شىمكەنت قالاسىنىڭ اكىمى مۇرات ايتەنوۆ تاسساي تۇرعىن الابى مەن نۇرتاس جانە ميراس شاعىن اۋدان تۇرعىندارىنىڭ ءوتىنىشىن تىڭداپ، حالىقتى تولعاندىرعان كەز كەلگەن ماسەلەنىڭ نازاردان تىس قالمايتىنىن، ولاردىڭ كۇن تارتىبىنەن تۇسپەيتىنىن جەتكىزدى.
10 مىڭنان استام تۇرعىنى بار تاسساي تۇرعىن الابى ساپالى ەلەكتر جانە اۋىز سۋمەن تولىق قامتىلعان بولسا، تابيعي گازبەن 80 پايىزى قامتىلعان. قالعان 20 پايىزىن كوگىلدىر وتىنعا قوسۋ بويىنشا قۇرىلىس جۇمىستارى جۇرگىزىلۋدە. اياقتالۋ مەرزىمى 2022 جىل. ال، كارىز جۇيەسىمەن قامتۋ ماقساتىندا «سارىاعاش امان» جشس مەكەمەسى تاراپىنان قۇرىلىس جۇمىستارى جۇرگىزىلۋدە. قۇرىلىسى جىل سوڭىندا اياقتالادى دەپ جوسپارلانۋدا. سونىمەن بىرگە بيىل ينتەرنەت ساپاسىن جوعارلاتۋ بويىنشا 1 بازالىق ستانتسيا ورناتىلادى.
نۇرتاس شاعىندانىندا تۇراتىن 16 مىڭعا جۋىق حالىق پەن ميراس شاعىن اۋدانىنداعى 4 مىڭنان استام تۇرعىن تولىق تابيعي گازبەن، ەلەكتر جارىعىمەن، اۋىز سۋمەن قامتىلعان. وتكەن جىلى بۇل ەلدىمەكەندەردە جالپى 5 كوشە جارىقتاندىرىلىپ، 4 سپورت الاڭشا سالىنعان. ميراستا بۇگىندە كارىز جۇەسىنىڭ قۇرىلىسى جۇرگىزىلۋدە.
جەرگىلىكتى تۇرعىندار قازىلعان جولداردى قالپىنا كەلتىرۋ، تاس جولدارعا اسفالت سالۋ ماسەلەسىن ايتتى.
قالا باسشىسى 2022-2023 جىلدارى جاڭاقۇرىلىس اۋماعىندا ينفراقۇرىلىم جۇيەلەرى اياقتالۋىنا وراي، كوشەلەردى اسفالتتاۋ جۇمىستارى جۇرگىزىلەتىنىن جەتكىزدى. سونىمەن قوسا، ءاربىر ەلدى مەكەندە كوتەرىلگەن پروبلەمالىق ماسەلەلەردى شەشۋ بويىنشا اكىمدىكتە ارنايى جيىن ۇيىمداستىرىلىپ، تالقىلانادى جانە شەشۋ مەرزىمى بەلگىلەنەدى دەدى.
