قالا اكىمى مۇرات ايتەنوۆ وسى جىلدىڭ باسىندا باستالعان بايدىبەك بي جانە ارعىنبەكوۆ كوشەلەرىنىڭ قيىلىسىنداعى جولايرىق قۇرىلىس الاڭىندا بولىپ، جۇمىستارمەن تانىستى.
قالاداعى كولىك قوزعالىسىن رەتتەۋدىڭ كەشەندى جوسپارىنا سايكەس، بايدىبەك بي داڭعىلى مەن ارعىنبەكوۆ كوشەسىنىڭ قيىلىسىندا 2022-2023 جىلدار ارالىعىندا ءۇش دەڭگەيلى جولايرىقتىڭ قۇرىلىسى جۇرگىزىلەدى.
جولايرىقتىڭ تەحنيكالىق سيپاتىنا سايكەس، بايدىبەك بي داڭعىلىندا 700 مەتر، ارعىنبەكوۆ كوشەسىندە 921 مەتر كوشە ارالىعى قۇرىلىس اۋماعىنا ەنگەن. قۇرىلىس جوسپارى بويىنشا ەنى 80 مەترلى 4-6 جولاقتى اۆتوماگيسترال سالىنىپ، جول جيەگىنە جاياۋ جۇرگىنشىلەر جانە ۆەلوجول توسەلەتىن بولادى.
مۇرات ايتەنوۆ اتقارىلعان جۇمىستاردى كورىپ، مەردىگەر مەن سالا جەتەكشىسىنە قۇرىلىس جۇمىستارىندا كەمشىلىكتەردى بولدىرماۋدى، ساپاسىنا باسا نازار اۋدارۋدى جانە بولىنگەن قاراجاتتى ءتيىمدى جۇمساپ، بەلگىلەنگەن مەرزىمدە اياقتاۋدى تاپسىردى. سونىمەن بىرگە، كولىك كەپتەلىسى سەكىلدى قولايسىزدىقتاردى بولدىرماۋ ءۇشىن كوشە قوزعالىسىن شەكتەۋ جۇمىستارىن دۇرىس ۇيىمداستىرۋدى ايتتى.
جولايرىق قۇرىلىسىنا بايلانىستى ارعىنبەكوۆ كوشەسىندە بايدىبەك بي كوشەسىنەن ءجۇسىپوۆ كوشەسىنە دەيىنگى ارالىقتاعى كولىك قوزعالىسىنا ۋاقىتشا شەكتەۋ قويىلعان. 30 قاڭتار كۇنى باتىستان شىعىسقا قاراي بايتۇرسىنوۆ كوشەسىنەن بايدىبەك بي داڭعىلىنا دەيىنگى ارالىق جابىلدى.
كولىك قوزعالىسى ءۇشىن ارعىنبەكوۆ كوشەسىنە التەرناتيۆتى ماگيسترالدار رەتىندە رىسقۇلوۆ جانە تولەمەتوۆ كوشەلەرى بەلگىلەنگەن.
قازىرگى ۋاقىتتا اتالمىش قۇرىلىس نىسانىندا ارعىنبەكوۆ كوشەسى بويىمەن جەر قازۋ جۇمىستارى اتقارىلۋدا.
شىمكەنت قالاسى اكىمدىگىنىڭ ءباسپاسوز قىزمەتى
