بەلگىلى ايتىسكەر اقىن، "الاتاۋ" ءداستۇرلى ونەر تەاترىنىڭ ديرەكتورى رينات زايىتوۆ "Aitys Masa" YouTube ارناسىنا بەرگەن سۇقباتىندا قوعام ىشىندە "رينات زايىتوۆقا شىندىق ايتقىزباس ءۇشىن جىلى جۇمساق ورىن بەرىپ، ونىڭ اۋزىن جاپتى، ساتىپ الدى" دەگەن كەڭ تارالعان پىكىرگە قاتىستى ءوز ويىن ءبىلدىردى. بۇل تۋرالى "ادىرنا" ۇلتتىق پورتالى جازادى.
"اركىم وزىنشە تارازىلاسىن. بىراق، مەنىڭ قازىرگى ىستەپ جۇرگەن جۇمىسىم - ەڭ ءبىرىنشى سونى انىقتاپ الۋ كەرەك. ول ءبىر جىلى جۇمساق جەر نە بولماسا ەرتەڭگى ءبىر قوعامعا اسەر ەتەتىن كۇشى بار كەرەمەت جەر ەمەس. ول ءوزىمنىڭ ۇيرەنگەن، بالا كەزدەن ىستەگەن جەرىم - تەاتر. ول جەردىڭ ايلىعى - 200 مىڭ تەڭگە، قولىنا 160 مىڭ با، 170 مىڭ با سونداي تەڭگە الاسىڭ. بالكىم، ول جەردەن اقشا ۇرلاۋعا بولاتىن شىعار. مەن ونى بىلمەيمىن. ويتكەنى، مەملەكەتتىك مەكەمەنىڭ بارىنەن اقشا ۇرلاي بەرەدى عوي ادامدار قازىر. وتىرىك ايتپايمىن، وعان ارەكەت جاساپ كورمەپپىن. جاسايمىن دەگەن ويىمدا دا جوق. وسىدان 2 كۇن بۇرىن باستىعىممەن، قالا باسشىلىعى ءبارى اۋىسىپ جاتقاننان كەيىن، بارىپ ايتتىم: "مەن كەتە بەرەيىنشى جۇمىستان. كەلەسى باسشىلىقپەن ىستەسە الامىن با؟ ىستەسە المايمىن با؟ - دەپ. جوق، ازىرشە جۇرە تۇر دەدى". ول جەرگە مەن بارىپ، مىسالى "مەن ۇندەمەي قالام، ماعان جۇمىس بەرىڭدەر" دەگەن جوقپىن، - دەيدى رينات زايىتوۆ.
ايتۋىنشا، وعان اكىمشىلىك "قوعامعا پايداڭدى كەلتىرگىڭ كەلسە، مەملەكەتكە پايداڭدى كەلتىرگىڭ كەلسە، جۇمىس ىستەپ، بىزگە كومەكتەس. ءبىز سونىڭ اياسىندا ءوز جۇمىسىمىزدى ىستەي بەرەمىز. ويتكەنى، كوپتەگەن ارانداتۋشىلار سەنىڭ ءسوزىڭدى پايدالانىپ كەتەدى" دەپ ۇسىنىس بىلدىرگەن.
"بىراق، ول جەردە، باسقا جەرلەردە دە، ايتىستا دا ايتقانمىن: "مينيستر قىلىپ قويسا دا، مىنەزىمدى ساتپايمىن" دەپ. يۋتۋبتا نەشە ءتۇرلى جەردە ايتادى عوي. رينات زايىتوۆ مىناداي جەرگە باستىق بولىپتى دەپ. انا عيماراتتىڭ قۇلاعالى تۇرعانىن نەگە ەشكىم ايتپايدى، ول قۇلاعالى تۇرعان عيمارات نەگىزى... كۇردەلى جوندەۋدەن وتپەسە... ونى سالعان ادام تۇرمەدە وتىر، سالىنعانىنا التى-اق جىل بولعان. بىراق، قالاي بولسا سولاي سالىنعان. ىشىندە ۇرلانعانىن ايتپاعان دا. كۇردەلى جوندەۋدەن وتپەيتىن بولسا، ول جەردە جۇمىس ىستەۋ ەندى ءبىر جىلدان كەيىن وتە قاۋىپتى بولا باستايدى. وسىنىڭ بارلىعىن ەشكىم ايتپايدى. جىلى، جۇمساق جەر دەپ... جوق، مەنىڭ بارعان ماقساتىم - ەڭ بولماسا، اناۋ 200 ادامعا جاقسىلىق جاساي الاتىن قولىمدا بيلىك بولۋى كەرەك. سولاردىڭ ايلىقتارىن ورنىمەن ۋاقىتىندا الىپ بەرۋ، ولاردىڭ مەملەكەتتەن بولىنگەن پرەميالارىن جەپ قويماي، قولدارىنا جەتكىزىپ بەرۋ. ولاردىڭ تەاتردان، كينوزالدان ءتۇسىپ جاتقان تابىستارىن جەپ، اندا-مىندا جىمقىرماي، سولاردىڭ كوزدەرىنە كورسەتىپ، مىنە-مىنە مىنا اقشا مىندا كەتتى، مىناۋ بىلاي كەتتى دەپ... بىزدە سونداي ءبىر ورتا قالىپتاستىرعىم كەلدى. سوسىن باسقالارعا ايتقىم كەلدى. مىنە، بىلاي ىستەۋگە بولادى ەكەن دەپ...، - دەيدى زايىتوۆ.
"ەگەر بۇكىل گاپ مەنىڭ جۇمىسىمدا عانا بولاتىن بولسا، ايتىپ وتىرمىن عوي. مەن الدىنگۇنى دە جازعام، قازىر دە كەتە بەرە الامىن ول جەردەن. مەنى ول جەردە ۇستاپ وتقان ەشنارسە جوق! بىراق، ءبىزدىڭ قازاقستاندا ءوزى سول قامالماعان، ولمەگەن ادامدار ءبارى شەتىنەن جەكسۇرىن. وعان ۇيرەنىپ قالدىق قازىر...",- دەپ كۇيىندى اقىن...
"ادىرنا" ۇلتتىق پورتالى
