پرەزيدەنتتىڭ بەس الەۋمەتتىك باستاماسىن ىسكە اسىرۋعا بايلانىستى «نۇرلى جەر» تۇرعىن ءۇي باعدارلاماسىنا وزگەرتۋلەر ەنگىزىلەدى دەپ حابارلايدى ينۆەستيتسيالار جانە دامۋ مينيسترلىگىنىڭ ءباسپاسوز قىزمەتى.
بىرىنشىدەن، جۇيەنى مەملەكەتتىك جوسپارلاۋعا سايكەس باعدارلاما مەملەكەتتىك بولىپ قايتا بەكىتىلەدى. سونداي-اق، تۇرعىن ءۇي قۇرىلىسى مەن قارجىلاندىرۋ كولەمىن ارتتىرۋ نورماسى قايتا قارالادى.
«7-20-25» جاڭا يپوتەكالىق باعدارلاماسىن ەنگىزۋگە بايلانىستى «نۇرلى جەر» باعدارلاماسىنىڭ مەحانيزمدەرى قايتا قارالدى. بۇل يپوتەكانى سۋبسيديالاۋ مىندەتىن الىپ تاستاۋدى قاراستىرادى.
سونىمەن قاتار جاسالعان جانە جاسالاتىن كەلىسىمدەر بويىنشا مىندەتتەمەلەر ورىندالاتىن بولادى (قابىلدانعان مىندەتتەمەلەرگە جانە ازاماتتاردىڭ بولجامدى وتىنىمدەرىنە سايكەس، 6,4 ملرد تەڭگە).
قۇرىلىس الاڭدارىن دايىنداۋ ءۇشىن تۇرعىن ءۇي قۇرىلىسى جۇرەتىن اۋداندارداعى ينجەنەرلىك كوممۋنيكاتسيا قۇرىلىسىن قارجىلاندىرۋ كولەمىن 80 ميللياردتان 100 ملرد تەڭگەگە دەيىن ارتتىرۋ ماسەلەسى قارالۋدا (قوسىمشا 20 ملرد تەڭگە).
2019 جىلدان باستاپ ساتىپ الۋ قۇقىعىنسىز بەرىلەتىن ارەندالىق تۇرعىن ءۇي قۇرىلىسىنا جىل سايىن رەسپۋبليكالىق بيۋدجەتتەن 10 ملرد تەڭگە كولەمىندە قوسىمشا قاراجات ءبولۋ ۇسىنىلادى (25-تەن 35 ملرد. تەڭگەگە دەيىن).
بۇل حالىقتىڭ الەۋمەتتىك ءالسىز توپ ساناتىنا جاتاتىن قوسىمشا 1 مىڭنان استام وتباسىن جىل سايىن تۇرعىن ۇيمەن قامتاماسىز ەتۋگە مۇمكىندىك بەرەدى. وسى باعدارلاماعا جەكە قۇرىلىس سالۋشىلاردىڭ بەلسەندى قاتىسۋلارى ءۇشىن اكىمدىكتەر دايىن تۇرعىن ءۇي نىساندارىن ساتىپ الا الادى (نەسيە مەن ارەندالى تۇرعىن ءۇيدى ساتىپ الۋعا بولىنگەن قاراجات ەسەبىنەن).
بۇدان بولەك، «نۇرلى جەرگە» ەنگىزىلەتىن وزگەرىستەر اياسىندا اكىمدىكتەردىڭ پاتەرلەرىن «تۇرعىن ءۇي قۇرىلىس جيناق بانكىنىڭ» سالىمشىلارىمەن قاتار، جەكە بانكتەردىڭ كليەنتتەرى ءۇشىن دە ساتىپ الۋ قاراستىرىلادى.
بۇل شارالار يپوتەكانى دامىتۋعا ۇلكەن سەرپىلىس بەرەدى. اتاپ ايتساق، شارشى مەترى وڭىرلەردە - 140 مىڭ تەڭگە، ال استانا، الماتى، اتىراۋ جانە اقتاۋ قالالارىندا 180 مىڭ تەڭگەدەن بولادى (سالىنعان باسپانا بانكتىڭ سالىمشىلارىنا 3 اي ىشىندە وتكىزىلىپ، وتكىزىلمەگەن ۇيلەردىڭ قالدىعى ەدب كليەنتتەرىنە).
جاڭا باعدارلاما پارامەترى بويىنشا «تۇرعىن ءۇي قۇرىلىس جيناق بانكىنىڭ» تۇرعىن ءۇي زايمى قايتا قارالاتىن بولادى. جالپى قابىلدانعان شارالار تۇرعىن ءۇيدى پايدالانۋعا بەرۋ كولەمىن جىل سايىن 8% (جىلىنا 8 مىڭنان استام باسپانا) جانە 2030 جىلعا دەيىن 1 ادامعا شاققانداعى باسپانامەن قامتۋ كورسەتكىشىن 30 شارشى مەترگە دەيىن جەتكىزۋگە مۇمكىندىك بەرەدى.
بۇل باستامانى جۇزەگە اسىرۋ تۇرعىن ءۇي قۇرىلىسى يندۋسترياسىن دامىتۋعا ۇلكەن سەرپىن بەرەدى جانە تۇتاستاي العاندا ەل ەكونوميكاسىنىڭ ودان ءارى وسۋىنە ىقپال ەتەدى.
________________________________________________________________________________________________________________________________
inform.kz
