وسكەلەڭ ۇرپاقتىڭ سانالى تۇلعا رەتىندە قالىپتاسىپ، دامۋىنىڭ ءوزى تىكەلەي ەڭبەك ەتۋگە ۇيرەنۋىمەن بايلانىستى. جاقىندا مەملەكەت باسشىسى قاسىم جومارت توقاەۆ «QAZAQSTAN» ۇلتتىق تەلەارناسىنا بەرگەن سۇحباتىندا ء"بىز قوعامدا ەڭبەكقورلىق يدەياسىن ورنىقتىرۋىمىز كەرەك. تۋراسىن ايتايىق، بۇل قازىر ەڭ وزەكتى ماسەلە بولىپ تۇر. ازاماتتارىمىز ادال ەڭبەكپەن تابىس تابۋدى ەڭ باستى ورىنعا قويۋى قاجەت. باقۋاتتى ەل بولۋ بيلىكتىڭ جۇمىسىنا عانا ەمەس، ول، ەڭ الدىمەن، ءاربىر ازاماتتىڭ ەڭبەگىنە بايلانىستى" دەپ اتادى.
وسى تۇستا، قازاقستان ينجەنەرلىك-تەحنولوگيالىق ۋنيۆەرسيتەتى ستۋدەنتتەردى ەڭبەككە باۋلىپ، بىلىكتىلىگى مەن بىلىمدىلىگىن ارتتىرا وتىرىپ، ساپالى مامان دايارلاۋ ماقساتىندا "SANDYQ" مەيرامحاناسىنىڭ باس اسپازى سقاق ماناس ماناقباتىرۇلىمەن كەزدەسۋ وتكىزدى. ماناس سقاق ۇلتتىق اسحانامىزدى جاڭعىرتىپ جۇرگەن اسپازداردىڭ ءبىرى.
ايتا كەتسەك، "SANDYQ" مەيرامحاناسى قازاقستاندا گاسترونوميالىق تۋريزمدى دامىتۋ ماقساتىندا اشىلعان العاشقى مەيرامحانا.نەگىزگى ميسسياسى قازاق حالقىنىڭ ۇلتتىق اس مازىرىندە سيرەك دايارلانىپ، ۇمىت قالعان تاعام مادەنيەتىن قازىرگى زامان تالابىنا ساي جانداندىرۋ.
كەزدەسۋ بارىسىندا ماناس سقاق ستۋدەنتتەرمەن تانىسىپ، ءوز ءىسىنىڭ مامانى بولۋ ءۇشىن ۇزدىك ءبىلىم الىپ، ءوز بولاشاعىن دۇرىس جوسپارلاۋ قاجەتتىگىن ايتىپ، ستۋدەنتتەرگە باعىت-باعدار بەردى. جيىن سۇراق-جاۋاپ فورماتىندا وتكەن تانىمدىق ويىندارمەن جالعاسىپ، قاتىسۋشىلارعا «مي پالاۋ»، «جاۋبۇيرەك»، «بۇقپا»، «مىجىما» سىندى اتاۋى ەرەكشە ءتۇرلى تاعامدار جايىندا بەينەجازبا ۇسىنىلدى.
كەلەسى كەزەكتە وقىتۋشىلار مەن ستۋدەنتتەر باس اسپازدىڭ شەبەرلىك-ساعاتىن تاماشالادى. بۇل رەتتە اسپاز اۆتورلىق تاعامنىڭ ءبىرى ازىرلەۋ ءادىسىن ەگجەي-تەگجەيلى بايانداپ، اسپازدىق الەمنىڭ قىر-سىرىمەن ءبولىستى. كوزدىڭ جاۋىن الاتىن، ءدامى ءتىل ۇيىرەر ۇلتتىق تاعامنان ءدام تاتقان ۋنيۆەرسيتەت ۇجىمى مەن ستۋدەنتتەر جوعارى باعالادى. شەبەرلىك ساعات اياسىندا اسپاز ستۋدەنتتەرمەن مول تاجىريبە الماسىپ، كاسىبي تۇرعىدا اقىل-كەڭەس بەردى. ءوز كەزەگىندە ستۋدەنتتەر دە قوناققا ارنايى دايىندالعان تاتتىلەرىن ۇسىنىپ، اتاقتى اسپازدىڭ وڭ باعاسىن الدى.
كەزدەسۋ سوڭىندا قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گ.ءا.سارسەنەبەكوۆا قازاق حالقىنىڭ ەرەكشە ءومىر ءسۇرۋ سالتى مەن سان عاسىرلاردان بەرى قالىپتاسقان ءداستۇرلى اس ءمازىرىن ناسيحاتتاپ، بىلىكتى مامان دايىنداۋدا قوسقان ۇلەسى ءۇشىن ماناس ماناقباتىرۇلىن العىس حاتپەن ماراپاتتاپ، تاريبەلىك، پاتريوتتىق ءمانى زور كەزدەسۋدى قورىتىندىلادى.
"ادىرنا" ۇلتتىق پورتالى
