مەملەكەت باسشىسى قاسىم-جومارت توقاەۆ ۇلتتىق قاۋىپسىزدىك كوميتەتىنىڭ توراعاسى ەرمەك ساعىمباەۆتى قابىلدادى، دەپ حابارلايدى "ادىرنا" ۇلتتىق پورتالى.
سەنبى، 25 قازانداعى كەزدەسۋ بارىسىندا ۆەدومستۆونىڭ بيىلعى اتقارعان جۇمىستارىنىڭ ناتيجەلەرى مەن الداعى جوسپارلارى تالقىلاندى.
كەزدەسۋ سوڭىندا پرەزيدەنت قاسىم-جومارت توقاەۆ ۇلتتىق قاۋىپسىزدىك ورگاندارىنىڭ قىزمەتىن كۇشەيتۋگە باعىتتالعان بىرقاتار ناقتى تاپسىرما بەردى.
كەزدەسۋدەن كەيىن مەملەكەت باسشىسىنىڭ وكىمىمەن قاناتاي دالماتوۆ ۇقك توراعاسىنىڭ ورىنباسارى قىزمەتىنەن بوساتىلعانى بەلگىلى بولدى.
قاناتاي دالماتوۆ 2024 جىلدىڭ قازان ايىنان بەرى ۇلتتىق قاۋىپسىزدىك كوميتەتى توراعاسىنىڭ ورىنباسارى لاۋازىمىندا بولعان. بۇعان دەيىن ول 2023–2024 جىلدارى قازاقستان قارۋلى كۇشتەرىنىڭ باس بارلاۋ باسقارماسىنىڭ باستىعى قىزمەتىن اتقارعان، ال 2000–2023 جىلدار ارالىعىندا ۇلتتىق قاۋىپسىزدىك ورگاندارىندا جانە شەكارا قىزمەتىندە جەدەل جانە باسشىلىق لاۋازىمداردا قىزمەت ەتكەن.
ۇقك توراعاسىنىڭ ورىنباسارى قىزمەتىنە مارات يرمەنوۆ تاعايىندالدى.
2022 جىلدىڭ قاڭتار ايىندا مارات يرمەنوۆ الماتى قالاسى بويىنشا ۇلتتىق قاۋىپسىزدىك كوميتەتى دەپارتامەنتىنىڭ باستىعى بولىپ تاعايىندالعان. بۇعان دەيىن، 2020 جىلدىڭ اقپانىنان باستاپ، ول جامبىل وبلىسى بويىنشا ۇقك دەپارتامەنتىنىڭ باستىعى قىزمەتىن اتقارعان.
بۇل لاۋازىمعا ول قورداي اۋدانىنداعى تارتىپسىزدىكتەردەن كەيىن تاعايىندالعان ەدى.
2016–2020 جىلدار ارالىعىندا يرمەنوۆ اقتوبە وبلىسى بويىنشا ۇقك دەپارتامەنتىنىڭ باستىعى بولدى. وعان دەيىن الماتى قالاسى بويىنشا ۇقك دەپارتامەنتى باستىعىنىڭ ءبىرىنشى ورىنباسارى قىزمەتىن اتقارعان.
