Belgili aıtysker aqyn, "Alataý" dástúrli óner teatrynyń dırektory Rınat Zaıytov "Aitys Masa" YouTube arnasyna bergen suqbatynda qoǵam ishinde "Rınat Zaıytovqa shyndyq aıtqyzbas úshin jyly jumsaq oryn berip, onyń aýzyn japty, satyp aldy" degen keń taralǵan pikirge qatysty óz oıyn bildirdi. Bul týraly "Adyrna" ulttyq portaly jazady.
"Árkim ózinshe tarazylasyn. Biraq, meniń qazirgi istep júrgen jumysym - eń birinshi sony anyqtap alý kerek. Ol bir jyly jumsaq jer ne bolmasa erteńgi bir qoǵamǵa áser etetin kúshi bar keremet jer emes. Ol ózimniń úırengen, bala kezden istegen jerim - teatr. Ol jerdiń aılyǵy - 200 myń teńge, qolyna 160 myń ba, 170 myń ba sondaı teńge alasyń. Bálkim, ol jerden aqsha urlaýǵa bolatyn shyǵar. Men ony bilmeımin. Óıtkeni, memlekettik mekemeniń bárinen aqsha urlaı beredi ǵoı adamdar qazir. Ótirik aıtpaımyn, oǵan áreket jasap kórmeppin. Jasaımyn degen oıymda da joq. Osydan 2 kún buryn bastyǵymmen, qala basshylyǵy bári aýysyp jatqannan keıin, baryp aıttym: "Men kete bereıinshi jumystan. Kelesi basshylyqpen istese alamyn ba? Istese almaımyn ba? - dep. Joq, ázirshe júre tur dedi". Ol jerge men baryp, mysaly "Men úndemeı qalam, maǵan jumys berińder" degen joqpyn, - deıdi Rınat Zaıytov.
Aıtýynsha, oǵan ákimshilik "qoǵamǵa paıdańdy keltirgiń kelse, memleketke paıdańdy keltirgiń kelse, jumys istep, bizge kómektes. Biz sonyń aıasynda óz jumysymyzdy isteı beremiz. Óıtkeni, kóptegen arandatýshylar seniń sózińdi paıdalanyp ketedi" dep usynys bildirgen.
"Biraq, ol jerde, basqa jerlerde de, aıtysta da aıtqanmyn: "Mınıstr qylyp qoısa da, minezimdi satpaımyn" dep. Iýtýbta neshe túrli jerde aıtady ǵoı. Rınat Zaıytov mynadaı jerge bastyq bolypty dep. Ana ǵımarattyń qulaǵaly turǵanyn nege eshkim aıtpaıdy, ol qulaǵaly turǵan ǵımarat negizi... Kúrdeli jóndeýden ótpese... Ony salǵan adam túrmede otyr, salynǵanyna alty-aq jyl bolǵan. Biraq, qalaı bolsa solaı salynǵan. Ishinde urlanǵanyn aıtpaǵan da. Kúrdeli jóndeýden ótpeıtin bolsa, ol jerde jumys isteý endi bir jyldan keıin óte qaýipti bola bastaıdy. Osynyń barlyǵyn eshkim aıtpaıdy. Jyly, jumsaq jer dep... Joq, meniń barǵan maqsatym - eń bolmasa, anaý 200 adamǵa jaqsylyq jasaı alatyn qolymda bılik bolýy kerek. Solardyń aılyqtaryn ornymen ýaqytynda alyp berý, olardyń memleketten bólingen premııalaryn jep qoımaı, qoldaryna jetkizip berý. Olardyń teatrdan, kınozaldan túsip jatqan tabystaryn jep, anda-mynda jymqyrmaı, solardyń kózderine kórsetip, mine-mine myna aqsha mynda ketti, mynaý bylaı ketti dep... Bizde sondaı bir orta qalyptastyrǵym keldi. Sosyn basqalarǵa aıtqym keldi. Mine, bylaı isteýge bolady eken dep..., - deıdi Zaıytov.
"Eger búkil gáp meniń jumysymda ǵana bolatyn bolsa, aıtyp otyrmyn ǵoı. Men aldyngúni de jazǵam, qazir de kete bere alamyn ol jerden. Meni ol jerde ustap otqan eshnárse joq! Biraq, bizdiń Qazaqstanda ózi sol qamalmaǵan, ólmegen adamdar bári shetinen jeksuryn. Oǵan úırenip qaldyq qazir...",- dep kúıindi aqyn...
"Adyrna" ulttyq portaly
