تەڭگەنىڭ قۇنسىزدانۋى اۆتوسالونداعى ماشينالاردى دا اينالىپ وتپەدى. قازىر ساتۋشىلار ءونىم باعاسىن جاپپاي اۋىستىرىپ جاتىر. بىرنەشە مودەلدىڭ قۇنى 100 مىڭ تەڭگەگە ارتسا، كەيبىرى ءتىپتى بىرنەشە ميلليونعا كوتەرىلگەن. بۇل تۋرالى "كولەسا" ينتەرنەت-باسىلىمى حابارلادى، دەپ جازادى "ادىرنا" ۇلتتىق پورتالى.
Toyota Camry-ءدىڭ 2 ليترلىك موتور مەن ۆارياتور ورناتىلعان قاراپايىم نۇسقاسىن 14.9 ملن (+10.9 %) تەڭگەگە الاسىز. ال بۇرىن 22.9 ملن تەڭگەدەن ساۋدالانعان 3.5 ليترلىك V6-مەن جۇرەتىن «ليۋكس» قازىر 25.5 ملن تۇرادى.
RAV4 ءۇشىن اقپاندا ساتۋشىلار 15.2-دەن 21.2 ملن تەڭگەگە دەيىن سۇرايتىن، قازىر ونىڭ قۇنى 16.9 بەن 23.5 ملن ارالىعىندا. Land Cruiser 300 39.7 ملن تەڭگەدەن 42.5 ملن تەڭگەگە قىمباتتادى. «پرەميۋم» جيىنتىعىنداعى فلاگماندى الام دەسەڭىز، 55.7-59.6 ملن جۇمساۋعا دايىن بولعانىڭىز ءجون.
ال Hyundai كەرىسىنشە، ەسكى باعانى ساقتاپ قالدى. الماتىداعى زاۋىتتا قۇراستىرىلاتىن Accent قانا 400 مىڭ تەڭگەگە قىمباتتاعان. بۇرىن 6.7-7.8 ملن شاماسىندا ساتىلعان مودەلدى ەندى 7.1-8.2 ملن تەڭگەگە الۋعا بولادى.
Chevrolet ماركاسىنىڭ ديستريبيۋتورى اقپاندا باعا ءتىزىمىن جاسىرىپ قويعان ەدى، قازىر سايتقا قايتا شىعارىپتى. ودان «سپاركتىڭ» 5.0 ملن تەڭگەدەن 5.7 ملن تەڭگەگە قىمباتتاعانى بايقالادى. ءبىزدىڭ ەلدە سۇرانىس جوعارى Cobalt پەن Nexia باعاسىنا دا جيىنتىق تۇرىنە بايلانىستى 700-800 مىڭ تەڭگە قوسىلعان.
Malibu, Equinox, Trailblazer جانە Tahoe قۇنىندا وزگەرىس جوق.
Kia دا مودەلدەرىنىڭ قۇنىن 100 مىڭنان 600 مىڭعا دەيىن ارتتىرعان. ناتيجەسىندە بيىل شىققان Rio 7.8-9.6 ملن تەڭگەگە باعالانىپ وتىر. قىستا بۇل كولىك 7.4-9 ملن تەڭگەگە ساتىلدى.
Sorento-نىڭ ەڭ ارزان نۇسقاسى 16.6 ملن تەڭگە تۇرادى. قىستا ونى 15.9 ملن تەڭگەگە الۋعا بولاتىن ەدى.
Lada Vesta اقپاندا 5.8 ملن تەڭگەدەن ساتىلعان، ەندى ونى الاتىندار 6.0 ملن جۇمسايدى. Renault باعاسىندا ازىرشە وزگەرىس بايقالمايدى.
قىتايدان كەلەتىن Haval مەن Chery, سونىمەن قاتار جاپونيالىق Subaru كولىكتەرىنىڭ قۇنى بۇرىنعى دەڭگەيدە تۇر. ال JAC سايتتاعى باعا جازىلعان ءتىزىمدى جاسىرىپ قويىپتى، سوعان قاراعاندا ماركا وكىلدەرى جۋىردا تاۋارىن جاڭا باعادا ۇسىناتىن سياقتى.
Volkswagen ماركالى بىرنەشە مودەلدىڭ باعاسى بەلگىلى بولدى. مۇندا ءسوز Polo, Taos جانە Tiguan جايلى بولىپ وتىر. ۇشەۋى دە رەسەيدە قۇراستىرىلادى.
Polo-نىڭ باعاسى ەندى 9.1 ملن تەڭگەدەن باستالادى، بۇل اقپانداعىمەن سالىستىرعاندا 1.5 ملن تەڭگەگە جوعارى. Taos كروسسوۆەرى 2.8-3.2 ملن تەڭگەگە قىمباتتاپ، ەڭ ارزانى 14.9 ملن تەڭگەدەن ساۋدالانىپ جاتىر.
بىراق بارىنەن Tiguan-نىڭ كوپ قىمباتتاعانى بايقالادى. وعان ۇستەلگەن سوما 3.4-4.1 ملن شاماسىندا. ياعني، جاقسى جابدىقتالعان «تيگۋاندى» 24 ملن تەڭگە الۋعا بولادى، ال قاراپايىم كولىك ءۇشىن كەمى 18 ملن ساناپ بەرۋگە تۋرا كەلەدى.
"ادىرنا" ۇلتتىق پورتالى
