قر مەملەكەتتىك حاتشىسى ەرلان قارين قاڭتارداعى ميتينگ، تارتىپسىزدىكتەر تۋرالى Qasqa Jol Youtube ارناسىنا سۇحبات بەردى. الماتىداعى قاقتىعىستار كۇشەيگەن كەزدە ينتەرنەتتىڭ نە سەبەپتى اجىراتىلعانىن ءتۇسىندىردى، دەپ حابارلايدى "ادىرنا" ۇلتتىق پورتالى.
«سيرياعا قاشىپ كەتكەن ازامات 5,6 قاڭتاردا ەلدەگى راديكالدى وي جاقتاۋشىلارىنا ۆيدەوۇندەۋ جاسادى. الداعى ۋاقىتتا ول ۆيدەو جاريالاناتىن شىعار. ينتەرنەتتىڭ بۇعاتتالۋىنىڭ سەبەبى سول. سەبەبى ۇندەۋىندە ول ءبارىن قارۋلى كۇرەسكە، سوعىسقا شاقىرادى. بۇل وتە قاۋىپتى جاعداي بولدى. ەگەر قولداۋ تاۋىپ كەتسە، جاعداي قانداي ستسەناريدە ءوربيتىنىن ايتۋ قيىن ەدى»، - دەدى ەرلان قارين سۇحباتىندا.
مەملەكەتتىك حاتشىنىڭ ايتۋىنشا، ۇندەۋ جاساعان جىگىت 2011-2012 جىلدارى ەلىمىزدەگى لاڭكەستىك ارەكەتتەرگە قاتىسى بار ۇيىمنىڭ وكىلى.
«بۇل ۇيىم 2011 جىلى اۋعانستان مەن پاكىستان شەكاراسىندا قۇرىلعان. كەيىن شەتەلدىك ارناۋلى قىزمەتتەردىڭ ارەكەتتەرىنىڭ ناتيجەسىندە تالقاندالعان ەدى. ەڭ ءبىرىنشى اكتسياسى قازاقستاندا جاسالدى. وسى توپقا قاتىسى بار ادام 2012 جىلى ەۋروپادا دا تەرروريستىك اكتسيا ۇيىمداستىردى. جالپى، توپتىڭ باسشىلىعىندا 5 ادام بولسا، ونىڭ ەكەۋى ەۋروپالىق، ۇشەۋى قازاقستاندىق ازامات ەدى. ءبىر ازامات 2014 جىلى پاكىستاندا ۇستالىپ، ەلگە جەتكىزىلىپ 20 جىلعا سوتتالدى. ەكىنشىسى، 2017 جىلى اۋعانستاندا قولعا ءتۇسىپ، 2018 جىلى ەلگە قايتارىلدى. مەن ەكەۋىمەن دە كولونيادا كەزدەسىپ، سۇحبات جۇرگىزگەنمىن. ءۇشىنشىسى سىتىلىپ، سيرياعا قاشىپ كەتكەن. ال ەۋروپالىق ەكى ازاماتتىڭ ءبىرىن امەريكاندىق بارلاۋ قىزمەتتەرى 2012 جىلى اۋعانستاندا ، ەكىنشىسىن 2014 جىلى سيريادا درونمەن اتىپ ءولتىردى. قاڭتاردا ۆيدەوۇندەۋدى سيرياعا قاشقان قازاقستاندىق ازامات جاسادى»، - دەپ ءتۇسىندىردى مەملەكەتتىك حاتشى.
ە. قارين سونداي-اق 2016 جىلى اقتوبەدەگى تەرروريستىك اكتىلەردىڭ ستسەناريى مەن الماتىداعى ستراتەگيالىق نىسانداردى باسىپ الۋ ارەكەتتەرى وتە ۇقساس ەكەنىن العا تارتىپ وتىر. ول كەزدە لاڭكەستەر حالىقارالىق تەرروريستىك ۇيىم وكىلىنىنىڭ اۋديوۇندەۋى ارقىلى شابۋىلدار ۇيىمداستىرعان.
"ادىرنا" ۇلتتىق پورتالى
سۇحباتتىڭ تولىق نۇسقاسىن تومەندەگى سىلتەمە بويىنشا كورە الاسىزدار:
