بولاشاقتا ەلىمىزدىڭ عىلىمي-تەحنيكالىق ەليتاسىن قۇرايتىن، ەرەكشە اقىلدى، تالانتتى جاستار قازاقستاندا ءومىر سۇرگىلەرى كەلمەيدى. بۇل جونىندە بۇگىن الماتىدا وتكەن مامانداندىرىلعان كەزدەسۋ بارىسىندا ايتىلدى. جوعارعى وقۋ ورىندارىنىڭ رەكتورلارى، كاسىپكەرلەر مەن ساياساتتانۋشىلار قاتىسقان جيىندا التىن باستى جاستارىمىز شەتەلگە نەلىكتەن اعىلىپ كەتىپ جاتقاندىعى ءسوز بولدى.
اقش-تىڭ سان-فرانتسيسكو قالاسىندا Google, Facebook, Twitter سياقتى ينتەرنەت الپاۋىتتارىنىڭ كەڭسەلەرى ورنالاسقان. جاھانعا اتتارى ايگىلى بۇل كومپانيالار الەمنىڭ تۇكپىر-تۇكپىرىنەن ەڭ مىقتى مامانداردى جۇمىسقا قابىلدايدى. ولاردىڭ اراسىندا ءبىزدىڭ وتانداستارىمىز كوپ. جۋىردا عانا شەتەلگە ساياحاتتاپ كەلگەن ساياساتتانۋشى ساياسات نۇربەك قازىرگى كەزدە سان-فرانتسيسكودا 2 مىڭ قازاق بالاسى قونىستانىپ، تۇراقتى جۇمىس ىستەپ جاتقانىن ايتادى.
ساياسات نۇربەك، ساياساتتانۋشى:
– يگور گانيچەۆ - وسكەمەننىڭ تۋماسى، قازاق-تۇرىك ليتسەيىندە ءبىلىم العان ماتەماتيك. سەۋلداعى حالىقارالىق وليمپيادادا قازاقستانعا العاش التىن اپەرەدى، ودان كەيىن تاعى 4 التىن، 3 كۇمىس جۇلدە ولجالايدى. بۇل وليمپيادالاردى سىرتتاي باقىلاپ، يگور سياقتى بالالاردىڭ ءتىزىمىن جاساپ، شەتەلدىك كومپانيالارعا جونەلتەتىن ارنايى ۇيىمدار بار. 2002 جىلى ماسساچۋسەتس تەحنولوگيالىق ينستيتۋتى وعان شاقىرتۋ جولدايدى، ەمتيحانسىز وقۋعا قابىلدايدى. ءبىتتى، بالامىزدى جوعالتتىق. 30 جاسقا دەيىن ول ميلليونەر اتاندى، ارينە قازاقستاندا ەمەس.
مامانداردىڭ ايتۋىنشا ەرەكشە قابىلەتىمەن ەرتە جاستان كوزگە تۇسكەن وركەندەرىمىزدىڭ 70 پايىزى شەتەلگە قونىس اۋدارعان. سەبەبى تالاپتى جاستار ەلىمىزدە دامىماعان جوعارى تەحنولوگيالى ءوندىرىس، ايتي، عىلىم، يننوۆاتسيا سالالارىندا قىزمەت اتقارعىسى كەلەدى. ال وركەنيەتتى ەلىمىزدىڭ ءوندىرىسى ازىرگە بۇراندا مەن تەتىكشە شىعارۋدان ارى اسا الماي ءجۇر، -دەيدى جينالعاندار.
ەندريۋ ۆاحتەل، «نارحوز» ۋنيۆەرسيتەتىنىڭ رەكتورى:
– ءوزىن وتە اقىلدى سانايتىن، بۇل جەردە جەتىستىككە جەتە المايمىن دەگەندەر شەتەلگە كەتەدى. وزدەرىن سىناپ كورگىلەرى كەلەدى، بۇل امبيتسيا. بىراق ولاردىڭ ءبارى ۇلكەن اتاققا يە بولمايدى عوي، دەنى قاتارداعى قىزمەتكەر بولىپ جۇمىس ىستەپ جۇرەدى. نەگە سول جاستار ەلىنە قايتا ورالمايدى؟ سەبەبى ول بۇل جەردە وزىنە قىزىقتى دۇنيە تاپپايتىنىن بىلەدى.
كەش سوڭىندا ماماندار بىلىكتى كادرلارىمىزدى ەلىمىزدە قالدىرعىمىز كەلسە، كاسىپتە قانداي سالاعا ماماندانۋىمىز كەرەك ەكەندىگىن شەشىپ، ستارتاپ جوبالاردىڭ ينۆەستيتسياسىن ارتتىرىپ، پاتەنت الۋ، جوبا قورعاۋ، جۇمىسقا ورنالاسۋ سياقتى يەرارحيالىق جۇيەنى جەمقورلىق پەن بيۋروكراتيادان ادا قىلۋىمىز قاجەت، -دەپ تارقاستى.
___________________________________________________________________________________________________________________
31.kz
