ءۇشىنشى مەگاپوليستە ۇلىستىڭ ۇلى كۇنى - ناۋرىزعا ارنالعان مەرەكەلىك ءىس-شارالار باستالدى. بۇگىن كوكتەم مەرەكەسى – قوشقار اتا سەيىلى ءوتتى. قالا ورتالىعىنداعى بۇلاق باستاۋىندا وتكەن مەرەكەلىك جيىنعا قالالىق مادەنيەت، تىلدەردى دامىتۋ جانە ارحيۆتەر باسقارماسىنا قاراستى بارلىق مەكەمە ۇجىمدارى قاتىستى، دەپ جازادى "ادىرنا" ۇلتتىق پورتالى.
قوشقار اتا وزەنىنىڭ باستاۋىندا كيىز ۇيلەر تىگىلىپ، التىباقاندار ورناتىلدى، قازاقتىڭ سالت-داستۇرلەرى كوپشىلىك نازارىنا ۇسىنىلدى. اق جاۋلىقتى اجەلەر قول ديىرمەن تارتىپ، كەلى ءتۇيدى، تاباعا نان ءپىسىرىلىپ، قالا تۇرعىندارىنا ناۋرىز-كوجە تاراتىلدى.
مەرەكەلىك ءىس-شارانى تاماشالاۋعا كەلگەن قالا اكىمىنىڭ ءبىرىنشى ورىنباسارى شىڭعىس مۇقان ۇل بالانىڭ تۇساۋىن كەسىپ، ىزگى تىلەگىن ءبىلدىردى.
ءتۇرلى تەاتر ارتىستەرى مەرەكەلىك قويىلىمدار ۇيىمداستىرىپ، ساحنالىق كورىنىستەر ۇسىندى. مەرەكەگە كەلگەندەر تەمىر ۇستالارى مەن اعاش شەبەرلەرىنىڭ، قولونەرشىلەردىڭ بۇيىمدارى مەن ونەرلەرىن تاماشالادى. وزەن جاعالاپ ساماۋرىن قويىلىپ، كوپشىلىككە ارناپ پالاۋ باسىلدى.
ايتا كەتەيىك، بيىل ناۋرىز مەرەكەسىنە ارنالعان ءىس-شارالار شىمكەنتتە 13 ناۋرىزدان باستاپ 23 ناۋرىزعا دەيىن كورىسۋ كۇنى، جايلاۋ كۇنى، شەجىرە كۇنى، تاريحقا تاعزىم كۇنى، يگى ىستەر كۇنى، شىمىرلىق پەن شەبەرلىك كۇنى، Nauryz Fashion Day, زياتكەرلىك كۇنى، ۇلتتىق تاعامدار فەستيۆالى، گاسترونوم Fest, ۇلىستىڭ ۇلى كۇنى جانە جورالعى كۇنى دەگەن اتاۋلارمەن وتەدى.
"ادىرنا" ۇلتتىق پورتالى
