جاستار جانە ومىرلىك ماقسات

1981
Adyrna.kz Telegram

ءبىر وقۋشى قىزدىڭ اناسى جامان اۋرۋدان قايتىس بولادى. قاتتى قايعىرادى. جىلاۋمەن جاعدايدى وزگەرتە المايتىنىن ۇققان قارشاداي قىز مۇعالىمىنە بارىپ، اناسىنان ايىرعان اۋرۋعا شيپا تاپقىسى كەلەتىنىن جەتكىزەدى. مۇعالىم ول ءۇشىن دارىگەر بولۋ كەرەك ەكەنىن، دارىگەر بولۋ ءۇشىن بيولوگيانى جاقسى وقۋ كەرەك ەكەنىن ايتادى.

سول ساتتەن باستاپ قارشاداي قىز بيولوگياعا دەن قويادى. الدىمەن ءوز مەكتەبىندە بيولوگيا ءپانىنىڭ بىلگىرى بولىپ شىعادى، سوسىن اۋدانىندا، كەيىننەن ەلىندە وليميادا جۇلدەگەرى بولادى. وبىردىڭ اناسىن الىپ كەتكەن ءتۇرىن زەرتتەۋمەن اينالىساتىن ەڭ مىقتى جوعارعى وقۋ ورنىنىڭ پروفەسسورىنا حات جازىپ، كانيكۋلدا تەگىن كومەكتەسە باستايدى.

“بۇل اۋرۋمەن جىلىنا الەمدە پالەنباي مىڭ ادام قايتىس بولادى. مەنىڭ ماقساتىم وسى اۋرۋدىڭ ەمىن تابۋ. مەن سياقتى قىزدار اناسىنان ايىرىلماسا ەكەن دەيمىن. ول ءۇشىن وسىنداي جولدان ءوتتىم. جامان اۋرۋدىڭ ەمىن تابۋ ءۇشىن عالىمدار قانداي ماسەلەگە تاپ بولعانىن، ونى نەگە شەشە الماي جاتقانىن بىلەمىن” دەپ ەسسە جازادى. بەلگىلى ءبىر ۋنيۆەرسيتەت جاس تۇلەكتى قۋانا-قۋانا وقۋعا قابىلدايدى.

مەكتەپ وقۋشىلارىمەن كەزدەستىم. وسى اڭگىمەنى ايتىپ بەردىم. جوعارعى سىنىپ وقۋشىلارىن قاي ۋنيۆەرسيتەتكە تۇسەم، كىم بولام دەگەن سۇراق الاڭداتادى.

ول سۇراققا جاۋاپ بەرۋ ءۇشىن الگى قارشاداي قىز سياقتى ومىردە الدىڭا ماقسات قويۋ كەرەك. ماقساتتىڭ ەكى ءتۇرى بولادى: جەكە نەمەسە قوعامدىق ماقسات. جەكە ماقساتتىڭ ءتۇرى كوپ: وقۋعا ءتۇسۋ، ماماندىق الۋ، ءۇيلى بولۋ، كۇيلى بولۋ، جۇمىسقا تۇرۋ… ال قوعامدىق ماقسات قوعام تاپ بولعان ماسەلەنى شەشۋ. ومىرلىك ماقسات نەمەسە ميسسيا جەكە ماقساتتان ەمەس، قوعامدىق ماقساتتان تۇرسا باياندى بولادى.

ماسلوۋدىڭ قاجەتتىلىك پيراميداسىندا ونى ترانستسەندەنتال قاجەتتىلىك دەيدى. قالعان ەكى قاجەتتىلىك - فيزيولوگيالىق جانە پسيحولوگيالىق قاجەتتىلىكتەر دۇنيەدەن الۋ بولسا، ترانستسەندەنتال قاجەتتىلىك دۇنيەگە بەرۋ.

قوعامدىق ماقساتتى ورىنداعان ادامنىڭ اۆتوماتتى تۇردە جەكە ماقساتى دا ورىندالادى.

وبىردى جەڭۋمەن اينالىسقىسى كەلگەن قىزعا قايدا وقۋعا تۇسسە دە ءبارىبىر ەدى، ەڭ باستىسى سول اۋرۋمەن اينالىساتىن ۋنيۆەرسيتەت بولسا بولدى. ول ءۇيدى، كۇيدى، ەرتەڭ قايدا جۇمىسقا تۇرام دەپ ويلامادى. ول ومىرلىك ماقساتىنا بارار جولدا مىقتى مامان بولادى. مىقتى مامانعا سۇرانىس كوپ، ايلىعى جوعارى.

سوندىقتان، جاستار ومىرلىك ماقسات جولىنا ءتۇسۋى كەرەك. ال ومىرلىك ماقسات قازىرگى الەم تاپ بولعان مىڭداعان پروبلەمانىڭ شەشىمىن ىزدەۋدەن باستالادى.

پىكىرلەر