىن باسىپ، تىنىسىن توسىپ، تۇمسىعىنا مۇرىندىق بولعان سولاقاي ساياساتتارعا تاريح كۋا. ارينە، رۋحىمىز جانىشتالدى، بىراق سىنبادى. سول جۋاننىڭ جىڭىشكەرىپ، جىڭىشكەنىڭ ۇزىلەر شاعىنداعى رۋحىمىزدىڭ يممۋنيتەتىن بار جوعى جازىلعان ەكى ماقالا كوتەرە الا ما؟ ارينە، جوق.
زامانا تاقتايشاسىنا باسىلعان بەس ەلى باعىمىز، بەس ەلى سورىمىز بار. سونى وسى الاقانداي ەكى دۇنيە پاراسات پايمىمىزدان وتكىزە الا ما؟ رۋحاني جاڭعىرۋ دەگەن – اتويلاپ توي جاساپ، دۇبىرلەتىپ دۋمانداتۋ ەمەس. رۋحاني جاڭعىرۋ –بابالار رۋحىنا تاعزىم، وتكەن تاريحقا ءۇڭىلۋ، بۇرىن ىستەگەن قاتەلىكتى كەلەسىدە قولدانباۋ. سونىمەن قاتار باردى باعالاۋ، قاساڭ قاعيدالاردى جاڭعىرتۋ جانە جۇرت بولىپ قالىپتاسۋ جولىنىڭ داڭعىل باعىتىن ايشىقتاۋ»، – دەيدى ول.
تاعى ءبىر كەيپكەرىمىزدىڭ سوزىنشە، «ۇلت – جاڭعىرۋ»، «جاڭعىرۋ – ۇلت» دەگەن ەگىز ۇعىم. ۇلت جاڭعىرسا، داميدى، ال جاڭعىرۋ ۇلتتىق دەڭگەيدە بولسا، تۇتاستاي وزگەرىس ورىن الماق.
«رۋحاني جاڭعىرۋ» دەگەن – ءار ۇلتتىڭ وي-ساناسىنىڭ قايتادان جاڭعىرۋى، جاڭارۋى. مىسالى، قازاق حالقىنىڭ رۋحاني جاڭعىرۋىنا كەلسەك. ول – باياعىدان كەلە جاتقان سالت-ءداستۇرىمىزدى جاڭعىرتۋ، ءتىلىمىزدى بايىتۋ، تاۋەلسىزدىگىمىزدى ساقتاپ تۇرۋ، قازاق جاستارىن وتاندى سۇيۋگە شاقىرۋ دەپ ويلايمىن. رۋح دەگەن ءسوزدى ەستىسەك، بەيسانالى تۇردە كوز الدىمىزعا قابانباي، بوگەنبەي سىندى باتىرلار ەلەستەيدى. ولاردىڭ حالىققا بەرەتىنى دە سول – رۋح بولىپ تۇر. رۋح، ۇلتقا دەگەن ماحاببات بار جەردە ول حالىق سەنىمدى بولادى دەگەن پىكىرىم بار. رۋحى مىقتى دەپ كەشەگىنىڭ باتىرلارىن عانا ەمەس، بۇگىنگى ەلىم دەپ ميتينگىگە شىقپاسا دا، جاستاردى تاربيەلەپ جۇرگەن ۇستازدار مەن پاندەميا كەزىندە ءومىرىن بايگەگە تىكسە دە، حالىقتىڭ بولاشاعىن ويلاعان دارىگەرلەردى ايتا الامىن. ايتا كەتۋ كەرەك، «رۋحاني جاڭعىرۋ» باعدارلاماسى بۇگىندە ەلىمىزدەگى بىرقاتار وزگەرىستەردىڭ بولۋىنا سەبەپ بولىپ وتىر. ونى تۇسىنە جانە زەرتتەي ءبىلۋىمىز كەرەك. شىندىعىنا كەلگەندە بۇل باعدارلامانى جوققا شىعارۋدىڭ قاجەتى جوق»، – دەيدى گۇلزات ساكەنوۆا.
ماعجان سماعۇل دا بۇل باعدارلامانى كوپشىلىككە پايدالى دەپ ەسەپتەيتىنىن جانە جۇزەگە اسىرىلىپ جاتقان ماقالاداعى مىندەتتەر تۋرالى ايتىپ ءوتتى.
«مەن مەملەكەت باسشىسىنىڭ حالىققا ارنايتىن جىل سايىنعى جولداۋلارى مەن جاريالايتىن ماقالالارىن نازاردان تىس قالدىرماۋعا تىرىسامىن. بالكىم، بۇعان مەنىڭ بولاشاق ماماندىعىم دا ءوزىنىڭ جاناما ىقپالىن تيگىزىپ تۇرعان شىعار. «رۋحاني جاڭعىرۋ» تۋرالى 2017 جىلعى 12 ساۋىردە اقپارات پورتالدارىنان ەستىدىم. ءوز باسىم «رۋحاني جاڭعىرۋدى» سانانىڭ جاڭارۋى دەپ تۇسىنەم. قوعام ءۇشىن، اينالامىزداعى قالىڭ جۇرتشىلىق ءۇشىن باعدارلامانىڭ پايداسى كوپ دەر ەدىم.
ماقالادا ايتىلعان مىندەتتەردىڭ جۇزەگە اسىرىلعانى بار جانە جۇزەگە اسىرىلىپ كەلە جاتقانى بار. سولاردىڭ اراسىنان قازاق ءتىلى ءالىپبيىن لاتىن گرافيكاسىنا كوشىرۋ، گۋمانيتارلىق باعىتتاعى الەمنىڭ ماڭدايالدى 100 كىتابىن قازاق تىلىنە اۋدارۋ، ەل دامۋىنا ۇلەس قوسقان ازاماتتارىمىزدى جۇرتشىلىققا تانىتاتىن «100 جاڭا ەسىم» جوبالارىن ايرىقشا اتاپ وتكىم كەلەدى. ارقايسىسىن جەكە الىپ قارايتىن بولساڭ، ءار جوبانىڭ ارقالاعان ۇلكەن جاۋاپكەرشىلىگى مەن ماڭىزىن بايقاۋعا بولادى. باعدارلاما ءوز الدىنا قويعان ماقساتىنا جەتەدى دەپ سەنەمىن. ويتكەنى «رۋحاني جاڭعىرۋ» قازاقتىڭ جوعىن تۇگەلدەپ، ساناسىن جاڭعىرتىپ، دامىتۋدى قاعيدا تۇتقان باعدارلاما»، – دەيدى ول.
بۇدان بولەك كەزەكتى كەيىپكەرىمىز جوبانىڭ باعىتتارىنا تولىقتاي توقتالىپ ءوتتى. ول باعىتتاردى جاي عانا ايتىپ قويماي، مىسالدارمەن، «100 جاڭا وقۋلىق»، «دومبىرا party» دەگەن سەكىلدى كىشىگىرىم جوبالاردى سيپاتتاپ وتىرىپ ءتۇسىندىردى. بۇدان شىعاتىن قورىتىندى – باعدارلامانىڭ ءار باعىتى باستان اياق ۇيىمداستىرىلعان جانە ونىڭ پايدالى بولاتىنى دا انىق.
«رۋحاني جاڭعىرۋ» باعدارلاماسى قولعا الىنعالى باعدارلاما اياسىندا بىرقاتار جۇمىس جۇزەگە استى دەپ ايتۋعا تولىقتاي نەگىز بار. باعدارلاما بارىسىندا 3 باعىتتىڭ بەكىتىلگەنىن دە بىلەسىزدەر. العاشقىسى، تۇلعالىق دامۋ. ءبىلىم سالاسىندا باسەكەگە قابىلەتتىلىك سىندى ماسەلەلەردى قولعا الا وتىرىپ، جاستار ساياساتىنا ەرەكشە كوڭىل ءبولۋ. ياعني، جاستاردىڭ ءوز ءبىلىمىن جەتىلدىرۋىنە جانە كورسەتۋىنە، ءوز يدەياسىن قوعامدىق ورتادا ايتا بىلۋگە، وعان موتيۆاتسيا بولارلىق دۇنيەلەردى تابۋىنا كومەكتەسەتىن كوپتەگەن جوبالار بار. تۇلعالىق دامۋعا «100 جاڭا وقۋلىق» دەگەن جوبانى نەگىزگە الساق بولادى. ويتكەنى بۇل دا ءبىلىم سالاسىنا جاسالعان ينۆەستيتسيا. جاستار ساياساتىنىڭ قولعا الىنۋى، ولاردىڭ پىكىرلەرىن اشىپ ايتۋىنا بارىنشا جاعداي جاسالدى. مىسالى، جاستاردىڭ مادەنيەت سالاسىنا ارالاسۋىنا، جەكە شىعارماشىلىقتارىنا دەن قويۋىنا دا وسى باعدارلاما سەبەپ بولدى. ودان بولەك جاس اقىندار مەن جازۋشىلاردىڭ شىعارمالارىن شىعارۋىنا دا جاڭعىرىپ جاتقانىمىز كومەكتەستى.
ەكىنشى باعىتى – ۇلتتىق بىرەگەيلىك جانە حالىقارالىق مارتەبەنى ارتتىرۋ. ياعني بۇل جەردە ۇلتتىق قۇندىلىقتاردى ساقتاۋ، سالت-ءداستۇر مەن ادەت-عۇرىپتى ۇستانا وتىرىپ ونى حالىقارالىق دەڭگەيدە ناسيحاتتاۋ. وسى باعىتتىڭ اياسىندا «دومبىرا party» دەگەن سەكىلدى جوبالار ۇيىمداستىرىلدى. قازاقي كيىمدەر مەن قۇندىلىقتارىمىزدى ناسيحاتتاۋ باعىتىندا دا ءتۇرلى شارالار جۇزەگە استى.
ودان كەيىن مەملەكەتتىڭ ازاماتتىق قوعامى جانە جەرگىلىكتى قوعامداستىقتارىنىڭ دامۋى. ياعني مەملەكەتتىڭ دامۋىنىڭ بىردەن ءبىر نەگىزى – ادامي كاپيتال. ءاربىر تۇلعا ءوزىنىڭ جەكە قابىلەتتەرىن قولدانا وتىرىپ، كەز كەلگەن سالادا بولسىن، (مادەنيەت، سپورت دەگەندەي) وزدەرىنىڭ قابىلەتتى ەكەنىن، بىلىكتىلىگىن كورسەتۋ ارقىلى ولار الەمدىك باسەكەگە قابىلەتتىلىگىن كورسەتە بىلەدى. بۇل جەردە ازاماتتىق قوعامىن جانە جەرگىلىكتى قوعامداستىقتارىنىڭ دامۋى دەپ ايتىپ وتىرمىز. بۇل – جاستاردىڭ كاسىپكەرلىكتى قولعا الا وتىرىپ، بيزنەس-جوسپارى سەكىلدى، بانكتىك قىزمەتتەر قۇرۋ ارقىلى وزدەرىنىڭ ءىسىن ءارى قاراي دوڭگەلەتىپ اكەتۋىنە كومەكتەسەتىن جوبالار جۇزەگە استى».
بۇلاردان بولەك «100 جاڭا ەسىم»، «باتىرلار ارامىزدا»، «جومارت جۇرەك» باعدارالامالارى بار. جاستار جىلى، ۆولونتەرلەر جىلى دەگەن سەكىلدى رۋحاني قولداۋلار دا بولدى»، – دەيدى نۇريلا ءجۇمادىللا.
ال جىگەر جۇماحمەتتىڭ ايتۋىنشا، بۇل باعدارلاما – تابىستى ەل بولۋىمىزدىڭ كەپىلى.
«ەلباسى ن.ءا.نازارباەۆتىڭ «بولاشاققا باعدار: رۋحاني جاڭعىرۋ» ماقالاسىندا «ۇلتتىق سالت-داستۇرلەرىمىز، ءتىلىمىز بەن مۋزىكامىز، ادەبيەتىمىز، جورالعىلارىمىز، ءبىر سوزبەن ايتقاندا، ۇلتتىق رۋحىمىز بويىمىزدا ماڭگى قالۋعا ءتيىس» دەگەن. وسى ءسوز جولدارىمەن تولىقتاي كەلىسەمىن. سەبەبى تاعىلىمدى تاريحىمىزعا دەن قويىپ، وقىعان، سۋسىنداپ وسكەن جاستارىمىزدىڭ تەرىس اعىمنىڭ جەتەگى مەن جىن-ويناقتىڭ ارباۋىندا الدانباسى انىق. سالت-ءداستۇرى بيىك، ءتىلى تۇنىق، رۋحاني قۇندىلىعى جوعارى، ەلدىك ساناسى جاڭعىرعان حالىقتىڭ تۇعىرى اركەز بيىك، ىرگەسى بەرىك بولادى. «رۋحاني جاڭعىرۋ» – تابىستى ەل بولۋىمىزدىڭ كەپىلى»، – دەيدى ول.
وسىلايشا «رۋحاني جاڭعىرۋ» باعدارلاماسى تۋرالى جاستاردىڭ، ونىڭ ىشىندە ستۋدەنتتەردىڭ شىنايى پىكىرىن بىلدىك. ۇلتىم دەگەن جاستار اعىنان جارىلدى دەسەك تە بولادى. باعدارلامادا كورگەن جاقسى جاقتارى مەن ءسال وسالداۋ جەرلەرىن تىزبەكتەپ ايتىپ بەرىپتى. ءتىپتى، اراسىندا ويىن ناقتى فاكتىمەن ءارى قىزىقتى ەتىپ جەتكىزگەندەرى دە بار. جاستار بۇرىنعىداي ەمەس، بۇگىندە ولاردىڭ نەگاتيۆكە قارسى يممۋنيتەتتەرى قالىپتاسقان، كەز كەلگەن جاعدايدى ءپوزيتيۆتى تۇرعىدا قابىلداي الادى...
ءسىز دە بۇل جاۋاپتاردان كەيىن ەلباسى ۇسىنعان باعدارلاماعا جاڭاشا كوزقاراسپەن قاراي باستاعان شىعارسىز. ويتكەنى ءوز پىكىرىن ايتقان 7 ادامنىڭ ويى 7 ءتۇرلى. الايدا ولار ەڭ باستىسى باعدارلامانىڭ نەگىزگى مازمۇنى مەن يدەياسىن، ونىڭ اياسىندا ءوتىپ جاتقان جوبالار مەن وزگەرىستەردى، ۇلت پەن بيلىك اراسىنداعى قارىم-قاتىناس دەڭگەيىن وزدەرىنشە تۇسىنگەن، جانە ونى جەتكىزە الدى.
قازىر جاستار كوپ تىڭداعانعا قاراعاندا ءوز پىكىرىن ايتىپ، بەلسەندى ءومىر ءسۇرۋدى قالايدى. سولاي ىستەپ تە ءجۇر. سوندىقتان وسى ماقالادا ءبىر ادامنىڭ ءتۇرلى پىكىرىن ەمەس، ءتۇرلى ادامنىڭ ءبىر عانا باعدارلاما تۋرالى ويىن بەردىك. وسى ارقىلى مۇمكىن ارقايسىمىز «رۋحاني جاڭعىرۋ» باعدارلاماسىنا باسقاشا كوزقاراسپەن قاراپ، ءالى دە زەرتتەپ، ءوزىمىز ءۇشىن جاڭالىق اشاتىن شىعارمىز.
اقمارال بەرەكەت،
«ادىرنا» ۇلتتىق پورتالى
