ازامات ساتىبالدى جۇرگەنوۆ اتىنداعى ونەر اكادەمياسىنىڭ رەكتورى بولدى

4819
Adyrna.kz Telegram

ازامات ساتىبالدى الماتى قالاسىنداعى تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى بولىپ تاعايىندالدى، دەپ حابارلايدى "ادىرنا" ۇلتتىق پورتالى. قۋانىشتى حاباردى قر ۇلتتىق مۋزەيىنىڭ ديرەكتورى ارىستانبەك مۇحامەديۇلى ءوز فەيسبۋك پاراقشاسىندا جاريا ەتتى. 

- قۇرمەتتى دوستار، تانىمال كينو جانە تەاتر اكتەرى، تەلەجۇرگىزۋشى، قازاقستاننىڭ ەڭبەك سىڭىرگەن قايراتكەرى ازامات ساتىبالدىنى ت.ق. جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى بولىپ تاعايىندالۋىمەن شىن جۇرەكتەن قۇتتىقتايمىن!

ونەر ادامىنىڭ تاعدىرى ەرەكشە!  قالىڭ كورەرمەن قاۋىم ازاماتتى تەاتر جانە كينو ونەرىنىڭ دامۋىنا ولشەۋسىز ۇلەس قوسىپ جۇرگەن دارىنى ەرەكشە ونەر يەسى رەتىندە تانيدى.

ستيۆەن كينگتىڭ «تابىستى ادام مەن تالانتتى ادامنىڭ جالعىز ايىرماشىلىعى – ەرىنبەي ەڭبەك ەتۋىندە» دەگەن كەرەمەت ءسوزى بار. بىلىكتىلىگى مەن ءبىلىمىن، ىسكەرلىگى مەن جىگەرىن ورايلى ۇشتاستىرا بىلگەن ازاماتتىڭ قازاق ونەرىنىڭ بولاشاقتاعى بەت-بەينەسىن قالىپتاستىراتىن ناعىز كاسىبي ماماندار دايىنداۋ باعىتىندا بارلىق قارىم-قابىلەتىن جۇمسايتىنىنا سەنىمىم مول. ازامات ساتىبالدىۇلىن جاۋاپتى قىزمەتكە تاعايىندالۋىمەن قۇتتىقتاي وتىرىپ، الداعى قىزمەتىنە سəتتىلىك جانە تابىس تىلەيمىن!، -  دەپ جازدى ول.

ەستەرىڭىزگە سالا كەتەيىك، بۇعان دەيىن ازامات ساتىبالدىنىڭ مۇسىرەپوۆ اتىنداعى بالالار مەن جاسوسپىرىمدەر تەاترىنىڭ ديرەكتورى قىزمەتىنەن كەتكەنىن حابارلاعان بولاتىنبىز. 

"ادىرنا" ۇلتتىق پورتالى

پىكىرلەر