22 اقپان – ەندى قازاقستاندىق قىسقى سپورت اۋەسقويلارى ءۇشىن اتاۋلى كۇن بولادى. وسى كۇنى العاش رەت اقتوبە وبلىسىنىڭ تاريحىندا قىزدار مەن جىگىتتەر اراسىندا شاڭعى جارىسىنان رەسپۋبليكالىق چەمپيونات باستالدى.
بىرىنشىلىكتى وتكىزۋ اقتوبەدە شاڭعى روللەرى جولىن اشقاننان كەيىن مۇمكىن بولدى.
وبلىستىق دەنە شىنىقتىرۋ جانە سپورت باسقارماسىنىڭ باسشىسى ەۆگەني گونچاروۆ:
«جوبا «جۇمىسپەن قامتۋدىڭ جول كارتاسى» اياسىندا جۇزەگە اسىرىلعان. بۇل رەسپۋبليكا بويىنشا وسىنداي ءۇشىنشى نىسان. جالپى ۇزىندىعى 11,5 شاقىرىمدىق بارلىعى التى جول سالىندى»،- دەپ ناقتىلادى.
چەمپيوناتقا نۇر-سۇلتان مەن الماتى قالالارىنان، قوستاناي، پاۆلودار، شىعىس قازاقستان، قاراعاندى، باتىس قازاقستان، الماتى وبلىستارىنان كەلگەن 300-دەن اسا قاتىسۋشى جينالدى. اقتوبە وبلىسىنان 20 سپورتشى شىقتى. ءبارى دە جاڭا سپورت نىسانىن سىناپ كوردى. اتالمىش جولدى جارىس قارساڭىندا قاراپ شىققان ۇلتتىق وليمپيادا كوميتەتىنىڭ وكىلدەرى دە جوعارى باعالارىن بەردى.
«ادەمى بازا جانە قىزىق جول. بۇل شاڭعىشىلار ءۇشىن وتە جاقسى، ويتكەنى ءارتۇرلى جولدار، ءارتۇرلى رەلەفتەر سپورت شەبەرلىگىن شىڭداۋ ءۇشىن ارقاشان تاماشا مۇمكىندىك بولادى»، - دەدى باس تورەشى ولەگ كولومەەتس.
سپورتتىق بازا جوعارى تەحنيكالىق جابدىقتالۋىمەن دە ەرەكشەلەنەدى.
قىسقى سپورت تۇرىنەن وبلىستىق بالالار مەن جاسوسپىرىمدەر سپورت مەكتەبىنىڭ ديرەكتورى ايماعانبەت تۇرعانباي: «سپورتشىلارعا قولايلى جاعداي جاسالعان، ءبارى ريزا. ادامي فاكتوردان تۋىنداعان قاتەلەر الىنىپ تاستالدى. ماسەلەن، جارىستىڭ باستالۋ جانە اياقتالۋ ۋاقىتىن ەلەكترونيكا ءاربىر سپورتشىعا تاعىلعان چيپتەر ارقىلى انىقتايدى»،- دەپ جەتكىزدى.
ايتا كەتۋ كەرەك، بۇل مەكتەپ نەبارى جارتى جىل بۇرىن اشىلعان بولاتىن. قىسقى سپورت ءتۇرىنىڭ اۋەسقويلارى وعان ۇلكەن ءۇمىت ارتىپ وتىر. چەمپيوناتتىڭ اشىلۋىنا وبلىس اكىمى وڭداسىن ورازالين دە قاتىسىپ، سپورتشىلارعا ساتتىلىك پەن تاماشا ناتيجە كورسەتۋلەرىن تىلەدى.
«مەملەكەت باسشىسىنىڭ تاپسىرماسىنا سايكەس بۇگىن ەلىمىزدىڭ بۇكىل جەرىندە بۇقارالىق سپورتتى دامىتۋ شارالارى قابىلدانۋدا. ماتەريالدىق-تەحنيكالىق بازانى نىعايتۋعا كوپ كوڭىل ءبولىنىپ جاتىر. ءبىزدىڭ وڭىردە سونداي-اق، قىسقى سپورت تۇرلەرىنە ەرەكشە نازار اۋدارىلا وتىرا، سپورتتى دارىپتەپ، دامىتۋعا بارلىق جاعداي جاسالۋدا. سونىڭ ارقاسىندا بالالار حوككەيمەن جانە مانەرلەپ سىرعاناۋمەن اينالىسۋعا مۇمكىندىك الدى. بىلتىر شاڭعىروللەر جولى پايدالانۋعا بەرىلدى. ناتيجەسىندە بۇگىن وڭىردە شاڭعى جارىسىنان چەمپيونات وتۋدە. بۇكىل سپورتسۇيەر قاۋىمدى اتاۋلى كۇنمەن قۇتتىقتايمىن. سپورت پەن سپورت بازاسىن دامىتۋ جۇمىستارى جالعاساتىن بولادى»،- دەپ اتاپ ءوتتى وڭداسىن ورازالين.
چەمپيونات 28 اقپانعا دەيىن جالعاسادى.
"ادىرنا" ۇلتتىق پورتالى
