بۇگىن شىمكەنت قالاسىنىڭ اكىمى مۇرات ايتەنوۆ ەكونوميكا جانە بيۋدجەتتىك جوسپارلاۋ باسقارماسىنىڭ ەسەبىن تىڭدادى. جيىندا باسقارما باسشىسى ر.مۋلكەمانوۆ 2022 جىلى اتقارىلاتىن جۇمىستاردى باياندادى.
شىمكەنت قالاسىندا ەكونوميكانىڭ تۇراقتى دامۋىن جىل سايىن ورتا ەسەپپەن 4-5 پايىزعا قامتاماسىز ەتۋ كوزدەلۋدە. وسىلايشا، جالپى وڭىرلىك ءونىمدى 2026 جىلعا قاراي 4,1 ترلن تەڭگەگە جەتكىزۋ جوسپارلانىپ وتىر. بيىلعى جىلى جالپى وڭىرلىك ءونىمدى 3 ترلن تەڭگەگە جەتكىزۋ جوسپارلانۋدا.
وسى جىلعى مەجەگە جەتۋ ءۇشىن قالانىڭ ونەركاسىپ سالاسىندا 2022 جىلى جالپى قۇنى 538 ملرد تەڭگەنى قۇرايتىن 274 ينۆەستيتسيالىق جوبانى جۇزەگە اسىرۋ كوزدەلۋدە.
سالا جەتەكشىسى سونىمەن بىرگە بولشەك ساۋدا 540 ملرد تەڭگەگە، ونەركاسىپ ءونىمى 856,9 ملرد تەڭگەگە، اۋىل شارۋاشىلىعىنىڭ ءونىم كولەمى 44,1 ملرد تەڭگەگە جەتكىزۋ جوسپارلانىپ وتىرعانىن اتاپ ءوتتى.
قالا اكىمى مەملەكەت باسشىسىنىڭ ەكونوميكانى ءارتاراپتاندىرۋ جانە يمپورت الماستىرۋ جونىندەگى تاپسىرماسىن ورىنداۋدىڭ بىردەن ءبىر شارتى – ول وڭىردە ءوندىرىستىڭ دامۋىنا قولايلى جاعداي جاساۋ جانە يندۋستريالدى ايماقتاردى دامىتۋ بولىپ تابىلاتىنىن ايتتى. بۇل جۇمىستاردى جۇزەگە اسىرۋعا مەگاپوليستىڭ مۇمكىنشىلىگى وراسان ەكەنىندە جەتكىزدى.
ونەركاسىپ بۇل ەكونوميكانىڭ لوكوموتيۆى ەكەنىن ايتقان قالا باسشىسى وسى باعىتتى دامىتۋعا بولىنگەن قارجىنىڭ ءتيىمدى يگەرلۋىن باقىلاۋدى كۇشەيتۋ قاجەت دەدى.
سونىمەن بىرگە مۇرات ايتەنوۆ وزدىگىنەن ورىندالىپ جاتقان ەكونوميكالىق كورسەتكىشتەردى جۇمىس ناتيجەسى رەتىندە ۇسىنۋدى توقتاتۋ كەرەكتىگىن قاتاڭ ەسكەرتىپ، بەلگىلەنگەن مەجەمەن شەكتەلمەۋدى ايتىپ، ەكونوميكالىق سەرپىلىسكە قاجىرلى ەڭبەك كەرەكتىگىن اتاپ ءوتتى.
شىمكەنت قالاسى اكىمدىگىنىڭ ءباسپاسوز قىزمەتى
