اتىراۋدا قاڭتار وقيعاسىنا بايلانىستى قامالعان 8 كۇدىكتى اشتىق جاريالادى. 9 ناۋرىزدا ۋگ-157/1 مەكەمەسىنىڭ الدىنا كۇدىكتىلەردىڭ تۋىستارى جينالىپ، جاقىندارىن كورسەتۋدى تالاپ ەتتى، دەپ حابارلايدى اق جايىق باسىلىمى.
ادام قۇقىقتارى جانە زاڭدىلىقتى ساقتاۋ بيۋروسىنىڭ اتىراۋ وبلىسى بويىنشا بولىمشەسىنىڭ ديرەكتورى مىندەتىن اتقارۋشى داريا ۇلجاعاليەۆانىڭ ايتۋىنشا، كۇدىكتىلەر اشتىقتى ءالى جالعاستىرىپ جاتىر. ول 9 ناۋرىزدا كەشكە تەرگەۋ يزولياتورىنا كىرىپ شىققان. ونىڭ ايتۋىنشا، نەگىزىنەن "جاپپاي تارتىپسىزدىك ۇيىمداستىرۋ" جانە "بيلىك وكىلىنە كۇش قولدانۋ" باپتارى بويىنشا كۇدىككە ىلىنگەن ازاماتتار وزدەرىن ۇيقاماققا شىعارۋدى تالاپ ەتىپ وتىر. بۇعان قوسا، قاڭتار ايىندا ۇستاۋ كەزىندە "ازاپتالعان" كۇدىكتىلەر وزدەرىن قيناعان پوليتسەيلەردى جاۋاپقا تارتۋدى تالاپ ەتكەن.
– كەشە كەشكە كىرىپ شىقتىم. جىگىتتەردىڭ بارلىعىمەن سويلەسىپ شىقتىم. بۇعان دەيىن تەرگەۋ يزولياتورىنان ءتورت ادامدى جىبەرگەن ەكەن. قالعاندارى دا ۇيقاماققا شىققىسى كەلەدى. ولار اشتىق جاريالاعانى تۋرالى ءوتىنىشتى تۇرمە اكىمشىلىگىنە 9 ناۋرىزدا بەرگەن. دەنەلەرىن قاراپ شىقتىم. ەشقانداي جاراقات جوق. ولاردىڭ رۇقساتىمەن كەيبىرىن سۋرەتكە ءتۇسىرىپ الدىم. سەبەبى دالادا انالارى جىلاپ، ەڭىرەپ تۇردى. ولار وبلىس پروكۋرورىمەن كەزدەسۋدى تالاپ ەتتى. كەزدەسكەنىن-كەزدەسپەگەنىن بىلمەيمىن. كۇدىكتىلەر وزدەرىن قيناعان پوليتسيا قىزمەتكەرلەرىن جاۋاپقا تارتۋدى تالاپ ەتىپ وتىر، – دەدى ول 10 ناۋرىزدا تاڭەرتەڭ ازاتتىق تىلشىسىنە.
ونىڭ ايتۋىنشا، 8 ادامنىڭ بىرەۋى قۇرعاق اشتىق جاريالاعان. قالعانى سۋ ىشەدى. جالپى تەرگەۋ يزولياتورىندا قاڭتار وقيعاسى بويىنشا قامالعاندار 20-دان اسادى.
– كەشە جاعدايلارى قالىپتى بولدى. تۇرمە اكىمشىلىگىنە اشتىق جاريالاعاندارعا مەديتسينالىق كومەك كورسەتۋ قاجەتتىگىن ايتتىم، – دەدى بيۋرو بولىمشەسىنىڭ باسشىسى.
بەيسەنبى كۇنى ازاتتىق تەرگەۋ يزولياتورىنا حابارلاسقان كەزدە مەكەمە باسشىسى مەيىربەك باقتىعاليۇلى بىرنەشە كۇدىكتىنىڭ اشتىق جاريالاعانىن راستادى. قالعان سۇراقتاردى قىلمىستىق-اتقارۋ جۇيەسى دەپارتامەنتى وكىلدەرىنە قويۋ قاجەتتىگىن ايتتى. ازاتتىق ءتىلشىسى دەپارتامەنتتەن ازىرگە جاۋاپ الا المادى.
"اق جايىق" باسىلىمىنىڭ جازۋىنشا، نارازىلار اشتىقتى 6 ناۋرىزدا جاريالاعان. باسىلىم اتا-انالاردىڭ شاعىمدارى مەن پروكۋراتۋرا وكىلدەرىنىڭ ولارعا بەرگەن جاۋابىنان ۆيدەو جاريالادى.
كۇدىكتىلەردىڭ ءبىرىنىڭ اناسى ءاليا ماحامبەتوۆانىڭ ايتۋىنشا، ۇلى مەكەمەدەگى انتيسانيتاريا مەن تاماقتىڭ ساپاسىنا شاعىمدانعان.
"ۇلىم وزدەرىن قۇر سۋعا ازىرلەنگەن ارپامەن تاماقتاندىراتىنىن ايتتى. ازاپتاۋ تۋرالى ايتقان جوق، مۇمكىن ءبىزدى، جاقىندارىن الاڭداتقىسى كەلمەگەن بولار. بىراق بۇگىن ولاردى 13 قاڭتاردا تۇرمەگە جەتكىزگەننەن كەيىن رەزەڭكە تاياقپەن ەكى بۇتىنىڭ اراسىنان ۇرعانىن ءبىلدىم. جانى قىسىلعاندىقتان قازىر ايتىپ وتىر. تەرگەۋ يزولياتورى قىزمەتكەرلەرىنىڭ قىسىمىنان كەيىن ولار تامىرلارىن كەسەتىنىن ايتىپ وتىر. الەۋمەتتىك جەلىدە دە ۆيدەو بار" دەدى ءاليا ماحامبەتوۆا.
تۇرمە الدىنا جينالعان اتا-انالاردىڭ الدىنا شىققان ارنايى پروكۋراتۋرا وكىلدەرى ءالىبي مۇستافين جانە اسىلبەك مۇقانوۆ ازاپتاۋ تۋرالى اقپاراتتى تەكسەرەتىنىن ايتقان.
"انتيسانيتاريا مەن تاماقتانۋعا قاتىستى شاعىمدى وزگە ارىپتەستەرىم تەكسەرەدى، ال تەرگەۋ يزولياتورىنداعى ازاپتاۋلار جايلى شاعىمدار بۇگىنگى كۇنگە دەيىن تۇسكەن جوق بولاتىن، قازىر تەكسەرەمىز" دەدى پروكۋراتۋرا وكىلدەرى.
- قازاقستاندا قاڭتار وقيعاسىنان سوڭ مىڭداعان ادام ۇستالىپ، جۇزدەگەن ادام "تەرروريزم", "تارتىپسىزدىك", "قارۋ ۇرلاۋ" جانە باسقا دا ايىپتارمەن قاماۋعا الىنعان. قامالعانداردىڭ كوبى تۇرمەدە ازاپتالعاندارىن ايتقان ەدى. باس پروكۋراتۋرا ناۋرىز باسىندا قاڭتار وقيعاسىنان كەيىن ازاپتاۋ شاعىمدارى بويىنشا قوزعالعان قىلمىستىق ىستەر 200-دەن اسقانىن، 9 قىزمەتكەر ۇستالعانىن حابارلاعان.
- قۇقىق قورعاۋشىلار قازاقستان بيلىگىن قاڭتار وقيعاسىن حالىقارالىق دەڭگەيدە تەكسەرۋگە شاقىرعان ەدى، بىراق نۇر-سۇلتان بۇل ۇسىنىستان باس تارتتى.
- قۇقىق قورعاۋشىلار ازاپتاۋ جايلى شاعىمداردىڭ سوتقا سيرەك جەتەتىنىن ايتادى.
