قىرعىزستان پرەزيدەنتى سادىر جاپاروۆ قانداي دا ءبىر مەملەكەتتى مويىنداۋ كەز كەلگەن ەگەمەندى ەلدىڭ ءوز قۇقىعى دەپ، رەسەيدىڭ دحر مەن لحر-دى مويىنداۋى تۋرالى ءوز ۇستانىمىن ايتتى، - دەپ حابارلايدى “ادىرنا” ۇلتتىق پورتالى Sputnik اگەنتتىگىنە سىلتەمە جاساپ.
ونىڭ ايتۋىنشا، ول ۋكراينانىڭ شىعىسىنداعى جاعدايدىڭ دامۋىن الاڭداۋشىلىقپەن باقىلاپ وتىر.
"دونباسس توڭىرەگىندەگى جاعدايدى ۇنەمى باقىلاپ وتىرامىن. قىرعىزستان بۇۇ قاۋىپسىزدىك كەڭەسىنىڭ قولداۋىنا يە بولعان قاقتىعىستى رەتتەۋ جونىندەگى جالعىز قۇجات، مينسك ۋاعدالاستىقتارىن ساقتاۋ قاجەتتىلىگىن نەگىزگە الادى. وكىنىشكە وراي، ولاردىڭ ورىندالماۋى قازىرگى قيىن جاعدايعا اكەلدى", - دەپ جازدى جاپاروۆ Facebook-تە.
ول جاعداي تەك بەيبىت ديپلوماتيالىق جولمەن شەشىلەتىنىنە سەنىم ءبىلدىردى.
"ادام ءومىرى - ەڭ قۇندى نارسە. جانجال ودان ارى ۋشىعىپ كەتپەس ءۇشىن، جاعدايدى رەتتەۋ كەزىندە بارىنشا ساقتىق پەن ۇستامدىلىق تانىتۋعا شاقىرامىن. مۇمكىن، بۇل كوپتەگەن رەسەي ازاماتتارى تۇراتىن دونباسستىڭ بەيبىت تۇرعىندارىن قورعاۋ ءۇشىن قاجەت بولعان شىعار. قانداي دا ءبىر مەملەكەتتى مويىنداۋ كەز كەلگەن ەلدىڭ ەگەمەندى قۇقىعى ەكەنىن اتاپ وتكىم كەلەدى", - دەپ اتاپ ءوتتى جاپاروۆ.
“ادىرنا” ۇلتتىق پورتالى
