قاقاعان قىستا بالالارىن ۆەلوسيپەدپەن تاسىعان اكەنىڭ بەينەجازباسى بارشا قازاقتىڭ جۇرەگىن ەلجىرەتكەن ەدى. بلوگەر اسىلحان دۇكەنباەۆتىڭ باستاماسىمەن بۇل ازاماتقا كولىك الىپ بەرۋگە قاراجات جينالا باستادى، دەپ حابارلايدى “ادىرنا” ۇلتتىق پورتالى.
الەۋمەتتىك جەلىلەردە تارالعان بەينەجازبادان كەيىن ەسىمىن اتاماعان شىمكەنتتىك ازامات ءوز اتىنان كولىك سىيلاعىسى كەلگەنى دە بەلگىلى بولدى.
بىراق قىزىلوردالىق اكەي بۇل سىيلىقتان باس تارتتى.
“جۇرت نيەت ەتىپ، جيناعان اقشادان ءبىر كولىك بۇيىرتسا جەتكىلىكتى”، دەدى ءوزى.
"شىمكەنتتىك ءبىر باۋىرىمىز كولىك سىيلايمىن دەپ نيەت قىلىپ جاتىر ەكەن. باۋىرىما راحمەت، اللا رازى بولسىن. سول كولىك وزىندە قالا بەرسە، مىنگىزگەندەي كورەمىن. كوپشىلىكتىڭ جيناعان كومەگى اقشاسىنا تۇسكەن كولىكتىڭ ىڭعايى بولسا، سونى ءۇي العانداي كورەمىن", - دەدى ول.
كولىكتەن بولەك، باسپانا اپەرگىسى كەلگەن حالىقتىڭ بۇل اق ادال نيەتىنە قىزىلوردالىق تۇرعىن ءوز راقمەتىن ايتىپ، قازىرگى تۇرىپ جاتقان باسپاناسىنىڭ تەگىن ەكەنىن، شۇكىرلىك ەتەتىنىن جەتكىزدى.
“بارلىقتارىڭىزعا راحمەت. اعايىن، شەشەم، باۋىرلارىم، كەلىنشەگىم، ءوزىم بار. وسى ءۇي ماسەلەسىن تەك راحمەتپەن دوعارۋ جونىندە شەشىم قابىلداپ وتىرمىز. تاقىرىپ كولىكتەن باستالىپ ەدى عوي. جينالعان قاراجاتپەن ءبىر كولىك بۇيىرتسىن. وسىمەن جابىلسا دەگەن وي بار. تۇرىپ جاتقان باسپانام، اللاعا شۇكىر تەگىن. شەشەمنىڭ ءسوزى مەن ءۇشىن ۇلكەن نارسە عوي، ول كىسىنىڭ سوزىنەن اتتاپ كەتە المايمىن", - دەپ ءتۇسىندىردى ول.
“ادىرنا” ۇلتتىق پورتالى
