بۇگىن ايماق باسشىسى گۇلشارا ابدىقالىقوۆا كەزەكتىلىك تارتىبىمەن ازاماتتاردى جەكە ماسەلەلەرى بويىنشا ونلاين فورماتتا قابىلدادى. وبلىس اكىمىنىڭ جەكە قابىلداۋىندا 15 ازاماتتىڭ وتىنىشىتەرى قارالدى.
تۇرعىنداردىڭ ماسەلەلەرىن زەردەلەۋ ءۇشىن جيىنعا جاۋاپتى باسقارما باسشىلارى، قىزىلوردا قالاسى مەن بىرقاتار اۋدان اكىمدەرى قاتىستى.
ازاماتتاردىڭ نەگىزگى ساۋالدارىنىڭ باعىتى الەۋمەتتىك ماسەلەلەردەن تۋىندادى. ماسەلەن، 11 سۇراق تۇرعىن ءۇي كەزەگىنە باعىتتالدى. سونىمەن قاتار، الەۋمەتتىك كومەك قاراستىرۋ، جۇمىسپەن قامتۋ، كاسىپكەرلىككە قولداۋ مەن مادەنيەت باعىتى بويىنشا ۇيىرمەلەر اشۋ ماسەلەلەرى دە قارالدى.
ايماق باسشىسى تۇرعىن ءۇي كەزەك ءتىزىمى بويىنشا بەرىلەتىنىن جانە بيىلعى جىلى 1000 استام باسپانانى تابىستاۋ جوسپاردا تۇرعانىن جەتكىزدى. باسقا كوتەرىلگەن سۇراقتار بويىنشا جاۋاپتى سالا باسشىلارىنا تاپسىرما بەرىپ، زاڭ اياسىندا شۇعىل جۇمىس جاساۋ قاجەت ەكەنىن ايتتى.
ايتا كەتۋ كەرەك، ايماق باسشىسى گۇلشارا ابدىقالىقوۆا ءار ايدىڭ سوڭىندا كەزەككە سايكەس ازاماتتارعا ارنالعان جەكە قابىلداۋ وتكىزىپ كەلەدى. وتكەن جىلى وبلىس اكىمى 135 تۇرعىندى قابىلداسا، بيىلعى جىلدىڭ ەكى ايىندا 40-قا جۋىق ازاماتتىڭ سۇراقتارىنا جاۋاپ بەرىلدى.
