"اگرەسسور" ەلدىڭ باسشىسى ۋكراينا باسشىسىمەن بەتپە-بەت كەزدەسۋگە جاناما كەلىسىم بەرگەنىمەن، ۋكرايناعا قارسى باستالعان سوعىستى توقتاتقىسى كەلمەيدى. سوعىستىڭ ەكى جاقتان دا قانشا شىعىن اكەلەتىنى ءپۋتيندى قىزىقتىرمايدى. بۇل پىكىردى ستەنفورد ۋنيۆەرسيتەتىنىڭ پروفەسسورى مايكل ماكفول «ۋكراينا 24» ارناسىنا بەرگەن سۇحباتىندا ءبىلدىردى.
ايتا كەتۋ كەرەك، ول كوپ جىلدار بويى پوستكەڭەستىك كەڭىستىكتى زەرتتەگەن، 2014 جىلعا دەيىن رەسەي فەدەراتسياسىنداعى امەريكا ەلشىسى جانە اقش-تىڭ 44-ءشى پرەزيدەنتى باراك وبامانىڭ ۇلتتىق قاۋىپسىزدىك ماسەلەلەرى بويىنشا كومەكشىسى بولعان.
پروفەسسور ءالى سوعىس قيمىلدارىن توقتاتۋ ءۇشىن العىشارتتار جوق ەكەنىن اتاپ ءوتتى.
"پۋتين ءالى دە جەڭىسكە جەتەتىنىنە سەنەدى. ارينە، ول كۇتكەننەن دە باياۋ، دەگەنمەن شابۋىل جالعاسۋدا", - دەدى مايكل ماكفول.
ونىڭ ايتۋىنشا، رەسەي فەدەراتسياسىنىڭ باسشىسىنا قانشا ۋكراينالىق نەمەسە ونىڭ ساربازدارى ولەتىنى ماڭىزدى ەمەس. مۇنى ۋكراينادا تۇراتىن ورىستار جاقسى تۇسىنەدى. سونىمەن بىرگە «ۋكراينا قالالارىن فاشيستەردەن ازات ەتىڭدەر» دەگەن بوس سوزگە سەنەتىن رەسەي فەدەراتسياسىنىڭ ازاماتتارى دا از ەمەس. ماكفول بۇل ناسيحاتپەن كۇرەسۋگە شاقىردى.
"سوعىس ەكى جولمەن اياقتالادى: نە بىرەۋ جەڭەدى، نە مايدانداعى جاعداي باسەڭدەپ، ەشكىم العا جىلجي المايدى. مەنىڭ ويىمشا، پۋتين جەڭگەن جوق جانە جەڭە دە المايدى. بىراق اسكەري جاعدايدى تۇراقتاندىرۋ ءالى دە جوق",-دەپ تولىقتىردى اقش-تىڭ رەسەي فەدەراتسياسىنداعى بۇرىنعى ەلشىسى.
"ادىرنا" ۇلتتىق پورتالى
