22 aqpan – endi qazaqstandyq qysqy sport áýesqoılary úshin ataýly kún bolady. Osy kúni alǵash ret Aqtóbe oblysynyń tarıhynda qyzdar men jigitter arasynda shańǵy jarysynan respýblıkalyq chempıonat bastaldy.
Birinshilikti ótkizý Aqtóbede shańǵy rolleri jolyn ashqannan keıin múmkin boldy.
Oblystyq dene shynyqtyrý jáne sport basqarmasynyń basshysy Evgenıı Goncharov:
«Joba «Jumyspen qamtýdyń jol kartasy» aıasynda júzege asyrylǵan. Bul respýblıka boıynsha osyndaı úshinshi nysan. Jalpy uzyndyǵy 11,5 shaqyrymdyq barlyǵy alty jol salyndy»,- dep naqtylady.
Chempıonatqa Nur-Sultan men Almaty qalalarynan, Qostanaı, Pavlodar, Shyǵys Qazaqstan, Qaraǵandy, Batys Qazaqstan, Almaty oblystarynan kelgen 300-den asa qatysýshy jınaldy. Aqtóbe oblysynan 20 sportshy shyqty. Bári de jańa sport nysanyn synap kórdi. Atalmysh joldy jarys qarsańynda qarap shyqqan Ulttyq olımpıada komıtetiniń ókilderi de joǵary baǵalaryn berdi.
«Ádemi baza jáne qyzyq jol. Bul shańǵyshylar úshin óte jaqsy, óıtkeni ártúrli joldar, ártúrli relefter sport sheberligin shyńdaý úshin árqashan tamasha múmkindik bolady», - dedi bas tóreshi Oleg Kolomee.
Sporttyq baza joǵary tehnıkalyq jabdyqtalýymen de erekshelenedi.
Qysqy sport túrinen oblystyq balalar men jasóspirimder sport mektebiniń dırektory Aımaǵanbet Turǵanbaı: «Sportshylarǵa qolaıly jaǵdaı jasalǵan, bári rıza. Adamı faktordan týyndaǵan qateler alynyp tastaldy. Máselen, jarystyń bastalý jáne aıaqtalý ýaqytyn elektronıka árbir sportshyǵa taǵylǵan chıpter arqyly anyqtaıdy»,- dep jetkizdi.
Aıta ketý kerek, bul mektep nebári jarty jyl buryn ashylǵan bolatyn. Qysqy sport túriniń áýesqoılary oǵan úlken úmit artyp otyr. Chempıonattyń ashylýyna oblys ákimi Ońdasyn Orazalın de qatysyp, sportshylarǵa sáttilik pen tamasha nátıje kórsetýlerin tiledi.
«Memleket basshysynyń tapsyrmasyna sáıkes búgin elimizdiń búkil jerinde buqaralyq sportty damytý sharalary qabyldanýda. Materıaldyq-tehnıkalyq bazany nyǵaıtýǵa kóp kóńil bólinip jatyr. Bizdiń óńirde sondaı-aq, qysqy sport túrlerine erekshe nazar aýdaryla otyra, sportty dáriptep, damytýǵa barlyq jaǵdaı jasalýda. Sonyń arqasynda balalar hokkeımen jáne mánerlep syrǵanaýmen aınalysýǵa múmkindik aldy. Byltyr shańǵyroller joly paıdalanýǵa berildi. Nátıjesinde búgin óńirde shańǵy jarysynan chempıonat ótýde. Búkil sportsúıer qaýymdy ataýly kúnmen quttyqtaımyn. Sport pen sport bazasyn damytý jumystary jalǵasatyn bolady»,- dep atap ótti ońdasyn Orazalın.
Chempıonat 28 aqpanǵa deıin jalǵasady.
"Adyrna" ulttyq portaly
