وتاندىق ءانشى تامارا اسار ماڭعىستاۋ وبلىسىندا سۇيىتىلعان گاز باعاسىنىڭ قىمباتتاۋىنا سەبەپشى بولدى دەپ قاماۋعا الىنعان ماڭعىستاۋ وبلىسى اكىمىنىڭ ورىنباسارى عالىمجان نيازوۆقا قولداۋ ءبىلدىردى. ول عالىمجان نيازوۆتىڭ حالىق جازۋشىسى ءابىش كەكىلباەۆتىڭ ۇرپاعى ەكەنىن جانە تاربيە-بىلىممەن تولىققان تەكتى كىسى ءوز حالقىنىڭ ناپاقاسىن جەيتىن جەمقور، قىلمىسكەر ەمەس ەكەنىنە كامىل سەنەتىنىن ايتتى، دەپ حابارلايدى "ادىرنا" ۇلتتىق پورتالى. بۇل تۋرالى تامارا اسار ءوزىنىڭ Instagram-داعى پاراقشاسىندا جازدى.
"فوتودا جالاۋدىڭ جانىنداعى ءجۇزى جىلى كىسى ماڭعىستاۋ وبلىسىندا رەسمي قىزمەتتەر اتقارعان، قوعامدىق جۇمىستارعا بەلسەنە ارالاسقان، تەرەڭىرەك تانىستىرسام، زامانا زاڭعارى، ادەبيەتتىڭ الىبى ءابىش كەكىلباەۆتىڭ اكەسى كەكىلبايدىڭ ءىنىسى مۇقىردىڭ كەنجەسى عالىمجان مۇقىرۇلى نيازوۆ. مۇقىر اكەي سوعىس ارداگەرى، ەل باسقارعان، ازۋلى ادۋىندى قاريا ەدى. قىسقاسى عالىمجان اسىلدىڭ سىنىعى، ءابىشتىڭ ۇرپاعى، بەس بالانىڭ اكەسى، قۇدابايقىزى ەلميرانىڭ قۇداي قوسقان جارى. سۇيەكتەن قۋسام تۋىسىم، جۇرەكتەن قۋسام قامقورشى ادال دوس-اعام!
ءدال وسى ازامات ءوزى تۋىپ وسكەن جەرىن قاناپ، قىزمەتتەگى لاۋازىمىن شەكتەن تىس قولدانىپ، گاز باعاسىن قىمباتتاتىپ، حالقىنىڭ ناپاقاسىن جەگەن جەمقور دەگەنگە سەنە الماي ءجۇرمىن. سەبەبى ول ۋىزىنا قانعان، تاربيە-بىلىممەن تولىققان تەكتى كىسى.
قارىنداستىق جۇرەكپەن جازعان وسى جازبام نيازوۆتار، كەكىلباەۆتار اۋلەتتەرىنە ءسال دە بولسا رۋحاني قولداۋ بولسا ەكەن. اقيقاتتىڭ تاڭى تۋىپ، عالىمجان مۇقىرۇلىنىڭ اقتالۋىن اللادان تىلەيمىن. ادىلدىكتى قۇزىرلى ورىنداردان كۇتەمىن", - دەپ قولداۋ ءبىلدىردى تامارا اسار.
پوسموترەت ەتۋ پۋبليكاتسيۋ ۆ Instagram
ەستەرىڭىزگە سالا كەتەيىك، ع.نيازوۆقا قاتىستى سوت قاۋلىسىمەن تەرگەۋ ورگانى سايلاعان جانە وبلىس پروكۋراتۋراسى قولداعان ەكى اي مەرزىمگە «كۇزەتپەن ۇستاۋ» تۇرىندەگى بۇلتارتپاۋ شاراسى ەنگىزىلگەن بولاتىن.
"ادىرنا" ۇلتتىق پورتالى
