اتىراۋ وبلىسىنىڭ بۇرىنعى اكىمى بەرگەي رىسقاليەۆ لوندونداعى قىمبات ۇيلەرىنىڭ ءبىرى One Hyde Park الدىندا بولجام بويىنشا تۇڭعىش پرەزيدەنت نۇرسۇلتان نازارباەۆتىڭ وققاعارلارىن ۆيدەوعا ءتۇسىرىپ الدى، دەپ حابارلايدى "ادىرنا" ۇلتتىق پورتالى orda.kz-كە سىلتەمە جاساپ. بۇل تۋرالى ۆيدەونى بەرگەي رىسقاليەۆ ءوزىنىڭ Instagram پاراقشاسىندا جاريالادى.
قاسىندا جينالعان جۇرتشىلىقپەن بىرگە ايقايلاپ، نۇرسۇلتان نازارباەۆتىڭ شىعۋىن تالاپ ەتتى. «نازارباەۆ – ۇرى! نازارباەۆ – قازاقستاننىڭ جاۋى!» دەگەن ۇراندار ايتىلدى.
– مىنا جەردە ديكتاتور نازارباەۆ ءوز قازاقتارىنان قاشىپ كەتتى. بۇل قازاقتىڭ جاۋى. ول – نومەر ءبىرىنشى ۇرى. ونى بىلە بەرىڭىزدەر. سەبەبى، بۇل سياكتى ۇرى قازاقستاننان 200 ميلليارد ۇرلاپ كەتكەن. ەكى بۋىن قازاقتى تاقىرعا وتىرعىزعان. بۇنداي ۇرى دۇنيە جۇزىندە جوق. ءوز قازاقتارىنان قاشىپ، 50 وققاعارىمەن بىرگە قازىر عانا قاشىپ كەتتى، – دەدى بەرگەي رىسقاليەۆ.
ەسكە سالساق، بەرگەي رىسقاليەۆ 2006-2012 جىلدار ارالىعىندا اتىراۋ قالاسى مەن اتىراۋ وبلىسىنىڭ اكىمى قىزمەتىن اتقارعان. 2013 جىلى ەكس-اكىمگە اسا ءىرى كولەمدە بيۋدجەت قاراجاتىن جىمقىردى جانە قىلمىستىق توپ قۇردى دەگەن ايىپ تاعىلعان بولاتىن. تەرگەۋ بەس جىلعا سوزىلىپ، 2019 جىلى قازاقستاندىق سوت بەرگەي رىسقاليەۆتى 17 جىلعا، ونىڭ اعاسى، ءماجىلىستىڭ ەكس-دەپۋتاتى ارمانجان رىسقاليەۆتى 16 جىلعا باس بوستاندىعىنان ايىردى. ەكى ۇكىم دە سىرتتاي شىعارىلدى. 2020 جىلدىڭ جازىندا قازاقستاندىق سوت بەرگەي رىسقاليەۆتىڭ وتباسى مەن جاقىندارىنان تاركىلەنگەن مۇلىكتىڭ «ءبىر بولىگىن» قايتارۋدى بۇيىردى. رىسقاليەۆتىڭ مۇلكىن قايتارۋعا قاتىستى كاسساتسيالىق شاعىمىن قازاقستاننىڭ باس پروكۋراتۋراسى بەرىپ، ونى جوعارعى سوت تەز ارادا ماقۇلدادى.
"ادىرنا" ۇلتتىق پورتالى
