Bir oqýshy qyzdyń anasy jaman aýrýdan qaıtys bolady. Qatty qaıǵyrady. Jylaýmen jaǵdaıdy ózgerte almaıtynyn uqqan qarshadaı qyz muǵalimine baryp, anasynan aıyrǵan aýrýǵa shıpa tapqysy keletinin jetkizedi. Muǵalim ol úshin dáriger bolý kerek ekenin, dáriger bolý úshin bıologııany jaqsy oqý kerek ekenin aıtady.
Sol sátten bastap qarshadaı qyz bıologııaǵa den qoıady. Aldymen óz mektebinde bıologııa pániniń bilgiri bolyp shyǵady, sosyn aýdanynda, keıinnen elinde olımıada júldegeri bolady. Obyrdyń anasyn alyp ketken túrin zertteýmen aınalysatyn eń myqty joǵarǵy oqý ornynyń professoryna hat jazyp, kanıkýlda tegin kómektese bastaıdy.
“Bul aýrýmen jylyna álemde pálenbaı myń adam qaıtys bolady. Meniń maqsatym osy aýrýdyń emin tabý. Men sııaqty qyzdar anasynan aıyrylmasa eken deımin. Ol úshin osyndaı joldan óttim. Jaman aýrýdyń emin tabý úshin ǵalymdar qandaı máselege tap bolǵanyn, ony nege sheshe almaı jatqanyn bilemin” dep esse jazady. Belgili bir ýnıversıtet jas túlekti qýana-qýana oqýǵa qabyldaıdy.
Mektep oqýshylarymen kezdestim. Osy áńgimeni aıtyp berdim. Joǵarǵy synyp oqýshylaryn qaı ýnıversıtetke túsem, kim bolam degen suraq alańdatady.
Ol suraqqa jaýap berý úshin álgi qarshadaı qyz sııaqty ómirde aldyńa maqsat qoıý kerek. Maqsattyń eki túri bolady: jeke nemese qoǵamdyq maqsat. Jeke maqsattyń túri kóp: oqýǵa túsý, mamandyq alý, úıli bolý, kúıli bolý, jumysqa turý… Al qoǵamdyq maqsat qoǵam tap bolǵan máseleni sheshý. Ómirlik maqsat nemese mıssııa jeke maqsattan emes, qoǵamdyq maqsattan tursa baıandy bolady.
Masloýdyń qajettilik pıramıdasynda ony transendental qajettilik deıdi. Qalǵan eki qajettilik - fızıologııalyq jáne psıhologııalyq qajettilikter dúnıeden alý bolsa, transendental qajettilik dúnıege berý.
Qoǵamdyq maqsatty oryndaǵan adamnyń avtomatty túrde jeke maqsaty da oryndalady.
Obyrdy jeńýmen aınalysqysy kelgen qyzǵa qaıda oqýǵa tússe de báribir edi, eń bastysy sol aýrýmen aınalysatyn ýnıversıtet bolsa boldy. Ol úıdi, kúıdi, erteń qaıda jumysqa turam dep oılamady. Ol ómirlik maqsatyna barar jolda myqty maman bolady. Myqty mamanǵa suranys kóp, aılyǵy joǵary.
Sondyqtan, jastar ómirlik maqsat jolyna túsýi kerek. Al ómirlik maqsat qazirgi álem tap bolǵan myńdaǵan problemanyń sheshimin izdeýden bastalady.
