وتكەن جىلى مەملەكەتتىك قىزمەت سالاسىنداعى زاڭنامانىڭ ساقتالۋى ءۇشىن 720 تەكسەرۋ جۇرگىزىلدى.
جىبەرىلگەن زاڭ بۇزۋشىلىقتار ءۇشىن 265 لاۋازىمدى تۇلعا تارتىپتىك جاۋاپكەرشىلىككە تارتىلدى. بۇل تۋرالى مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ كەڭەيتىلگەن القا وتىرىسىندا ايتتى.
سونداي - اق، 107 اكىمشىلىك ءىس قوزعالدى، ولاردىڭ ناتيجەلەرى بويىنشا 99 ادام اكىمشىلىك جاۋاپكەرشىلىككە تارتىلدى.
مەملەكەتتىك قىزمەتشىلەر اراسىندا قابىلدانعان قىزمەتتىك ادەپتەردى بۇزۋشىلىقتاردىڭ الدىن الۋ ماقساتىندا ادەپ جونىندەگى كەڭەستەرمەن 176 وتىرىس وتكىزىلدى، وندا 1129 ماسەلە قارالدى.
ادەپ جونىندەگى كەڭەستەردىڭ وتىرىستارىندا قارالعان ماسەلەلەردىڭ 48%-ى تارتىپتىك ءىس بولىپ تابىلادى.
اگەنتتىك توراعاسىنىڭ ايتۋىنشا ادەپ جونىندەگى كەڭەستەردىڭ قۇرامىن قالىپتاستىرۋ كەزىندە مەملەكەتتىك قىزمەتتەن حابارى بار ادامداردى، بىلىكتى، كورنەكتى ازاماتتىق قوعامنىڭ وكىلدەرىن، مەملەكەتتىك قىزمەتشىلەردى، دەپۋتاتتاردى دا قوسۋ قاجەت.
سونداي-اق، حالىقتىڭ ادەپ جونىندەگى كەڭەسكە سەنىمىن ارتتىرۋ ءۇشىن، ازاماتتاردى قابىلداۋ جۇمىسىنىڭ اشىقتىعىنا ەرەكشە نازار اۋدارۋ كەرەك.
«قوعامدا ادەپ جونىندەگى ۋاكىلدەر ينستيتۋتى تۋرالى جاعىمدى پىكىر قالىپتاستىرۋ ءۇشىن «ۇزدىك ادەپ جونىندەگى ۋاكىل» رەسپۋبليكالىق كونكۋرسى وتكىزىلدى. كونكۋرس قورىتىندىسىنا سايكەس، ادەپ جونىندەگى ۋاكىلدەردىڭ رەيتينگى قالىپتاستىرىلىپ، اگەنتتىكتىڭ سايتىندا ورنالاستىردى. الداعى ۋاقىتتا دا ادەپ جونىندەگى ۋاكىل قىزمەتىن تۇراقتى ۇيلەستىرۋ قاجەت»، - دەيدى دارحان جازىقباەۆ.
اگەنتتىك توراعاسى سونىمەن قاتار مەملەكەتتىك قىزمەتشىلەرگە قاتىستى باق-تا جاريالانعان سىني ماتەريالدارعا مەملەكەتتىك ورگانداردىڭ جاۋاپ بەرۋىن باقىلاۋ، قولاستىنداعىلاردىڭ سىبايلاس جەمقورلىق قىلمىستار جاساعانى ءۇشىن باسشىلاردىڭ جاۋاپكەرشىلىگىنە مونيتورينگ جۇرگىزۋ اگەنتتىكتىڭ ۇنەمى نازارىندا ەكەنىن ايتتى.
”ادىرنا” ۇلتتىق پورتالى
