Tájikstannyń Hýdjand qalasynyń soty apta basynda meshittiń burynǵy ımamyn salafızm ıdeıasyn nasıhattaǵany úshin sottady. Salafızm aǵymyna bul elde tyıym salynǵan.
Azattyqtyń Tájik qyzmetiniń habarlaýynsha, 35 jastaǵy Abdýllo Saıdýlloev 2004-2007 jyldary Saýd Arabııasyndaǵy medreselerdiń birinde dinı bilim alǵan. Elge oralǵan soń "Sarı sang" meshitiniń ımam-hatıbi bolǵan. Meshitke kelýshiler din qyzmetkeriniń namazdy basqasha oqıtynyn baıqaǵan.
Meshitke kelýshilerdiń biri sotta Saıdýlloevqa qarsy kýálik etip, ımamnyń namazdy salafıttershe oqıtynyn jáne basqalardy solaı jasaýǵa shaqyrǵanyn aıtqan. Sottalýshy sońǵy sózden jáne advokattan bas tartty.
Saıdýlloev 2017 jyly qazanda óz úıinde ustaldy. Quqyq qorǵaýshylar onyń úıinen tyıym salynǵan 200 dinı ádebıet tárkilegen. Onyń eki baýyryna izdeý jarııalandy. Keıbir derekterge qaraǵanda, olar arab elderiniń birinde júr.
Resmı málimet boıynsha, 2016 jyly Tájikstannyń Soǵdy oblysynda tyıym salynǵan "Salafııa" jáne "Musylman baýyrlar" aǵymdaryna qatysy bar 20-dan astam dinı qyzmetker ustalǵan.
_________________________________________________________________________________________________________________
azattyq.org
