بۇگىن الماتى وبلىسىنىڭ اكىمى، «Nur Otan» پارتياسى وبلىستىق فيليالىنىڭ توراعاسى قانات بوزىمباەۆ پارتيانىڭ قوعامدىق قابىلداۋى شەڭبەرىندە جەكە ازاماتتاردى قابىلدادى. وبلىستىڭ ءار قيىرىنان ونلاين بايلانىسقا قوسىلعان 9 تۇرعىن جول جوندەۋ، اۋىز سۋ ساپاسىن جاقسارتۋ، الەۋمەتتىك قولداۋ شارالارى، تۇرعىن ۇيمەن قامتۋ، مەديتسينالىق قىزمەتتىڭ قولجەتىمدىلىگىن ارتتىرۋعا قاتىستى ساۋالدارىن قويدى، - دەپ حابارلايدى «ادىرنا» ۇلتتىق پورتالى
ماسەلەن، «كوكپەك – كەگەن - ءتۇپ» اۆتوكولىك جولىنىڭ 53-68 كم ارالىعىنداعى «قايقى اسۋى» جولىنىڭ جوندەۋ جۇمىستارى اياقتالماعاندىقتان اۋىل تۇرعىندارىنا قيىندىق تۋعىزىپ وتىر»، - دەيدى كەگەن اۋدانىنىڭ تۇرعىنى جاقسىلىق يبرايىمباي. ال كوكسۋلىق ءىلياس ۇزاقوۆ مۇسابەك پەن ءماۋلىمباي اۋىلدارىنىڭ اراسىنداعى 11 شاقىرىمدىق جول بىرنەشە مارتە قيىرشىق تاس توسەلگەنىمەن ۇزاققا شىدامايتىنىن ايتتى. سول سياقتى ىلە اۋدانىنداعى «دامۋ» يلو ماڭىنداعى تەمىر جول ارقىلى سالىنۋى ءتيىس جول ماسەلەسى دە وزەكتى. سەبەبى بۇل تەمىر جول وتكەلى «الماتى – جەتىگەن - قاپشاعاي سۋ قويماسى» اۆتوجولىندا ورنالاسقاندىقتان كولىك كەپتەلىسىن ۇلعايتىپ وتىر. وبلىستىق جولاۋشى كولىگى جانە اۆتوموبيل جولدارى باسقارماسىنىڭ باسشىسى عالىمجان دارىباەۆتىڭ ايتۋىنشا، رەسپۋبليكالىق ماڭىزى بار «كوكپەك – كەگەن - ءتۇپ» اۆتوكولىك جولىنىڭ قۇرىلىسىنا قاجەتتى قاراجات تولىق كولەمدە بولىنگەن. قۇرىلىسى بيىلعى جىلى اياقتالادى. ال كوكسۋ اۋدانىنداعى اتالعان ەكى اۋىلدىڭ اراسىنداعى جولدى جوندەۋدىڭ جوبالىق-سمەتالىق قۇجاتتاماسىن ازىرلەۋگە قارجى قاراستىرىلاتىن بولادى. «قازاۆتوجول» مەكەمەسىنىڭ قۇزىرىنداعى تەمىر جول وتكەلىن سالۋدىڭ ءتيىستى قۇجاتتامالارى ازىرلەنگەننەن كەيىن رەسپۋبليكالىق بيۋدجەتكە ءوتىنىم بەرىلمەك.
الاكول اۋدانى بۇلاقتى اۋىلىنىڭ ازىرگە تەك 20% اۋىز سۋمەن قامتىلعان، بۇل ماسەلەنى شەشۋ ءۇشىن سۋ تاراتاتىن 28 شاقىرىم جەلىنى جاڭعىرتۋ كەرەك. بۇل پروبلەما جايلى اۋىل تۇرعىندارى اتىنان ارداگەر سەرىك قاناپيانوۆ ءسوز ەتتى. جاۋاپتان بەلگىلى بولعانىنداي، اۋىلدى اۋىز سۋمەن تولىق قامتۋ باعىتىنداعى جۇمىستار بارلىق ءتيىستى قۇجاتتارى ازىرلەنىپ بىتكەن سوڭ 2023 جىلى باستالادى.
وبلىستا 1400 مۇشەسى بار ساڭىراۋلار قوعامىنىڭ جانايقايىن «جەتىسۋ» تەلەارناسىنىڭ سۋردواۋدارماشىسى ايگۇل وقپاەۆا جەتكىزدى. ەستۋ قابىلەتى بۇزىلعان بالالارعا ارنالعان مەكتەپ-ينتەرناتتىڭ وقۋشىلارى جىل سايىنعى كەزەكتى مەديتسينالىق-الەۋمەتتىك ەكسپەرتيزا ءۇشىن كومپيۋتەرلىك اۋديومەتريادان ءوتۋى قاجەت. وسى اپپارات ءۇشىن بالالار الماتىعا سابىلادى. سوندىقتان مۇنداي قاجەتتى مەديتسينالىق قۇرىلعى وبلىس ورتالىعىنا كەرەك-اق. مۇمكىندىگى شەكتەۋلى جانداردىڭ ماسەلەسىن كوتەرىپ، قابىلداۋعا ارنايى قوسىلعانى ءۇشىن ءۇشىن ا.وقپاەۆاعا وبلىس اكىمى قانات بوزىمباەۆ ريزاشىلىعىن ءبىلدىردى. جانە جارتى جىلدىڭ ىشىندە تالدىقورعان كوپ سالالى اۋرۋحاناسىنا وسىندا اپپارات ساتىپ الىناتىنىن جەتكىزدى. سونىمەن قاتار ەستۋ قابىلەتى ناشار بالالار ءۇشىن بالاباقشادا ارنايى توپ اشۋ ماسەلەسى دە زەردەلەنەتىنىن ايتتى.
«الپامىس» قوعامدىق بىرلەستىگىنىڭ تالدىقورعان قالاسىندا ورنالاسقان جەرتولەدەگى عيماراتىنا كىرەتىن جەرگە پاندۋس ورناتۋ ماسەلەسى دە قابىلداۋ بارىسىندا شەشىمىن تاپتى. بۇل ىسپەن تالدىقورعان قالالىق اكىمدىگى اينالىساتىن بولادى.
سونداي-اق تاجىك-اۋعان شەكاراسىنداعى جاۋىنگەرلىك قيمىلدارعا جانە قاقتىعىستارعا قاتىسۋشىلاردى الەۋمەتتىك قولداۋ، كەزەكپەن تۇرعىن ءۇي الۋ، گازعا قوسىلۋ قۇنىن تومەندەتۋ ماسەلەلەرى دە كوتەرىلدى.
قويىلعان ساۋالداردىڭ بارلىعىنا تولىققاندى جاۋاپتار بەرىلىپ، ولارعا قاتىستى قانات بوزىمباەۆ ءتيىستى باسقارما باسشىلارىنا تاپسىرمالار بەردى.
