Belgili qazaqstandyq kásipker jáne saıasatker Bolat Ábilov prezıdent Qasym-Jomart Toqaevtyń atyna málimdeme jasady. Ol memleket basshysynyń 14 naýryzda saıası reformalardyń jańa baǵdarlamasyn qabyldaıtynyn aıtyp, jańa reformadan halyqtyń úlken úmit kútip otyrǵanyn aıtty. Sonymen qatar ol tuńǵysh prezıdent Nursultan Nazarbaevqa qatysty "Elbasy" týraly zańdy túbegeıli joıýdy surady, dep habarlaıdy “Adyrna” ulttyq portaly stan.kz-ke silteme jasap.
"Qurmetti Qasym-Jomart Kemeluly, men sizge bizdiń eldiń prezıdenti retinde jáne 30 jyldaı tanys bolǵan adam retinde qaıyrylyp turmyn", – dep bastady Ábilov óz málimdemesin.
Ábilovtiń aıtýynsha, ótirik pen ekijúzdilikke toly bolǵan otyz jyl artta qalǵan. Endigi ýaqytta Qazaqstan halqy bolashaqqa tek jarqyn úmitpen qaraıdy deıdi ol.
"Otyz jyl boıy bılik bir adamnyń qolyna ǵana shoǵyrlanyp keldi. Sol sebepti mundaı bılikti bir kúnde-aq qulata salady. Budan shyǵatyn qorytynda da túsinikti. Memlekettiń konstıtýııasy oıyna kelgenin jasaıtyn bir adamnyń ǵana paıdasy úshin qyzmet qylmaýy qajet. Qazaqstan halqy saıası qýdalaýlar men qara kúshtiń kómegimen qurylǵan bılikten ábden sharshady. Nátıjesinde Nazarbaevtyń qurǵan bıligi Qazaqstandy ekonomıkalyq jáne saıası tyǵyryqqa tirep ketti", – dedi Ábilov.
Qoǵam qaıratkeri endi qantógiske jol bermeýdiń qajet ekenin aıtady. Bul rette ol Jańaózen men qańtar oqıǵalaryn eske alý kerek dep sanaıdy.
"Elimizde bolǵan mundaı qyrǵyndarǵa endi jol berýge bolmaıdy. Sol úshin tuńǵysh prezıdent týraly zańdy alyp tastaý qajet. Munymen qosa Nazarbaevty Elbasy mártebesinen aıyrýdy durys dep sanaımyn", – dep qosty Ábilov.
Ol Toqaevqa qarata sóılegen sózinde, 16 naýryzda prezıdenttiń tek halyqtyń aldynda ǵana emes, Alashordany qurǵan qazaq zııalylarynyń árýaqtarynyń aldynda sóıleıtinin eske saldy.
"Qazaq zııalylarynyń únemi shyndyq úshin kúresip kelgeni jáne sol jolda adaldyqtan attap ketpegeni bizge árqashan shabyt syılaýy qajet. Biz ult ustazdarynyń atyn laıyqty saqtap qalýymyz kerek. Olar bizge "Oıan, qazaq!" dep jyrlaǵan. Qańtar ulttyq tragedııasy bizdiń kózimizdi ashty. Bizge qazir naqty saıası reforma qajet. "Bir adam jáne bir daýys" jáne bul – bizdiń bolashaqqa degen kiltimiz. Bul sózdi Nobel syılyǵynyń ıegeri Nelson Mandela aıtqan. Jáne ol bul sózin júzege asyrý úshin 30 jyl ómirin túrmede ótkizdi. Bizdiń egemendigimizge de osynsha jyl boldy", – dedi kásipker.
Ábilovtiń sózinshe, qazaqstandyqtar demokratııalyq jolmen qurylǵan memlekette ómir súrýge ábden quqyly. Endi halyq taǵy otyz jyl kútkisi kelmeıdi degen ol, ózgeristi búginnen bastaýdy usyndy.
"Qasym-Jomart Kemeluly, men sizdiń tarıhqa Nazarbaevtyń avtorıtarly júıesin qulatqan reformashy retinde kirgenińizdi qalaımyn. Qazir sizdiń qabyldaıtyn árbir sheshimińizden Qazaqstannyń bolashaǵy anyqtalady. "Men qazaqpyn! Myń ólip, myń tirilgen" degen Juban Moldaǵalıevtiń óleń shýmaqtary árbirimizdiń sanamyzda. Meniń armanym – aldaǵy ýaqytta qatigez kezeńder endi qaıtalanyp kelmese eken deımin. Men qazaqtyń altyn ǵasyry qazir ornasa eken dep tileımin. Sózsiz burynǵy Alash orda azamattarynyń da armany osy bolǵany anyq. Men qazaq retinde osy uly armannyń oryndalýy úshin barymdy qurban etýge daıarmyn", – dep sózin túıindedi Bolat Ábilov.
