بەلگىلى قازاقستاندىق كاسىپكەر جانە ساياساتكەر بولات ءابىلوۆ پرەزيدەنت قاسىم-جومارت توقاەۆتىڭ اتىنا مالىمدەمە جاسادى. ول مەملەكەت باسشىسىنىڭ 14 ناۋرىزدا ساياسي رەفورمالاردىڭ جاڭا باعدارلاماسىن قابىلدايتىنىن ايتىپ، جاڭا رەفورمادان حالىقتىڭ ۇلكەن ءۇمىت كۇتىپ وتىرعانىن ايتتى. سونىمەن قاتار ول تۇڭعىش پرەزيدەنت نۇرسۇلتان نازارباەۆقا قاتىستى "ەلباسى" تۋرالى زاڭدى تۇبەگەيلى جويۋدى سۇرادى، دەپ حابارلايدى “ادىرنا” ۇلتتىق پورتالى stan.kz-كە سىلتەمە جاساپ.
"قۇرمەتتى قاسىم-جومارت كەمەلۇلى، مەن سىزگە ءبىزدىڭ ەلدىڭ پرەزيدەنتى رەتىندە جانە 30 جىلداي تانىس بولعان ادام رەتىندە قايىرىلىپ تۇرمىن", – دەپ باستادى ءابىلوۆ ءوز مالىمدەمەسىن.
ءابىلوۆتىڭ ايتۋىنشا، وتىرىك پەن ەكىجۇزدىلىككە تولى بولعان وتىز جىل ارتتا قالعان. ەندىگى ۋاقىتتا قازاقستان حالقى بولاشاققا تەك جارقىن ۇمىتپەن قارايدى دەيدى ول.
"وتىز جىل بويى بيلىك ءبىر ادامنىڭ قولىنا عانا شوعىرلانىپ كەلدى. سول سەبەپتى مۇنداي بيلىكتى ءبىر كۇندە-اق قۇلاتا سالادى. بۇدان شىعاتىن قورىتىندا دا تۇسىنىكتى. مەملەكەتتىڭ كونستيتۋتسياسى ويىنا كەلگەنىن جاسايتىن ءبىر ادامنىڭ عانا پايداسى ءۇشىن قىزمەت قىلماۋى قاجەت. قازاقستان حالقى ساياسي قۋدالاۋلار مەن قارا كۇشتىڭ كومەگىمەن قۇرىلعان بيلىكتەن ابدەن شارشادى. ناتيجەسىندە نازارباەۆتىڭ قۇرعان بيلىگى قازاقستاندى ەكونوميكالىق جانە ساياسي تىعىرىققا تىرەپ كەتتى", – دەدى ءابىلوۆ.
قوعام قايراتكەرى ەندى قانتوگىسكە جول بەرمەۋدىڭ قاجەت ەكەنىن ايتادى. بۇل رەتتە ول جاڭاوزەن مەن قاڭتار وقيعالارىن ەسكە الۋ كەرەك دەپ سانايدى.
"ەلىمىزدە بولعان مۇنداي قىرعىندارعا ەندى جول بەرۋگە بولمايدى. سول ءۇشىن تۇڭعىش پرەزيدەنت تۋرالى زاڭدى الىپ تاستاۋ قاجەت. مۇنىمەن قوسا نازارباەۆتى ەلباسى مارتەبەسىنەن ايىرۋدى دۇرىس دەپ سانايمىن", – دەپ قوستى ءابىلوۆ.
ول توقاەۆقا قاراتا سويلەگەن سوزىندە، 16 ناۋرىزدا پرەزيدەنتتىڭ تەك حالىقتىڭ الدىندا عانا ەمەس، الاشوردانى قۇرعان قازاق زيالىلارىنىڭ ارۋاقتارىنىڭ الدىندا سويلەيتىنىن ەسكە سالدى.
"قازاق زيالىلارىنىڭ ۇنەمى شىندىق ءۇشىن كۇرەسىپ كەلگەنى جانە سول جولدا ادالدىقتان اتتاپ كەتپەگەنى بىزگە ارقاشان شابىت سىيلاۋى قاجەت. ءبىز ۇلت ۇستازدارىنىڭ اتىن لايىقتى ساقتاپ قالۋىمىز كەرەك. ولار بىزگە "ويان، قازاق!" دەپ جىرلاعان. قاڭتار ۇلتتىق تراگەدياسى ءبىزدىڭ كوزىمىزدى اشتى. بىزگە قازىر ناقتى ساياسي رەفورما قاجەت. ء"بىر ادام جانە ءبىر داۋىس" جانە بۇل – ءبىزدىڭ بولاشاققا دەگەن كىلتىمىز. بۇل ءسوزدى نوبەل سىيلىعىنىڭ يەگەرى نەلسون ماندەلا ايتقان. جانە ول بۇل ءسوزىن جۇزەگە اسىرۋ ءۇشىن 30 جىل ءومىرىن تۇرمەدە وتكىزدى. ءبىزدىڭ ەگەمەندىگىمىزگە دە وسىنشا جىل بولدى", – دەدى كاسىپكەر.
ءابىلوۆتىڭ سوزىنشە، قازاقستاندىقتار دەموكراتيالىق جولمەن قۇرىلعان مەملەكەتتە ءومىر سۇرۋگە ابدەن قۇقىلى. ەندى حالىق تاعى وتىز جىل كۇتكىسى كەلمەيدى دەگەن ول، وزگەرىستى بۇگىننەن باستاۋدى ۇسىندى.
"قاسىم-جومارت كەمەلۇلى، مەن ءسىزدىڭ تاريحقا نازارباەۆتىڭ اۆتوريتارلى جۇيەسىن قۇلاتقان رەفورماشى رەتىندە كىرگەنىڭىزدى قالايمىن. قازىر ءسىزدىڭ قابىلدايتىن ءاربىر شەشىمىڭىزدەن قازاقستاننىڭ بولاشاعى انىقتالادى. "مەن قازاقپىن! مىڭ ءولىپ، مىڭ تىرىلگەن" دەگەن جۇبان مولداعاليەۆتىڭ ولەڭ شۋماقتارى ءاربىرىمىزدىڭ سانامىزدا. مەنىڭ ارمانىم – الداعى ۋاقىتتا قاتىگەز كەزەڭدەر ەندى قايتالانىپ كەلمەسە ەكەن دەيمىن. مەن قازاقتىڭ التىن عاسىرى قازىر ورناسا ەكەن دەپ تىلەيمىن. ءسوزسىز بۇرىنعى الاش وردا ازاماتتارىنىڭ دا ارمانى وسى بولعانى انىق. مەن قازاق رەتىندە وسى ۇلى ارماننىڭ ورىندالۋى ءۇشىن بارىمدى قۇربان ەتۋگە دايارمىن", – دەپ ءسوزىن تۇيىندەدى بولات ءابىلوۆ.
