Teńgeniń qunsyzdanýy avtosalondaǵy mashınalardy da aınalyp ótpedi. Qazir satýshylar ónim baǵasyn jappaı aýystyryp jatyr. Birneshe modeldiń quny 100 myń teńgege artsa, keıbiri tipti birneshe mıllıonǵa kóterilgen. Bul týraly "Kolesa" ınternet-basylymy habarlady, dep jazady "Adyrna" ulttyq portaly.
Toyota Camry-diń 2 lıtrlik motor men varıator ornatylǵan qarapaıym nusqasyn 14.9 mln (+10.9 %) teńgege alasyz. Al buryn 22.9 mln teńgeden saýdalanǵan 3.5 lıtrlik V6-men júretin «Lıýks» qazir 25.5 mln turady.
RAV4 úshin aqpanda satýshylar 15.2-den 21.2 mln teńgege deıin suraıtyn, qazir onyń quny 16.9 ben 23.5 mln aralyǵynda. Land Cruiser 300 39.7 mln teńgeden 42.5 mln teńgege qymbattady. «Premıým» jıyntyǵyndaǵy flagmandy alam deseńiz, 55.7-59.6 mln jumsaýǵa daıyn bolǵanyńyz jón.
Al Hyundai kerisinshe, eski baǵany saqtap qaldy. Almatydaǵy zaýytta qurastyrylatyn Accent qana 400 myń teńgege qymbattaǵan. Buryn 6.7-7.8 mln shamasynda satylǵan modeldi endi 7.1-8.2 mln teńgege alýǵa bolady.
Chevrolet markasynyń dıstrıbıýtory aqpanda baǵa tizimin jasyryp qoıǵan edi, qazir saıtqa qaıta shyǵarypty. Odan «Sparktyń» 5.0 mln teńgeden 5.7 mln teńgege qymbattaǵany baıqalady. Bizdiń elde suranys joǵary Cobalt pen Nexia baǵasyna da jıyntyq túrine baılanysty 700-800 myń teńge qosylǵan.
Malibu, Equinox, Trailblazer jáne Tahoe qunynda ózgeris joq.
Kia da modelderiniń qunyn 100 myńnan 600 myńǵa deıin arttyrǵan. Nátıjesinde bıyl shyqqan Rio 7.8-9.6 mln teńgege baǵalanyp otyr. Qysta bul kólik 7.4-9 mln teńgege satyldy.
Sorento-nyń eń arzan nusqasy 16.6 mln teńge turady. Qysta ony 15.9 mln teńgege alýǵa bolatyn edi.
Lada Vesta aqpanda 5.8 mln teńgeden satylǵan, endi ony alatyndar 6.0 mln jumsaıdy. Renault baǵasynda ázirshe ózgeris baıqalmaıdy.
Qytaıdan keletin Haval men Chery, sonymen qatar japonııalyq Subaru kólikteriniń quny burynǵy deńgeıde tur. Al JAC saıttaǵy baǵa jazylǵan tizimdi jasyryp qoıypty, soǵan qaraǵanda marka ókilderi jýyrda taýaryn jańa baǵada usynatyn sııaqty.
Volkswagen markaly birneshe modeldiń baǵasy belgili boldy. Munda sóz Polo, Taos jáne Tiguan jaıly bolyp otyr. Úsheýi de Reseıde qurastyrylady.
Polo-nyń baǵasy endi 9.1 mln teńgeden bastalady, bul aqpandaǵymen salystyrǵanda 1.5 mln teńgege joǵary. Taos krossoveri 2.8-3.2 mln teńgege qymbattap, eń arzany 14.9 mln teńgeden saýdalanyp jatyr.
Biraq bárinen Tiguan-nyń kóp qymbattaǵany baıqalady. Oǵan ústelgen soma 3.4-4.1 mln shamasynda. Iaǵnı, jaqsy jabdyqtalǵan «Tıgýandy» 24 mln teńge alýǵa bolady, al qarapaıym kólik úshin kemi 18 mln sanap berýge týra keledi.
"Adyrna" ulttyq portaly
