بۇگىن قالا اكىمى مۇرات ايتەنوۆ تاسكەن جانە مارتوبە تۇرعىن الابتاردىڭ حالقىمەن جۇزدەسىپ، ماسەلەسىن تىڭدادى.
9 مىڭنان استام حالقى بار تاسكەن تۇرعىن الاب ساپالى ەلەكتر جارىعىمەن تولىق قامتىلعان بولسا، تابيعي گاز جانە ساپالى اۋىز سۋ 98 پايىزعا شەشىلگەن. قامتىلماعان بولىگى جاڭاقۇرىلىس اۋماعى.
1500 گەكتار اۋماقتى الىپ جاتقان مارتوبە اۋىز سۋ، گاز، ەلەكتر جارىعىمەن ءجۇز پايىز قامتىلعان. مۇندا 5 مىڭنان استام تۇرعىن تۇرادى.
تاسكەندىكتەر پارمەن كوشەسىنىڭ ەلەكتر جەلىلەرى مەن باعانالارى جانە ترانسفورماتورلارىنىڭ توزىعى جەتكەنىن، جاڭاقۇرىلىس اۋماعىن ينفراقۇرىلىم جۇيەسىمەن قامتاماسىز ەتۋ ماسەلەسىن ايتسا، مارتوبە تۇرعىن الابىنىڭ حالقى سۋارمالى جەرلەر ماسەلەسى مەن مەكتەپ پەن اۋرۋحانا سالىپ بەرۋ جايىن كوتەردى.
تۇرعىنداردىڭ ءوتىنىشىن تىڭداعان قالا باسشىسى ايتىلعان ماسەلەلەر ۇزاق جانە قىسقا مەرزىمدە شەشىلەتىنىن ايتىپ، الەۋمەتتىك نىسانداردى سالۋعا كوپ ۋاقىت كەتەتىنىن جەتكىزدى. ماسەلەن، مەكتەپ پەن اۋرۋحانا سالۋ ءۇشىن سالىناتىن ورىندى تاڭداۋ، ونى دايىنداۋ، جوبالاۋ، ارى قاراي قۇرىلىستى جۇرگىزۋ پروتسەسى بار.
قالا اكىمى پارمەن كوشەسىنىڭ ەلەكتر جەلىلەرى مەن باعانالارىن جانە ترانسفورماتورلارىن اۋىستىرۋدى «وڭتۇستىك جارىق ترانزيت» جشس-نا تاپسىرسا، سالالىق باسقارماعا جاڭاقۇرىلىس اۋماعىن تابيعي گاز جانە اۋىز سۋمەن قامتاماسىز ەتۋ ءۇشىن جوبالىق سمەتالىق قۇجاتتامالارىن ازىرلەۋدى جۇكتەدى. ال، قالالىق جايلى ورتانى دامىتۋ باسقارماسىنا مارتوبە تۇرعىن الابىنىڭ سۋارمالى جەرلەر كولەمىن ەسەپتەپ، «اقسۋ» مكك مەكەمەسىمەن بىرلەسە وتىرىپ سۋ ءليميتىن كوتەرۋ كەرەكتىگىن ايتتى.
كەزدەسۋ سوڭىندا مۇرات ايتەنوۆ بۇدان بولەك، ەلدى مەكەندەردەگى كوشەلەرگە اسفالت سالۋ، جارىقتاندىرۋ جانە سپورت الاڭشالارىن سالۋ جۇمىستارى كەزەڭ-كەزەڭىمەن شەشىلەتىنىن ايتىپ، تۇرعىندار تاراپىنان كوتەرىلگەن ءاربىر ماسەلەنىڭ ورىندالۋى ءجىتى باقىلاۋدا بولاتىنىن جەتكىزدى.
