جاقىن ارادا ءۇيلى بولعان 9 جاسار ورازىمبەت ەسىمدى بالانىڭ سويلەگەن ءسوزى قازاقستاندىق جۋرناليست ساۋلە ابىدلاحانقىزىنىڭ كوڭىلىنەن شىقپادى، دەپ جازادى "ادىرنا" ءتىلشىسى.
ورازىمبەت ەسىمدى ءبۇلدىرشىن مۇگەدەك اناسى جانە باۋىرلارىمەن ء"ۇي" دەپ ايتۋعا كەلمەيتىن جەردە تۇرىپ جاتقان بولاتىن. كەيىننەن، "حارەكەت" قورى 9 جاسار بالانىڭ ارمانىن ورىنداپ، ۇلكەن ۇيگە كوشۋىنە سەبەپكەر بولدى. وسى تاقىرىپقا بايلانىستى ساۋلە ابىلداحانقىزى ءوزىنىڭ الەۋمەتتىك جەلىسىندە بىلاي دەپ جازدى:
ء"بىر كىشكەنتاي بالاپانعا حالىق ءۇي سىيلاپتى، جۇرەگى جارىلا قۋانىپ، راحمەت ايتىپ تۇرعان بالاقاننىڭ ۆيدەوسىن كورىپ قالدىم. قۇتتى بولسىن!!! ءوسىپ-ءونىپ، جاڭا شاڭىراعى قاراشاڭىراققا اينالسىن! اناسى امان بولسىن! ءبىر ادام قۋانسا، قۋانامىز عوي. ال انا مەن بالانىڭ قۋانعانى - قۇدايدىڭ قۋانعانى...."
ونىڭ ايتۋىنشا، كىپ-كىشكەنتاي، بەسىكتەن بەلى شىقپاعان بالانىڭ ەكى ءسوزىنىڭ ءبىرى – «اللاح، ينشاللاح، ماشاللاح، ءجاننات…» سياقتى ارابي سوزدەر. سوعان قاراعاندا، ءۇي سىيلاعان «ساقاليتتەر» شىعار. ارابي ءدىننىڭ ءدانى ءتۇسىپ ۇلگەرگەن-ءمىس.
"تەك... الگى بالانىڭ العىس ايتقان ۆيدەوسىن قاراپ وتىرعاندا، "قاپ، اتتەگەن-اي!... دەگەن ءبىر تۇيتكىل تۇردى كوكەيدە... كىپ-كىشكەنتاي، بەسىكتەن بەلى شىقپاعان بالانىڭ ەكى ءسوزىنىڭ ءبىرى - "اللاح، ينشاللاح، ماشاللاح، ءجاننات..." سياقتى ارابي سوزدەر... (سوعان قاراعاندا، ءۇي سىيلاعان ساقاليتتەر شىعار...) ارابي ءدىننىڭ ءدانى ءتۇسىپ ۇلگەرىپتى... وزەگىنە قۇرت بوپ تۇسپەسە ەكەن.... جۇرەگىنە نۇر بوپ قۇيىلسا ەكەن...
بالالاردىڭ، جەتكىنشەكتەردىڭ وزەگى بەرىك بولۋى، ءارتۇرلى اعىمنىڭ جەتەگىندە كەتپەۋى - وتباسىمەن بىرگە مەكتەپ مۇعالىمدەرىنە بىردەي بايلانىستى. بۇگىن مەكتەپ وقۋشىلارىنىڭ وزەگىنە ۇلتتىق ءناردى قۇيماساق، ەرتەڭ ول ۆاكۋمعا "قوقىس" تولادى دا، مىنە، سول كەزدە ناعىز قاسىرەت، ناعىز تراگەديا بولادى... ول كەزدە تاۋەلسىزدىگىمىز دە بايگەگە تىگىلەدى..." دەدى ول.
