تاجىكستاننىڭ حۋدجاند قالاسىنىڭ سوتى اپتا باسىندا مەشىتتىڭ بۇرىنعى يمامىن سالافيزم يدەياسىن ناسيحاتتاعانى ءۇشىن سوتتادى. سالافيزم اعىمىنا بۇل ەلدە تىيىم سالىنعان.
ازاتتىقتىڭ تاجىك قىزمەتىنىڭ حابارلاۋىنشا، 35 جاستاعى ابدۋللو سايدۋللوەۆ 2004-2007 جىلدارى ساۋد ارابياسىنداعى مەدرەسەلەردىڭ بىرىندە ءدىني ءبىلىم العان. ەلگە ورالعان سوڭ "ساري سانگ" مەشىتىنىڭ يمام-ءحاتيبى بولعان. مەشىتكە كەلۋشىلەر ءدىن قىزمەتكەرىنىڭ نامازدى باسقاشا وقيتىنىن بايقاعان.
مەشىتكە كەلۋشىلەردىڭ ءبىرى سوتتا سايدۋللوەۆقا قارسى كۋالىك ەتىپ، يمامنىڭ نامازدى سالافيتتەرشە وقيتىنىن جانە باسقالاردى سولاي جاساۋعا شاقىرعانىن ايتقان. سوتتالۋشى سوڭعى سوزدەن جانە ادۆوكاتتان باس تارتتى.
سايدۋللوەۆ 2017 جىلى قازاندا ءوز ۇيىندە ۇستالدى. قۇقىق قورعاۋشىلار ونىڭ ۇيىنەن تىيىم سالىنعان 200 ءدىني ادەبيەت تاركىلەگەن. ونىڭ ەكى باۋىرىنا ىزدەۋ جاريالاندى. كەيبىر دەرەكتەرگە قاراعاندا، ولار اراب ەلدەرىنىڭ بىرىندە ءجۇر.
رەسمي مالىمەت بويىنشا، 2016 جىلى تاجىكستاننىڭ سوعدى وبلىسىندا تىيىم سالىنعان "سالافيا" جانە "مۇسىلمان باۋىرلار" اعىمدارىنا قاتىسى بار 20-دان استام ءدىني قىزمەتكەر ۇستالعان.
_________________________________________________________________________________________________________________
azattyq.org
